【原创】读报拾遗

gzshuzha

【原创】读报拾遗

 

  晚报有个好精彩嘅专题《广州外乡人》，逢周五刊出，每期我都仔细阅读，「汁都捞埋」。今期讲嘅系山西人。其中有段系咁写嘅：「吃醋还是喝醋？这在普通话里有着严格的区别。喝醋，指的是饮用醋饮料；吃醋，是指一种不太健康的心理反应。不过，广州人恰好相反，粤语「喝醋」说的是心理反应，「饮醋」才是享有美味的过程。对于各种「醋意」，初来乍到者，不可不知啊。」

  我怀疑依度讲嘅粤语「喝醋」，可能是「呷醋」嘅笔误。「呷」本意系细啖咁饮，（小口地喝）并非粤语专用。《水浒传》中就有宋江同戴宗、李逵食饭，「自也吃了些鱼,呷了几口汤汁。」嘅描述。不过，粤语中「呷醋」指嘅系一种心理活动，与饮食完全冇关。至于依种心理系唔系唔健康，就见仁见智。甚至有人讲系爱嘅另类表现添。由于系约定俗成嘅原因，粤语中醋就只能「呷」，而唔能够饮，而「呷」嘅就一定系醋，茶同汤都唔得。否则就唔系依个意思。

  虽然「呷」本意系细啖咁饮，但系响有D方言中又可以饮得好大啵。有个长沙人就曾经咁写：「长沙有呷春酒习俗。呷春酒也叫请春客，规矩是从初一开始呷到初七八，有的甚至呷到正月三十。主要是自家亲戚一家一家地请，一家一家呷，有时呷得酒醉迷糊，更多却是呷得戚友间情谊融融，大家族团团圆圆，热热闹闹。」可见依个「呷」法唔一定好斯文。

  有个成语依家已经好少用，叫做：「熬姜呷醋」，千祈唔好望文生义，同我地广州人个煲「猪脚煲姜」冇乜关系。清朝李渔《怜香伴·毡集》咁写：「下官知从选了这个穷教官，坐了这条冷板凳，终日熬姜呷醋，尚不能色问舍求田，哪里再经得进口添人。」可见依度系形容生活清苦，清茶淡饭嘅意思。

  普通话叫「吃醋」，粤语叫「呷醋」，意思差唔多，得意嘅地方就系讲嘅时候，往往中间加个「干」字会有力好多，比如会说：「好心你就咪成日呷埋晒D干醋啦。」由于系一种强烈嘅心理活动，时常就冇乜理智，捕风捉影，往往并冇事实依据下就发烂渣，所以叫「呷干醋」就真系一针见血嘞。