找回密碼
 註冊

QQ登錄

只需一步,快速開始

搜索
熱搜: 活動 交友 discuz
查看: 2362|回復: 0

守宫砂与坐灰桶

[複製鏈接]
發表於 2010-3-5 14:57:10 | 顯示全部樓層 |閱讀模式

守宫砂与坐灰桶

  棍子最近嘅兴趣关注点发生咗变化,转攻相面、二奶等课题。先将黄首富嘅标准像贴上来评点一番,继而又喺隔嚟原创对某model信口雌黄,话人地系二奶格。哩啲话题好啱村民我嘅胃口,今日周末跟埋棍子爹几句,当系狗尾续貂。


  大婆二奶哩样嘢,俗啲嘅叫大老婆、小老婆;文雅嘅称太太、姨太太;高贵嘅尊为夫人、如夫人;普通啲嘅呼正房、偏房;书面啲嘅称正室、侧室。一样嘢有咁多名称,说明一夫多妻制相当普遍流行。本朝当政后,废咗老辜辜鸿铭话斋嘅一个茶壶配几个茶杯嘅传统习俗,我地男人嘅齐人之福就从此不再啦。


  香港法例应该系一夫一妻制嘎,点解老一代富豪好多都有几个老婆。尤其赌王老何,听闻佢仲有嗰20old嘅阿六定阿七。十八新娘八十郎,苍苍白发对红妆。鸳鸯被里成双夜,一树梨花压海棠。羡煞天下男人!点回事呢?要劳烦单春等香港嘅同志帮我地辅导下。


  好似扯远咗,讲番正题。旧时啲男人好重处女情结,娶大老婆一定要黄花闺女。娶二奶妾侍要求就冇咁严格,甚至青楼妓女都唔拘。正房太太要充门面撑体统,所以必须系原装处子;偏房小妾重使用价值,越风骚善解人意、越擅长床第之欢越好。嗰时男人好醒目,业务手册《素女经》留番自己刨。编啲《女戒》、三从四德、七出之类嘅洗脑文件俾女人学。精神上嘅束缚奴役靠哩啲礼教方面嘅嘢,技术手段上嘅防范措施就系守宫砂啦。守宫就系屋企天花板上嗰啲盐蛇(壁虎),守宫砂就系盐蛇血。攞佢嘅血点喺女仔前臂上,据说鲜红一点水洗唔甩,但系此女一旦俾人破瓜就当堂化去无形。故此,古人攞佢嚟验贞。


  守宫砂哩样嘢系咪真系灵呢?我冇条件验证,好在材料唔难搵,打算番村抓几条抽啲血send俾身边日日莺歌燕舞嘅风流浪子灯爷同埋采花贼星爷,请佢地试完番嚟汇报。


  验贞仲有一样更加尖端嘅皇家秘技就系坐灰桶。皇帝娶老婆系国家大事,当然要慎重其事,但亦不外乎两件事:查身世,验身体。查身世即系类似我党嘅政审。当然旧时啲皇帝梗系冇我党咁英明,唔识得要查你直、傍系三代以上咁交关,静系check下你嗲地妈咪有冇案底,你本人有冇劣迹就掂嘎啦。


  验身体就邋遢啲。验身官通常搵个稳婆充任。稳婆即系产婆,宜家叫助产士(咁罗嗦都系怕联哥仔晒我称呼护士叫姑娘)。点解搵佢地嚟do呢?其一事因哩类人多数都系四、五十啲女人,皇帝唔怕蚀底嘛;二,职业原因佢地对嗰啲部位了解认识多啲嘛,咪觉得佢地够专业啰。操作规程系咁嘅,攞个桶翻转佢底朝天,喺桶底铺一层灶灰抹平。然后请嗰位候选佳丽宽衣解带,寸丝不着一轮明月坐落个灰桶。哩个时候稳婆就攞一羽软鸡毛去撩佳丽个鼻哥窿,佢梗系会打喷嚏。如果下面啲灰吹到尘土飞扬,哩位系second hand,萝柚啲灰都唔使拍就走得。如果啲灰平静如初,原装靓嘢,收货。


  上面讲啲稳婆对嗰仙人洞了解认识多啲,但多唔等于正确啵。稳婆推理系咁嘅:处女未经人事,佢嘅幽处系密笼状态,所以打喷嚏时下行嘅气体无法由此门冲出,气不冲灰不动。敦过伦嘅就通晒笼,上面打喷嚏下面自然阴风吹啦。哩套理论似乎逻辑几通,但系我唔明佢地点解忽略咗产道后面嗰条谷道。如果位候选佳丽啱好前一日食咗几条番薯,肠道气体充盈,鸡毛撩鼻哥窿打喷嚏引起腹压增加导致啲番薯屁自谷道喷薄而出,稳婆就当佢系来自产道,你话个佳丽几冤枉呢。

您需要登錄後才可以回帖 登錄 | 註冊

本版積分規則

Archiver|手機版|粵語協會

GMT+8, 2024-4-21 09:44 , Processed in 0.057859 second(s), 20 queries .

Powered by Discuz! X3.5 Licensed

© 2001-2024 Discuz! Team.

快速回復 返回頂部 返回列表