|
由於北角英皇道某一間老牌大戲院租約嘅問題，激發一小部分人對於粵劇保育問題嘅關注。粵劇自然係中國文化寶貴嘅遺產，但係無可否認，近年來，香港下一代對粵劇嘅認識、同埋感情已經越嚟越淡薄。
第一，粵劇裏面嘅大戲都係關於《六國大封相》、《紫釵記》、《再世紅梅記》呢一類隋唐、或者宋朝、明朝末代呢啲歷史嘅情節。香港下一代打機、睇開荷李活嘅《魔盜王》、同埋《蝙蝠俠》，對於中國嘅宮廷歷史同埋民間故事早已經失去興趣，覺得係另一個世界嘅趣味，粵劇本身嘅情節、人物，對於香港年輕人已經好似火星一樣距離咁遙遠，慢慢就流於上一代，阿爺阿嬤嘅欣賞項目，你話有乜法子唔打上與時代脫節嘅標籤呢？
另一方面，你叫下一代對粵劇產生興趣，咁香港特區政府嘅教育政策裏面又有無粵劇欣賞、粵劇曲詞寫作，呢一科通識教育呢？如果無，咁又點可以空口奢言話要將粵劇登記為聯合國文化遺產，同埋喺香港打造呢個粵劇觀眾嘅下一代呢？將來西九呢個巨大項目落成之後，裏面好多人認為應該留番一部分係作為粵劇表演嘅場所，但係當粵劇隨住年代嘅遷移慢慢失去下一代觀眾嘅時候，係咪慢慢粵劇亦都變咗好似甘棠第呢一座古老大屋一樣，變咗一堆化石呢？
更重要嘅係中國中央政府喺全國推行所謂嘅普通話，對於地方方言有意排擠，同埋邊緣化；粵劇本身係用廣東話唱，喺今日推行普通話教學越嚟越凌厲嘅壓力之下，粵劇呢樣嘢到底是否政治正確都好成為問題，粵劇保育真係談何容易。雖然有好多有心人就八方奔走，但係一個對於文化、傳統、歷史無乜修養同埋認識嘅特區政府，你叫佢保養粵劇，無疑係有少少老鼠拉龜，兼緣木求魚。粵劇嘅品牌效應遠遠未能建立，相反只係令年輕人覺得只不過係窩喺廟街嘅一啲曲藝劇社嗰度，食完飯，一班師奶、阿婆聚頭唱兩嘴嘅一啲聯誼場所，保衛粵劇或者保障粵劇呢個傳統，似乎喺可見嘅將來都係會淪為一句空談嘅口號。
| 
發表於 2009-1-25 14:14:29
發表於 2009-1-25 19:04:05
