|
「粤塔」系人地畀本人个花名简称，全称系「粤语taap lei baan」咁解，以下簡稱「粵塔」。
日前粵塔有幸畀人邀请出席某正苦部門主辦嘅「廉政文化企業簽約儀式暨聯歡會」，於是，畀我地公司個法人代表「攜同」咗我準時出席該聯歡會。入到去，就有人招呼我地公司法人代表，我呢，要自己招呼自己，響後排搵個位就座。
坐低之後望下個環境，呢個系舞臺仔：
每位與台者，「小會」都送上一個環保袋，內裏裝住：一支水，一個噪音發生器，一把遮（傘）。
支水我就知道系畀我飲嘅，個噪音發生器我正好用來遮住面部，防止D防不勝防嘅攝影機令到本人「春光乍泄」之用，之但系果把遮。。。我到衣家都諗唔明「小會」點解要送畀我！
好喇，無幾耐，「領導S」到場了，「小會」主持就對住大家講：我地用掌聲歡迎各位領導好不好呀？於是。。。「噪音發生器」第一次集體使用。我響處搖下個頭，咩點解D公仆位臨，D主人要拍手掌嘅？另外，你叫我拍手，你都要叫得有技術含量一D丫系嘛，家下咩時世呀？乜連「現在有請各位領導到前排就坐」呢D客氣說話都唔識講咩？算，唔識講，我唔理你。
「小會」終於開始，我留意嘅系一左一右有兩台大槍：好有現場直播個feel：
呢個會系旨在某局同企業之間建立廉政關係而簽約嘅一個儀式，也即系某局與企業互定一個協議：你不要賄賂我，我也不要接受你嘅賄賂之類。一輪致詞之後、簽約儀式，之後就系局企聯歡喇：下圖系某企業出演嘅舞蹈，《好運來》：
呢個節目無礙乎系一邊播住「好運來」呢首普通話歌，一邊由D演員舞動一下四肢，毫無可觀性。如果在場嘅邊位飽食過度，想排空一D胃空間、減輕少少胃負擔嘅，睇睇無妨。
第二個節目系，由某局D「員工」演出嘅快朗读：《中國話》有節目單（部分）為證：
拿拿拿，呢個節目主要系講，中國由呢樣話果樣話，做中國人，就要講「中國話」！
呢個作者水平高呀~~識得使用「中國話」呢個高難度嘅概念，粵塔馬上覺得自愧不如自愧不如。
普通話歌：《歡樂中國年》，主旋律呀~~
舞蹈：《茉莉花》（呢个版本嘅茉莉花系：「好一朵茉莉花 好一朵茉莉花。。。。
我有心采一朵戴，又怕旁人笑话，又怕来年不发芽」 AH，呢個節目我鍾意呀，佢將後現代對物質無限追求嘅思潮，以及對殺雞取卵嘅懼畏而複雜矛盾心理完全表露無遺，極具警世嘅意義。戲肉來呀，戲肉來呀！ ）
小品：《發票風波》：呢個小品系講，兩個操白話嘅人，一個系老闆，一個系工仔，個老闆一副急功近利、又無知弱智嘅形象，因為生意需要急用發票，但又因為稅法知識缺乏，所以搞到自己無發票，使自己生意陷入被動嘅狀態，響處拿手唔成勢、紮紮跳之際，佢個工仔就想辦法幫佢賄賂稅局工作人員，而操著純正普通話、語正詞嚴、廉潔奉公嘅稅局工作人員堅決咁拒絕咗呢D賄賂，並幫助小老闆成功辦理有關稅務事項，得到小老闆嘅無限感激咁話。
期間個肥老闆同稅局工作人員嘅對話系，稅局工作人員操純正普通話，而老闆則操極之不鹹不淡嘅普通話。
我真系嬲呀！
接下來系獨唱：《懷念大草原》
呢位哥哥自稱來自大草原。喂喂，阿哥哥，你可以來廣東兜售羊肉、羊皮、甚至系羊奶都得，但系你使唔使搞到自己思鄉病發咁鬱悶呀？
全個聯歡會，除咗個小品醜化廣東人之外，無一個節目系同粵文化粘得上邊嘅。
[ 本帖最後由 柳寻风 於 2009-4-29 23:19 編輯 ] | 
發表於 2009-4-28 00:17:33
