【原创】《荒诞都市》系列--柜员机陷阱（粤语版）

gzshuzha

【原创】《荒诞都市》系列--柜员机陷阱（粤语版）
（作者：阿展）

（本系列故事纯属虚构，如有雷同，实属不幸。）

    「死啦，死啦！」
    一个男人揸住一叠一百蚊纸，成头大汗咁冲入银行，一边话死啦一边要揾银行经理。
    保安拦住佢，带咗佢去经理室，经理叫佢坐低慢慢讲。
    「你哋部机器又坏咗啦，唔关我事嘎，我响你哋外面部柜员机攞1000蚊，点知出咗十一张100蚊纸，我数咗好多次，都系十一张，我依家就退返呢100蚊，你哋唔，唔，唔好...报，报警得唔得呀？」男人仲系有啲惊慌。
    「唔会啩，台机啱啱先整好咋啵，唔通又坏咗？」经理话。
    「咁你哋关咗台机先啦，唔系损失好大嘎。」男人仲系好担心。「你拉我邓，依家边个敢郁银行啲钱呀，唔怕坐监咩？你张卡呢，畀我睇下。」经理话。
     经理响自己部电脑查咗男人个卡，又将佢递过嚟啲钱数咗好多次，就对佢话：「冇错，你个账户确系显示你啱啱净系提咗1000蚊嗟，你呢度系十一张100蚊纸，你主动退返100蚊畀银行，我哋决定唔报警。」
     「不过，唔好意思，」经理跟住话：「你呢十一张一百蚊纸入面有一张系假嘅，按照规定我哋要没收，扣返你退嗰100蚊，你可以攞返900蚊，你如果唔同意，我哋就报警处理。」

gboss

睇咗幾篇你嘅原創，再睇埋回帖嘅情況，不禁心有感觸，呢度好多人都衹係鍾意去回嗰啲撩交嗌嘅「月經帖」，卻對原創漠不關心，就算睇完，都懶得回帖。所以我成日覺得中國係個唔尊重原創嘅國家，大家都知咖啦，連大公司都係用翻版軟件，何況小市民。

gzshuzha

原帖由 gboss 於 2008-10-17 09:38 發表 睇咗幾篇你嘅原創，再睇埋回帖嘅情況，不禁心有感觸，呢度好多人都衹係鍾意去回嗰啲撩交嗌嘅「月經帖」，卻對原創漠不關心，就算睇完，都懶得回帖。所以我成日覺得中國係個唔尊重原創嘅國家，大家都知咖啦，連大公司都係用翻版軟件，何 ...

   原创作品响网络论坛受关注嘅程度往往唔及一啲毫无意义嘅争拗贴，好快就沉，呢种现象令作者感到泄气。
   其实呢种现象唔系呢度特有，好多论坛都系咁。起码有两个原因：第一，网络原创作品唔使审阅，随意发表，质素参次不齐，鲜有精彩之作。第二，网友通常认为网络原创唔慌有好嘢。仲有就系作者通常期待值太高，时有落差。会感到受到冷漠对待。
   其实呢个系网络论坛本身性质决定嘅，大多数人嚟论坛目的唔系想同人讨论问题，求得答案，而系睇啱呢度系一块发泄自己情绪嘅地方，佢哋唔介意呢度有狗屎垃圾，乱拍砖，唔负责，只有虚拟世界先得。
   有啲似卡拉OK，人人净系留意几时轮到自己唱首饮歌，冇人会记得阿边个边个唱成点。
   俗语话「脸系人哋畀嘅。」原创作品有人肯睇，已经好畀脸，肯回帖，无论赞定系弹，直情就系塞钱落你袋。抚心自问，有几何会认真睇过人哋啲原创？又试过回帖未呢？
   日后呢个系列故事如果会越写越多，绝对系有睇过，特别系有回过贴嘅网友鼓励嘅结果。我会畀啲心机写落去，多谢大家！
[ 本帖最後由 gzshuzha 於 2008-10-17 12:01 編輯 ]

外外星人

唔使咁灰心，我有睇嘅。 之不过噉，评论第啲人嘅作品，唔系咁易落笔，故此，都系睇过就算嘞。

highyun

阿展嘅《荒誕都市》我每期都有睇，每期都有gag位，而且又唔會太長，適合鍾意食快餐嘅人。

回帖數未必可以說明問題，有啲人可能睇咗唔回帖嘅，但點擊數就絕對說明問題，我睇過呢幾篇原創嘅點擊數，都係偏少。可能而家信息爆炸，身邊太多娛樂，太多嘢睇，啲人連睇一篇咁短嘅原創嘅耐心都冇。

遲啲我會將我用另一個id寫嘅另類原創擺埋上嚟，有人陪會有動力好多嘅。

gboss

原帖由 highyun 於 2008-10-17 12:46 發表 阿展嘅《荒誕都市》我每期都有睇，每期都有gag位，而且又唔會太長，適合鍾意食快餐嘅人。回帖數未必可以說明問題，有啲人可能睇咗唔回帖嘅，但點擊數就絕對說明問題，我睇過呢幾篇原創嘅點擊數，都係偏少。可能而家信息爆炸，身邊太 ...

 

另類我都有好多 ，不過……我貌似冇寫過唔另類嘅。