「请」在广东话与「煲冬瓜」中的区别

jun2982804

　　因为「煲冬瓜」嘅侵入，越嚟越多人将好多词嘅用法直接代入广东话嘅用法当中，「请」就系一个好好嘅例子。首先我哋要了解「请

」响广东话与「煲冬瓜」中嘅差异先：

1. 求人哋畀自己做某事。如～假，～命，～战，～缨（喻请战杀敌）。

2. 求人哋做某事，相当于劳驾、劳烦嘅意思。如～你从后门下车（公交车常用语），～示

3. 延聘、邀、约人来：～客。～柬。邀～。

　　以上三个意思，都系以「煲冬瓜」嘅解释为标准写落嚟嘅，其中只有第三个意思先系喺广东话中肯定用「请」嚟表示。

　　第一、二个意思比较易混淆，如果译成广东话，就要依据实际情况确定。首先，佢哋有个共同特点，就系「求人哋」，如果喺求人哋个阵，劳烦咗人哋，咁用广东话表达，理应用「唔该」表示，但好多词汇，如上面所讲到嘅「请假」、「请示」等，都已经系约定俗成嘅词语，如果变成地道广东话好似变得比较哆嗦，而且好似有啲多此一举嘅感觉，而对于第种情况，好似上面极常见嘅公交用语「请你从后门下车」，完全可以改成广东话「唔该你係后门落车」。

　　可以讲，「请」喺广东话一般就係表示上面第三个意思。我记得卢总响《「唔该」同「多谢」系有分别嘅！》一文中比较清晰咁同我哋讲解咗「唔该」与「多谢」嘅意思，响度，我想再喺喱个基础上，讲吓「请」与「唔该」、「多谢」嘅关系：

假设有A君与B君。

如果A君「请」B君做某事，则应该由B君向A君讲「多谢」；

如果A君「唔该」B君做某事，则应该由A君向B君讲「多谢」。

以上就系佢哋之间微妙嘅区别，唔知我讲得啱唔啱呢？如果唔啱，唔该赐教！

UngooChan

第一個意思並非「煲冬瓜」詞彙，而係共同語詞彙，古文已有呢個用法。

又如《廉頗藺相如列傳》：藺相如前曰：「趙王竊聞秦王善為秦聲，請奉盆缶秦王，以相娛樂。」其中「請」一句，就係「請准許我捧個缶畀秦王（擊）」。

 

jun2982804

原帖由 UngooChan 於 2009-8-29 01:05 發表 第一個意思並非「煲冬瓜」詞彙，而係共同語詞彙，古文已有呢個用法。 又如《廉頗藺相如列傳》：藺相如前曰：「趙王竊聞秦王善為秦聲，請奉盆缶秦王，以相娛樂。」其中「請」一句，就係「請准許我捧個缶畀秦王（擊）」。   ...

你可能系啱嘅，其实我啱啱开始写个阵都觉得似乎第一个意思唔多应该归入可以用「唔该」嘅范畴，应该讲我未有足够能力去谂完整，但又觉得有必要分清，所以先将观点摆出嚟，希望大家齐齐嚟讨论吓。

亦希望各位不怜赐教。

[ 本帖最後由 jun2982804 於 2009-8-29 11:59 編輯 ]