|
-
[转帖] 出处:网易论坛 发表者：统一战部姨太 2007-01-25 01:14:24
http://bbs.news.163.com/bbs/zhongmei/486102.html
转贴者声明:本帖观点不代表转贴者的观点
香港中大國際化事件暴露香港輕視廣東話嘅語言/文化/教育
(原帖名:为汉语而骄傲自大)
提問者：一個關心廣東話發展嘅香港人-江 欣 先生
一. 大件事
二零零五年一月份香港中文大學國際化事件罩眼睇似乎係中英文之爭﹐若果認真分析成件事﹐背後隱藏嘅危機一啲都唔講得笑﹗佢一針見血咁暴露咗香港咁多年嚟一個無可爭詏嘅疏忽﹕廣東話(粵語) 嘅語言、文化、教育上冇受到重視嘅事實﹗呢個疏忽唔單單削弱香港人嘅「香港感」﹐佢重對中國甚至世界文化上都有副面影響。就香港嚟講﹐身為香港人(甚至乎其它廣東話區人),我母語就係我社會文化根, 唔尊重母語等於輕視以佢作為母語嘅人嘅社會各層面上嘅正常、和諧發展潛能。
呢種自我貶值、自卑心態已經造成粵語退化(懶音、普通話式粵語歌曲、講話、英文化等現象)﹐失去創造、競爭力(越嚟越少外國人學廣東話…)。相對於中國﹐香港若果放棄廣東話作為母語﹐後果係損失一個帶頭維護中國多元語言文化嘅作用。 唔使講大家都知中國係個多元民族、多元文化嘅「共和」國。廣東話嘅遺棄會間接影響其它中國文化語言嘅保存同打底。
喺國際舞台﹐廣東話(同埋客家、閩南、吳…)﹐作為古漢語(順便提你哋佢有超過兩千年歷史)活化石﹐佢嘅缺席將會阻礙其它非中文地區對中國文化真正嘅認識﹐亦都阻礙世界文化和諧發展。喺中國全面推普下大家係咪要反省一下各地區語言同普通話互存嘅關係﹖
二. 乜乜物物
一講起廣東話一般香港人(同部份國內同胞)就會一口咬定佢唔寫得、唔正確、唔文明。之不過當一個語言可以有效、優雅咁畀廣大民眾用嚟表達自己嘅感情﹐從事經濟文化活動﹐呢個語言﹐唔理口講定手寫都絕對係正確、文明嘅語言。有啲人甚至乎講廣東話唔係中文﹗呢層好多語言專家會否定呢個講法﹕廣東話唔單止係中文﹐重係中文中最有中文氣質嘅中文之一。
中文 ＝ 中國文化圈語言總和
中文 ≠ 單指普通話
亦有人口出狂言認為中國人唔講普通話就唔係中國人﹗咁放棄自己母語嘅算咩人﹖至於無厘頭、通俗等呢啲戥興說話﹐大家唔好忘記風格係因創作者而定﹐ 若果廣東話有廣大民眾嘅認同﹐佢唔會有今時今日嘅地步。 若果廣東話有廣大民眾嘅支持﹐佢會散發更多文化風格。現時廣東話齋有口語地位﹐大家有冇諗過佢都可以喺文學、科學上…有所貢獻﹖
廣東話 ＝ 語言﹐講得﹐寫得出
三. 道理一字咁淺
香港人嘅母語係廣東話而唔係英文、普通話。 但係三者絕對可以共存。 有人會打蛇隨棍上講三者共存會造成混亂。 廣東話作為一個同普通話差唔多嘅語言, 點解攞咁多精神時間去維護﹐不而就改用普通話或者英文作為母語。
咪住先﹗一個語言嘅價值唔可以單從方唔方便度考慮﹐故此維護粵語係在於佢賦予每一個人一種靈活、自然、和諧嘅「小宇宙」去理解世界﹐發展內心﹐發揮個人各文化層面潛能。除咗母語冇邊一種語言可以畀到你呢種輕鬆自然力量。相反﹐掌握唔好母語會導致「無能表達」、「不能盡興」等嘅屈就感覺﹐呢啲冚唥都係阻礙社會經濟文化進步嘅毒藥。另外﹐放棄母語教學絕對唔合乎經濟效益。
