【原创】《荒诞都市》系列——炒工仔（粤语版）

gzshuzha

【原创】《荒诞都市》系列——炒工仔（粤语版）
（作者：阿展）

（本系列故事纯属虚构，如有雷同，实属不幸。）

   阿嫦响步行街个体商场有个档口仔，卖啲朱义盛金银首饰。请咗个工仔睇档，自己就瞓到好晏先起身，出去档口打个白鸽转，然后再去附近酒楼饮晏茶，好他条。
   有朝早，阿嫦个街坊经过档口，见阿嫦自己睇番档，就问：「个工仔返咗乡下咩？」
   「唔系呀。」阿嫦指下啱啱贴上去张招工纸，话：「畀我炒鬼咗啦。」
   「你个工仔几勤力格，呢排生意唔好咩？」问。
   「唔系。」答。
   「咁，唔通个工仔穿柜桶底？唔似吖，个人睇落几老实格。」继续问。
   「如果系手脚唔好，我报警啦咗佢啦。」答。
   「咁为乜树嗟？」又问。
   「唔讲尤自可，讲起把几火。」答。
   「讲嚟听下。」街坊真系几八卦。
   「人哋话番畀我听：琴日有两个鬼佬嚟买嘢，点知佢唔识听人哋讲乜，卒之鬼佬行咗过隔离买，搞到见财化水。你话嬲唔嬲吖？」阿嫦啖气仲未下。
   「工仔唔识英文好平常嗟，唔系咁都要炒啩？」街坊讲句公道话。
   「鬼佬讲英文，佢唔识听我唔怪得佢，最激气系个鬼佬讲广州话佢都唔识听吖嘛！」阿嫦话。
   街坊忽然醒起，佢个工仔系外省人。再望下张招工纸后面有一句：「不懂粤语免问。」
   
   
  

外外星人

唔讲犹自可，一讲就游沙河。

普君南拆遷居民

「鬼佬讲英文，佢唔识听我唔怪得佢，最激气系个鬼佬讲广州话佢都唔识听吖嘛！」阿嫦话。

 

呢句係成篇嘢嘅精華。