|
電影《酒杯人生》（《Sideways》，港譯《酒佬日記》），以前喺明珠台睇過些少，覺得劇情幾有趣，於是下載落嚟睇。
我成日都覺得，影視作品同文學作品係通嘅。文學作品中嘅表現手法，例如側面烘托、伏筆、夸張等，電影中都會運用到。所以一個地方嘅影視作品往往可以反映到嗰個地方嘅人嘅文學修養。試舉本地劇《外來媳婦本地郎》為例，以按摩作比喻，有水準嘅師傅按你邊道你就邊道舒服，毋需多講，而此劇畀人嘅感覺就會係一個初哥之中嘅初哥，一便捽一便問你「舒唔舒服？舒唔舒服？舒唔舒服？」問到你嗌為止。一個本來已經唔好笑嘅笑位，慌死觀眾唔知，猛咁圍住嚟攻，徹底教人無趣收場。須知拍笑劇又好，悲劇又好，要留返啲思考嘅空間畀觀眾，觀眾先會覺得有趣。切忌當觀眾係弱智仔。
睇吓《酒杯人生》係點處理笑位嘅。男主角帶好朋友去品嘗葡萄酒。好嘅葡萄酒係要點品嘗嘅呢？首先，舉起酒杯，檢視酒嘅顏色、純度，嚟一個大概了解；然后，將酒杯傾側，睇吓杯口位酒嘅色水，由此可以知道酒嘅年份；跟住嘞，再將成個鼻哥哄（hung6）埋去個杯裡面。男主角聞倒咩味道呢？橘子，士多啤梨，百香果，重有好淡嘅蘆筍味。而佢朋友凈係聞倒士多啤梨。最后，再將酒杯係咁浪係咁long2（口+浪）勻，等啲酒可以氧化，令酒氣完全揮發出嚟，聞一聞，則可舉杯飲盡？——未得住，男主角細細咁呷咗一啖，而佢朋友則一飲而盡！呢道就係細節位嘞。識睇嘅觀眾都會為佢朋友嘅粗魯發出會心嘅微笑，毋需你編劇、導演叫個男主角嘈嘈吵吵投訴一番觀眾先明，可惜，多數嘅本地劇如果齣現咁嘅情節，一定唔會放過糟蹋嘅機會，佢地硬係誤會，攪笑就事必濃墨重彩，唔識得留白。未完喎，男主角重要喺個口處long2吓long2吓啲酒，long2完一輪，dep（唔識寫呢個字）真啲味先吞，重未完，最后作齣評價，佢飲得齣啲酒係近期產嘅。佢朋友就贊佢啦，話佢可以喺酒廠做嘢嘞，佢答佢朋友話嘅時候望過去，赫然發現佢朋友噍（ziu6）緊香口膠！——電影中，佢朋友嘅表情一直係嚴肅、認真嘅，令你以為佢真係好認真咁學緊——我認為，呢個就係呢一段戲嘅笑位，當然，你有權唔笑。除男主角一句「Are you chewing gum?」，電影不作任何處理就直接跳落下段，留返畀觀眾諗。
雖然《酒杯人生》唔算係一部攪笑片，但我諗返起《宋飛正傳》呢齣情景喜劇，佢好多攪笑位一樣留白。周星馳嘅戲夠夸張嘞啩？一樣會留白。
例如《國產零零柒》，達文西問零零柒，「阿柒，呢十年嚟你一直做豬肉佬吖？」
「應該話係一個唏噓嘅豬肉佬。」阿柒回答。
「我何嘗唔係一個坎坷嘅白菜仔呢？好彩有份兼職！喺中央精神病研究所做研究工作。」達文西講。
「負責做啲咩啊？」旁邊嘅奸角問。
「畀人研究！」達文西自豪咁回答。
奸角與零零柒一同沉默，然后奸角回答：「不錯」。
先用沉默處理，顯示齣達文西嘅回答令人覺得佢荒謬到令人無話可說，再用一個「不錯」嚟回答，擺明敷衍達文西，當佢傻仔！成功咁用劇中人物嘅表現烘托齣達文西嘅戇居。要信觀眾，觀眾係識笑嘅。畀個水皮嘅編劇再加啲對白，或再故作夸張，咁就冇嗮癮嘞！其實呢啲，正係文學嘅效果。
有文學根基嘅大眾先會齣倒有水平嘅電影。觀眾水皮，就唔好怪編劇敷衍了事。另一方面，編劇又咪係嚟自大眾！雖則文學同編劇無必然關係。但文學就係人學，通過學習文學可以訓練一個人人性方面嘅敏感度，惟其如此，寫出嚟嘅劇本先會觸動人心。特效、綽頭可以為電影增加一啲點綴同賣點，睇得多難保唔會厭，但人性嘅刻畫先屬永恒嘅主題，寫齣精彩人性嘅電影，再加上特效，先有魅力同感染力。由文學作品改編作電影而大獲成功嘅例子，比比皆是，原因即在此。
市道唔好，啲人鐘意睇翻版，係咪就一定拍唔齣好電影呢？其實唔係嘅。如果你話係，咁即係默認咗電影根本係靠錢堆砌齣嚟噶嗻。香港經濟差都唔係差到個個要揸兜乞食，我唔會認同電影係絕對依附經濟環境，物質決定精神根本就係狗屁不如嘅理論。電影係一種精神文化產物，電影拍得好就唔可以刺激經濟嘅嘞咩？唔可以成為一個支柱產業嘞咩？經濟嘅蓬勃并非單靠物質生產嘅積累，精神消費品都起住重要作用。財富嘅本質在於創新，而非簡單嘅復制。香港電影發展到今時今日咁，祇能夠講係成個粵語文化內勁不足，整個粵語文化片區都曾經沉醉同滿足於無厘頭文化暫時嘅輝煌。無厘頭就係一種解構，對主流、傳統價值觀嘅反動，喺冇真正信仰嘅地區同假大空價值觀流行嘅地區特別受歡迎，所以周星馳嘅電影唔單止係喺粵語文化片區流行。但當所有有象征傳統同主流嘅文本都消解過後，呢種文化重有咩齣路呢？「卑鄙者」依舊以「卑鄙」作為通行证大行其道。「高尚者」嘅「墓志铭」依舊僅剩「高尚」。大陸依舊係大陸，香港則變得更加唔似香港。北方人嘅文化除去解構，起碼重有其他「主義」喺狹縫中艱難求存。粵語文化片區特別係大陸境內，價值廢墟過后迎嚟嘅唔係啟蒙，而係更加狡詐更加犬儒嘅社會。本地嘅娛樂文化依舊手淫無厘頭，無奈技術拙劣，連消解嘅快感都冇！祇有弱智！
人性嘅關懷喺邊呢？點樣重建人性呢？點樣復興粵語文化呢？一切嘅答案就喺我地嘅文學嗰道。路上本沒有路，祇是走的人多了，也便成了路。話雖如此，有冇人去行，可能真係要睇個天嘞。
[ 本帖最後由 Jake_ct 於 2009-1-17 12:42 編輯 ] | 
發表於 2009-1-17 12:38:20