四. 喊都冇謂行動
最實際中大問題係香港社會最現實嘅縮影。 佢哋形成冷酷反映香港多年嚟唔真正重視自己母語結果﹗解決中大事件亦都要從社會市民、中小學生對母語價值觀上著手。 點解唔將呢個行動擴大至中小學層面﹐鼓吹「我手寫我心」式母語教育﹖
冚唥由母語出發 中大畀批評唔重視英文、普通話。所以一個真正合乎中大要求嘅國際化方針係從自己出發再向多元化、互補、尊重、靈活方向邁進嘅﹗佢應該唔單止用英文授課﹐保留廣東話﹐重要採用普通話添﹗表面睇嚟好似將事件複雜化﹐但事實上更加符合香港需要﹐因為國際化係個相對概念嚟㗎。 對於識英文嘅外國學生﹐ 佢哋嘅國際同香港、內地學生嘅又唔同。之所以中大要三管齊下先至可以稱得上廣義國際化就係咁解。但係真正核心思想重係由校長、教授到學生都要以廣東話作為出發點﹐去發揮粵普英(或以上)互補、互動精神。要達到呢個目的嘅附帶條件就係適當語言訓練。 監師生用英文去教書或者學﹐一定引起副效果。
總言之:
國際化≠單指英文化﹐單邊、單調化
國際化≠放棄母語
「兩文三語」嘅三兩灰色地帶 學校作為每個市民基本文化價值觀念形成地方﹐教育決策者應該特別注意呢個階段嘅啟承質素。政策上用字唔應該含糊﹐例如「兩文」中嘅「中」係指乜嘢﹖普通話定廣東話﹖如果淨係指普通話係咪忽視咗廣東話﹖如果指兩樣﹐咁廣東話喺邊﹖重有﹐母語教育定義係乜嘢﹖用廣東話講解但寫普通話(相信係現時唔成文規定) ﹖點解唔發展真正用廣東話(聽寫講) 教育方式﹖呢個就係成個母語教學嘅核心﹗好多人批評香港大中小學生中文水平下降﹐乜嘢中文水平下降﹖ 無非係普通話(唔係學生母語) 寫作能力下降﹖但我相信佢哋廣東話表達能力唔畀世界任何國家輸蝕﹐只不過香港教育冇畀發揮機會佢哋。如果學生直接用廣東話成文﹐係咪會提高表達同創造能力﹖用廣東話去設計﹐編寫教科書去教普通話﹐英文﹐任何一種知識﹐係咪會收到事半功倍嘅效果﹖
五. 窮則變﹐變則通
廣東話之所以一直冇畀重視有好多原因﹐其中一個係佢冇發展到「成文」程度。成文意味文字規範。 廣東話用好多古文字﹐加上佢獨有嘅字﹐成個可以講係個「承古展新」嘅文字系統。坐言起行 中大作為一間香港中文運動啟蒙學府﹐可以由佢出發啟動香港人母語知覺。
1) 集合廣東話專家 (香港地已經有唔少) 一齊聯署一份廣東話教學聲明﹐促請香港特區政府尊重中大保留廣東話決定﹐促請香港特區政府喺中小學設廣東話課程﹐同喺中文教育定位上改正「廣東話唔正確」綱領性思路。另外一方面﹐進行將廣東話規範工作﹐以佢作成文藍本﹐篇寫教科書。
2) 成立推廣小組到中小學介紹廣東話﹐等新一代後生仔女對自己母語有正確認識同建立自信心。
3) 社會方面﹐舉行公開研討交流會去推廣廣東話﹐鼓勵人用廣東話寫作…
-
[ 本帖最後由 正正 於 2009-8-29 22:36 編輯 ] | 
發表於 2009-8-29 22:34:40
發表於 2010-6-16 13:30:22