香港都有条街叫「廣東道」呀!!! : )

丹尼王子

廣東道（Canton Road）係香港一條馬路，喺九龍半島西邊，由半島頭尖沙嘴向北伸入官涌、油麻地，直至旺角，差啲到深水埗。佢南邊接住梳士巴利道，而北邊就駁住荔枝角道。廣東道大致同彌敦道平行。因為規劃變化，宜家廣東道有少部份係斷開咗，分成四截。全香港最大嘅門牌冧巴(number/号碼)，就係喺廣東道，即係旺角1239號。

 

歷史

 

1887年，九龍倉碼頭側邊開咗條馬路，當時英文名叫MacDonnell Road，中文名叫麥當奴道。個名以當時香港總督麥當奴命名。到咗1909年3月，為免同香港島另一條麥當奴道撈亂，佢就同附近街道一樣，改用咗香港附近通商各城為名。九龍依條麥當奴道，就以當時嘅大清廣東省城為名，即係後嚟中華民國同中華人民共和國嘅廣州市。就係咁樣，條路英文名就叫Canton Road，中文名就叫廣東道。

 

條路跟住九龍市區向北發展而伸長。佢原本係貼近半島西岸，不過經過多次填海之後，除咗尖沙嘴一段，其他路段就同海隔好遠。1970年代，香港政府將官涌近佐敦道碼頭一段，向西改駁渡船街，而側邊一段路，亦變成佐治五世公園。所以，佐敦道以南以北兩段就斷開咗。佐敦道以北路段，近窩打老道，因為規劃咗做油麻地果欄斷開咗。後嚟香港房屋協會喺油麻地近眾坊街起(建築)駿發花園，依段廣東道就剷走咗嚟起依個屋苑。

 

九廣鐵路公司計劃起九龍南線嗰陣時，有諗過喺尖沙嘴海港城旁邊起廣東道站，同海港城業主九龍倉傾，不過因為傾成本分擔嘅問題傾唔掂數，最後都冇起到。不過近官涌嘅九龍西站，都係喺廣東道側邊，就喺舊時佐敦道碼頭巴士總站嗰個位度。

 

 

沿路主要建築

 

• 旺角街市
• 九龍佐治五世紀念公園
• 廣東道政府合署
• 港景峰
• 中港城／中國客運碼頭
• 海港城
• 新港中心
• 北京道一號
• 前香港水警總部

 

 

廣東道北端位置

 

新港中心廣東道入口

 

美國Hard Rock Cafe餐廳，尖沙嘴一段

doromi

路過！