|
前面所講嘅牽涉到「 1)語言表述嘅精確度 2）文字嘅嘅難易程度」 兩個話題，不可混為一談。
1）語言表述嘅精確度：雖然身為漢人，而英文只系外語，但有時將同一份契約嘅中英文版對照，的確覺得英文好多地方比中文嘅表述要清晰一些。但呢個系關乎到兩種語言嘅本質特性唔同，抑或講，系兩種思維同表述方式嘅差異，而同使用漢字還系拼音字母并無實質關係。英文表述比較嚴密，系因為佢嘅文法使然，比如單雙數、主賓格、時態以及句子結構等等，而唔系單單因為英文系拼音文字。換句話講，即使將一份中文契約上嘅漢字全部換成拼音文字，「英文表述比中文清晰」呢個事實仲系冇辦法可以改變得到。
如果我哋一定要學到好似英文咁清晰，噉有乜嘢辦法？有，呢個辦法就系直程忘記曬漢語，將英文作為自己嘅母語。當然，最好將自己都變成埋紅須綠眼。
查實，表述嘅精確，系相對而言嘅。你哋成日話用中文寫公文畀人捉字虱畀人玩文字遊戲，噉你哋又知唔知其實用英文寫嘅東東，比如信用證，一樣會出現噉嘅情況？你哋知唔知用漢語表述比如家族同親戚關係會好清晰，而用英文表述就要畫埋圖先能夠講得清楚？
2）文字嘅難易程度：就文字而言，學習、寫字、打字，英文都相對比漢字方便容易。呢個系好多國家嘅文字都走拼音化道路嘅理由同藉口。好多原來屬於漢字圈嘅亞洲國家，都走咗摒棄漢字而創造自己拼音文字嘅道路，比如越南全部拉丁化；日本創造咗假名；韓國亦創造咗訓音文字。但系佢哋噉樣做，首先系因為政治上嘅需要。可以查究一下，佢哋自己創造嘅呢啲文字，系咪真系比漢字好用呢？日文一直都堅持保留使用好多漢字，因為如果將日文裏面嘅漢字全部變曬假名嘅話，啲嘎仔一定會睇得好辛苦。至於韓國字，其實亦好麻煩，好多時要依靠上下文嘅語境先能夠區分出詞義。礙於民族自尊心同面子，佢哋肯定系唔肯轉用返漢字，但系對於老一輩人嚟講，漢字嘅優勢同魅力，佢哋一定無法忘懷。新一代韓國佬就冇乜發言權，因為佢哋冇學識漢字，冇辦法對比。直至今日，喺韓國，關於是否恢復在部份場合使用返部份漢字嘅爭議，時有發生。
我個人認為，對於多音節嘅語言嚟講，（比如英文，「good」系一個音節，「interesting」就系三個音節），因為音節有多有少，噉用拼音嚟記錄就比較適合；而對於漢語呢種單音節語言，拼音化反而未必系好嘅選擇。比如普通話嘅「師、失、屍、獅、詩、虱、施、濕、釃……」等等，全部都用shi-嚟表示嗎？粵語嘅「圖、桃、逃、陶、濤、掏、淘、萄、洮、啕、徒、涂、途、屠、塗……」等等，全部都用tou4嚟表示嗎？寫就當然方便了，但系使用方便咩？
漢字的確比較難學（香港人話齋，好似搭棚噉），使用上的確冇拉丁文咁方便，但系凡事有長短，漢字亦系有拉丁文無可比擬嘅地方。電腦軟件嘅發展，已經大大減少咗漢字嘅難度障礙。喺越來越崇尚個性化嘅今天，你哋唔覺得漢字作為世界上唯一還在使用嘅象形文字，系非常有個性化嘅咩？韓國佬口口聲聲話我哋漢字落後（亦可能人家根本冇講過，只不過系我哋啲人缺乏自信心或出於奴性心態而強加於人），但系諗諗假如漢字系屬於韓國嘅話~……你哋估下會出現乜嘢情況呢？
[ 本帖最後由 六叔 於 2009-6-20 17:32 編輯 ] | 
發表於 2009-6-6 14:26:04
