隔牆有耳：澳門良心打回原形！

Ψ丹尼王子

20-12-2009

香港《蘋果日報》

隔牆有耳：澳門良心打回原形

澳門回歸 10年，今日係新特首崔世安登基大日子，亦係佢眼中釘、審計署前審計長蔡美莉退下來嘅時候。

前審計長蔡美莉


搵晒自己友埋班

人稱「美麗姐」嘅蔡美莉曾高分貝批評崔世安做社會文化司司長期間監察不力，發生東亞運場館建築費嚴重超支醜聞，日前公佈任內最後一份審計報告，終極一擊勁插崔世安做司長時領導嘅教育暨青年局浪費 1.4億元公帑，大快人心，因此被譽為「澳門良心」。

崔世安管治班子搵同聲同氣自己友埋班，「美麗姐」冇得留低打回原形，返回統計及普查局做顧問，上周五美麗姐最後一日返審計署上班，逐一同下屬講拜拜，雖然冇搞官式歡送會，不過近百個曾與她共事、現職及離職嘅同僚，羅漢請觀音為佢舉行告別宴，席間大家重溫共同監察政府卻吃力不討好嘅往事時，真係又欷歔又感慨，搞到美麗姐鬼咁感動。

臨別贈言，澳門審計署網頁日前發放《審計長蔡美莉盼特區審計工作堅持獨立和專業》文章，美麗姐撰文感謝一班同佢「同甘共苦」嘅同事，因為澳門回歸後創立審計署，大家做開荒牛由零開始，工作十分不容易。

香港審計署被視為監察政府「照妖鏡」，部門對遭審計署查數誠惶誠恐；澳門官員對幫佢哋算賬嘅審計工作卻唔係幾合作，連立法會都唔多關心官僚大花筒問題，美麗姐對此一直耿耿於懷，卸任前佢鼓勵審計署人員繼續堅持獨立、客觀、公正、專業、謹慎、廉潔奉公嘅工作原則，加強推廣政府部門節約公共資源嘅文化。




網民轟用人唯親

唔少澳門人對於美麗姐被打壓好激氣，有人喺 facebook發起「反對吹水安迫蔡美莉審計長下台」群組， 800人力撐美麗姐，網民批評崔世安用人唯親，連唯一敢唱反調嘅官員都棄用，安插馬仔進駐廉署、審計署兩部門，將兩個應該獨立運作嘅部門收歸旗下，日後澳門恐怕更加黑暗，哀號「陽光何時照射我們土地？」

pf_lee@appledaily.com






http://hk.apple.nextmedia.com/template/apple/art_main.php?iss_id=20091220&sec_id=4104&subsec_id=15333&art_id=13543974&cat_id=45&coln_id=20