發表於 2010-1-13 16:40:18
可能连续几晚好似做贼咁做搬运，体力顶唔顺，今晚又失眠。窗外，雨点敲住屋檐，喺大自然嘅美妙声响中，夹杂住个小区保安部山寨手机传来，MP3失真噪音！依稀听到呼天抢地嘅《青藏高原》、不停重播住「辣妹子辣，辣妹子、辣」。如果唔系咁大雨，真系有冲动同佢部手机做个防水试验。瞓唔着，记起编辑同监制同我讲，有好多老友发短信过来，唔系投票，都唔系为咗金句。根本同个节目话题无关。系同我打招呼，有啲仲好有心，叫我注意天气变化，着多件衫，食少支烟。甚至有啲老友经常敦促我快啲生返个细路！天气好凉，个心好暖！可能心情好，连部山寨机好似啲失真都无咁严重。睇来搵返对山寨耳塞，下次送俾个保安先得。哩几个保安真是好热爱，同中意推广民族艺术！老嘅听大戏查笃撑，后生嘅听民族歌曲！个个都将部山寨机开到鬼杀咁大声。好有以前农村广播站嘅感觉。当然，佢地啲本职工作都好负责。三点半，个肚开始同啲雨声产生共鸣。