|
「請問這句話用粵語怎么說：協會內壹小cyut3同志受到極左思潮影響，已經失控，但這些人終究不肯承認自己是左派。」——發帖者：蒸松糕。
「等我嚟教你啦！應該噉講：聯盟裏面一尐基佬受西方自由意識感化，經已癲咗，不過爾尐人依然唔肯出櫃。」——回帖者：豬油糕。
……
以上內容雖然有啲夸張，但絕對可以代表某論壇而家嘅一種趨勢。如果寫落去，完全可以寫到好似巖井俊二嘅「關于莉莉周的一切」噉，但我無意得罪嗰啲問問題同答問題嘅人兄，所以就此打住。不過對此現象，我仍然無法釋懷。
其實每一種方言都有其獨特嘅魅力，任何一種方言都總有一啲其它方言冇辦法替代嘅詞彙，盲目噉去翻譯，可能終有一日造成以上鬧劇，因此我唔建議大家太過執著噉去翻譯。記得有好多貼都係分得好清，呢樣嘢普語點講，粵語點講。我認為噉做過于唯心，因為好多嘢，原產地并唔係廣東，有個外省嘅名係好正常，例如我哋熟知嘅小食「云吞」係源于北方嘅「餛飩」，「燒賣」源于「稍麥」，「油炸鬼」源于「油炸檜」等等，衹係呢啲嘢傳入廣東之后，經過好多改良噉解。
曾經有個外地朋友問我，「找打」粵語點講。但一時之間我真係諗唔到粵語裏面有一個詞可以完全替代「找打」嘅意境，諗咗一陣，終于諗到兩個類似嘅講法：「想死吖」、「你五行欠炳」，但都好似有啲累贅，冇咁簡潔，反而客家話有個兩個字嘅詞，可以相當絕妙噉替代「找打」，如果大家有啲朋友係客家人，不妨請教，呢度我就唔獻丑喇。
喺學術上，如果過于偏執，從嚟都唔係好事，因為你會就噉失去好多接受新事物嘅機會。粵語之所以咁生鬼，唔係因為佢自成一格，係因為佢肯包容新事物，所以我認同香港人喺呢方面嘅貢獻。我係個實在嘅人，去到香港，我承認自己係大陸人，去到上海，我承認自己係鄉下佬。
我噉并唔係長他人志氣，滅自己威風。不過事實就係噉，一味拗邊種講法正統，唔係就如柏楊所講「窩里斗」嘅表現咩？
編者注：
出櫃——come out of the closet
指男性（後來也指女性）暴露同志身份，或公開承認自己的性取向的同性戀或雙性戀。還有一種說法就是指一個大家不知道他是同志的人進入同志圈子，或者和同性發生關係，這種就是出櫃。簡單來說出櫃就是承認自己的性取向不同。
偏執——paronoid
指病態的自我援引性優勢觀念或妄想，常見的是關於被害、愛、恨、嫉妒、榮譽、訴訟、誇大和超自然力的妄想。這樣的觀念或妄想可與器質性精神病（organic psychosis）、中毒（intoxication；poisoning）、分裂症（schizophrenia）有關，或是對應激的反應，還可以是一種人格障礙（personality disorders）。
多謝嗰啲喺金融海嘯下重肯慷慨解囊嘅朋友，我唔係想賺你哋嘅粵幣，衹因人多口雜，無謂張揚。不過如果唔啱聽或唔啱睇，我係唔會回水嘅。
[ 本帖最後由 gboss 於 2008-12-26 11:14 編輯 ] | 
發表於 2008-12-26 10:39:45
發表於 2008-12-29 21:04:20