|
已經唔係第一次接到北京嘅商業調查訪問電話，由於長期對自己嘅暗示，呢次接到電話，好本能咁用粵語答問。
電話號碼係0316.......，我搦起電話，對方用北話問我「是不是家庭電話」，我用粵語答係啊，重估姖會唔識聽，不過姖好老定，繼續用北語問問題。
姖話呢個唔係商業推銷，祇係訪問性質。
我真係唔想嘥時間，於是，我繼續用粵語表示，我唔得閑，重復咗幾次。
姖就問我屋企係咪冇20-30歲左右嘅後生喺處，我急於收線，就話係啊係啊。
事件總結：
如果大家有心保護粵語，保護我地使用母語嘅權利，可以盡量喺一啲商業領域、私人領域使用粵語，你就佢，佢就覺得係應分嘅，會更加蔑視粵語、無視我地使用母語嘅權利，所以我地應該主動伸張。
1.堅持使用粵語嘅前提係一啲非必要交流嘅情況下，例如當你係消費者或潛在消費者，當然如果你有求於人或出於交流目的嘅，另當別論，我個人會視乎情況考慮主動使用北語；
2.呢個訪問中，對方似乎認為我係一個上咗年紀嘅廣州人，所以強調咗嗰個問題一次先肯收線，其實下次我諗我會繼續用粵語接受訪問落去，等北方人知道：係吖，我係後生，我受過北方話教育，但我有權亦都有心要講母語。今次冇料到（BTW,「無」「冇」區分重係好必要嘅，粵語字按讀音--即便係異讀--嚟用一啲有別於本字嘅俗字，可以節省接受資訊嘅時間成本，祇要嗰個俗字大致上符合六合原則，對粵語字使用產生穩定作用--即不會亂用同音字--即可，如果我呢度用「無料到」，就可以理解成另一個意思嘞，徒增理解成本）對方面對會咁淡定，唔夠冷靜，講完幾句粵語就收工。
3.希望有其他廣東嘅網友有機會盡量堅持使用粵語，例如接到呢啲電話，不妨同姖做完個訪問佢，好耐之前其實我都做過，真係幾分鐘就撹掂。
4.希望大家「勿以善小而不為」，唔好咁犬儒覺得做乜都冇用，首先我地要有信念，然后要有行動（哪怕再小、再細微嘅行動），相信集腋成裘，再巨大嘅變化都要由最微小嘅行為去開始。
5.呢啲都算係「非暴力不合作運動」嘅蚊型級別，如果各位網友有其他更好嘅計仔，請不吝指教同分享。
[ 本帖最後由 Jake_ct 於 2009-6-7 11:37 編輯 ] | 
發表於 2009-6-7 11:08:35
發表於 2009-6-7 17:28:11
