找回密碼
 註冊

QQ登錄

只需一步,快速開始

搜索
熱搜: 活動 交友 discuz
查看: 4988|回復: 6

[掌故傳聞] 高第街,廣州

[複製鏈接]
發表於 2008-10-15 21:04:33 | 顯示全部樓層 |閱讀模式

     高第街,位於廣州市越秀區內,鄰近北京路&海珠廣場。而家嘅高第街,喺一條專賣底衫褲、睡衣、襪,嘅批發商業街。喺一條咁嘅商業街內,有好多巷仔,例如,玉帶濠,積銀巷……。而素波巷內,可以搵到學校---廣州市第十中學,而由10中行出去,可以搵到「維新橫巷」..維新路冇咗,好在重有個維新橫巷;更加可以搵到許氏家族嘅蹤影--許地。

 

高第街名稱嘅由來


       舊時,有一條街度住住一位財主,佢以「善人」自稱,日日都煲一大鑊粥,攞出門口,分畀啲乞兒食。負責分粥嗰個妹仔叫做阿香。啲乞兒見到阿香年輕貌美,就乘機搏懵,搞到阿香縮都縮唔切,分又唔係,唔分又唔係。有個後生尐嘅乞兒叫高弟,睇唔過眼,就鬧其他乞兒:「人哋好心分啲粥畀我哋,你哋重咁做,實在太過分,太無品喇,等我嚟分。」講完,就幫咗阿香分粥畀啲乞兒。阿香好感激佢,以後就等高弟幫佢分粥畀啲乞兒。


       阿香見高弟雖然係瘦咗尐,但係都幾靚仔,而且又有正義感喎,於是乎就慢慢鍾意咗高弟,成日靜雞雞將啲好食嘢塞畀高弟。點知畀其他乞兒發現咗呢單嘢,就恥笑佢,話佢係「高弟妻」。好衰唔衰,呢件事畀財主佬聽到咗,財主好嬲,話阿香敗壞門風,監生打瓜咗阿香。財主嘅阿媽知道咗,諗住嚟阻止,點知都已經太遲。因為阿香平時服侍得佢好好,佢都好惜阿香,所以佢就將自己嘅一對金耳環偷偷哋放喺阿香身上,當陪葬品。


       仵作抬住阿香嘅棺材到咗下塘山頭,啱啱掘咗幾下啫,就烏雲密布喇,就嚟落狗屎,個仵作好唔負責任咁即刻抌低個鋤頭,擗低阿香,嗱嗱聲跑落山避雨兼返屋企食飯算數,由阿香副棺材喺山上風吹雨打....
 高弟知道阿香死咗,好鬼傷心,:「阿香係因為我先至會畀人打死嘅,我要送佢最後一程!」於是乎,佢跑去下塘山頭,嗰時已經落緊狗屎,高弟都唔理三七廿一喇,一見到副棺材就衝埋去,跪喺塊地度,喊住咁講:「阿香,對唔住,係我連累咗你..」突然間,聽到棺材入面好似有尐聲,「唔通係阿香尸變?!唔會嘅,一定係阿香未死..!!」佢即刻攞起啱先仵作佬抌低嘅鋤頭,將個蓋撬開,扶起阿香。原來,阿香真係未死,休克啫。阿香見到呢個時候嘅高弟,同埋周圍咁嘅環境,就知道發生咗咩嘢事喇,好感動,喊住咁講「高弟,我家陣無家可歸喇,不如,我哋一齊生活喇。」點知高弟撒手兼令頭,話:「唔得架...我係乞兒嚟架咋..照顧自己都有問題..點可以畀到幸福你喎..再加上..我乜都冇..得個乞兒竇..你住唔慣架..」「唔驚喇,我捱慣苦架!」阿香話,呢個時候,佢覺得心口好似有嘢eng住,佢摸摸下,發現有對金耳環,佢估到係財主阿媽畀佢嘅陪葬品,佢對高弟話:「高弟,不如我哋攞佢嚟做本錢,做啲生意仔,我哋有粥食粥,有飯食飯!」高弟畀佢嘅真誠感動咗..跟住孭咗阿香落山。


       佢哋兩個成親之後,開咗個檔攤仔,生意重好好添,後來變埋富豪。嗰個財主死咗之後,家道中落,高弟就買咗佢間大屋,而且喺呢條街度買咗好多屋,分畀啲冇屋嘅窮人住。後來啲人為咗紀念佢,就將呢條街嘅名改咗做高弟街。

 

       重有一個傳說就係,有個秀才經過此處,覺得「高弟」好俗,改為「高第」。

 

 

高第街內--許地,廣州第一家族。


       許地係許氏族人聚居嘅地方,自從19世紀初許拜庭喺呢度定居之後,兩百年嚟許氏家族名人輩出。魯迅先生嘅太太--作家許廣平女士,粵軍總司令許崇智,同埋紅軍將領許卓,重有,許祥光,許炳榛..所以,有「近代廣州第一家族」之稱。但係呢啲輝煌,查實已經慢慢咁淹沒喺呢條繁華嘅商業街之內....

 

 

 

  

 (ps:呢篇嘢係之前見到許地搞成咁,有感而發寫嘅,不過冇影相,所以,圖片係search返嚟..)

 

       講起許廣平,講起魯迅,令我諗起之前睇過關於魯迅對廣東話嘅一段..
《在鐘樓上(夜記之二)》
「這兩句有時也有用。那是我已經搬在白云路寓屋里的時候了,有一天,巡警捉住了一個竊取電燈的偷儿,那管屋的陳公便跟著一面罵,一面打。罵了一大套,而我從中只听懂了這兩句。然而似乎已經全懂得,心里想:「他所說的,大約是因為屋外的電燈几乎Hanbaran被他偷去,所以要Tiu-na-ma了。」于是就仿佛解決了一件大問題似的,即刻安心歸坐,自去再編我的《唐宋傳奇集》。 」

[ 本帖最後由 思覺失調 於 2008-10-15 21:08 編輯 ]
發表於 2008-10-15 21:19:23 | 顯示全部樓層
破落到令人不敢回憶  曾經嘅風光
發表於 2008-10-16 08:27:49 | 顯示全部樓層
楼主辛苦晒!
發表於 2008-10-18 21:05:30 | 顯示全部樓層
不過阿香個傳説好明顯係流
 樓主| 發表於 2008-10-18 21:33:26 | 顯示全部樓層

原帖由 南汉 於 2008-10-18 21:05 發表 不過阿香個傳説好明顯係流

 

顏志圖講嘅,流唔流我無從考究..聽係咁聽囉.

發表於 2008-10-18 21:49:55 | 顯示全部樓層

原帖由 南汉 於 2008-10-18 21:05 發表 不過阿香個傳説好明顯係流

何以见得?

發表於 2008-11-3 18:18:07 | 顯示全部樓層

「啲乞兒見到阿香年輕貌美,就乘機搏懵,搞到阿香縮都縮唔切,分又唔係,唔分又唔係。」

 

啲乞兒都幾狼死~~~

 

 

您需要登錄後才可以回帖 登錄 | 註冊

本版積分規則

Archiver|手機版|粵語協會

GMT+8, 2024-5-25 05:49 , Processed in 0.069175 second(s), 20 queries .

Powered by Discuz! X3.5 Licensed

© 2001-2024 Discuz! Team.

快速回復 返回頂部 返回列表