粵語特殊字靚唔靚呀﹖

Veronique

有啲人講粵語特殊字特別係顯示一個口嘅呢種好肉酸而且冇意思。 你哋點諗﹖有咩感覺呀﹖ 一個字要點樣就靚呀﹖

highyun

你指嘅系咪口字边嘅字？例如“嘅”“咩”“哋”“啲”？

dada

我認為符合漢字構造原則就係靚。 「唧」字從口即聲﹐從口因為係聲音。「嘅」字從口既聲﹐從口因為本義(?)係嘆息﹐我諗「你幾叻嘅」可以係呢個用法。如果係嘆息﹐就冇「的」嘅意思﹔如果有﹐都唔係直接。 漢語引申、假借係好平常嘅事。來往個「來」﹐本義係麥。《詩經》話麥喺天上落嚟﹐所以「來」就從麥變咗來往個「來」。呢個係傳說。總之﹐本義係麥嘅「來」變咗來往個「來」﹐有冇人話無釐頭﹐肉酸﹖冇。習慣成自然﹐大家認同咪得咯﹗ 所以﹐就算有啲粵語字好似真係用得唔啱, 就算有本字（例如來、嚟）﹐都唔一定要改返本字嘅。

Veronique

係。 我「指嘅系口字边嘅字」。 dada 可唔可以講多啲有關漢字美感嘅概念呀﹖ 對我嚟講係非常之怪。

highyun

其实所有汉字都有美感，不过用口字边嘅字，的确有唔少并唔系本字，而系后嚟嘅自造字，所以比起某啲更传统嘅汉字，的确系冇咁完美整体化。 我并唔系讲呢啲口字边嘅粤语字唔靓，只不过系话相比传统嘅字冇咁古典。但正因为本字已经唔用，所以我哋要大力推广呢啲字，等人哋睇惯咗，就唔会觉得佢唔靓。 此外，话呢啲字丑嘅，亦可能出自一啲仇视粤语嘅人之口。 阿丽对汉字感兴趣，可以去呢个网页，有唔少有趣嘅汉字知识： http://www.chinalane.org/listing/word.html

dada

我冇乜大理論﹐之不過認為冇理由話「唧」靚﹐「嘅」唔靚。 粵語好多從口嘅字﹐但唔係從口就唔靚。東漢《說文》有9353個字﹐其中273個從口﹐即係每卅五個字就有一個從口。 可能粵語有啲字造或借用得唔係好啱。但漢語本身就有好多假借嘅字﹔假借嘅意思係同個字義冇關係﹐不過係借佢個音。汝水係一條河﹔古時第二人稱個音係「汝」﹐古人懶另做一個字﹐就用「汝」嚟表示「你」。呢個「汝」又借用得啱唔啱呢﹖

Anl

dada講嘅嘢好中肯。 同樣係一個字，眞係冇理由話“嘅”字唔靚，“唧”字靚。靚與唔靚係同一個字嘅寫法之比。 不過另一個嘢，就係簡體字與繁體字之比，普遍都認爲繁體字比簡體美觀，呢個係字與字嘅比，係同一個字嘅比。

kitata

加口字邊，有一個好處：就係話俾人地聽呢個就係一個口語化既字。

MarkXD

唔可以話靚唔靚， 但係我以前總係覺得：邊有咁啱咁多字都係口字邊咖。 尤其係語氣助詞，好似係後嚟啲人造出嚟噉， 重有覺得用口字邊好似話咗畀人聽係口語，搞到啲人認為： 粵語 = 口語 ； 書面語 = 普通話

desmond

我覺得用「口」字邊做粵語嘅語氣詞最好不過，因為不少非粵語字嘅語氣詞或者擬聲詞都係用「口」字邊嘅，例如「嘩」、「啦」、「嗎」、「呱」。

highyun

其实唔少口字边开粤语字本身唔系口字边，例如“嘅”（忌）“噉”（恁），相当长时间以嚟，啲人已经习惯晒用口字边嘅字，反而用返“忌”“恁”呢啲字冇人会知你讲乜，所以我都系支持用后造字。

芬1012

highyun在2005-08-09 21:01:24說道：[br]其实唔少口字边开粤语字本身唔系口字边，例如“嘅”（忌）“噉”（恁），相当长时间以嚟，啲人已经习惯晒用口字边嘅字，反而用返“忌”“恁”呢啲字冇人会知你讲乜，所以我都系支持用后造字。

不过，我都係认为能够唔用“口”字边嘅字就尽量唔好用，因为“口”字边嘅字一睇就觉得唔正规嘅嘞。

desmond

唔少故有語氣詞同虛詞嘅漢字都係「口」字邊嘅，我認為「口」字嘅粵語字係符合一路以嚟嘅漢字造字原則。

highyun

芬1012在2005-08-10 04:50:25說道：[br][quote]highyun在2005-08-09 21:01:24說道：[br]其实唔少口字边开粤语字本身唔系口字边，例如“嘅”（忌）“噉”（恁），相当长时间以嚟，啲人已经习惯晒用口字边嘅字，反而用返“忌”“恁”呢啲字冇人会知你讲乜，所以我都系支持用后造字。

不过，我都係认为能够唔用“口”字边嘅字就尽量唔好用，因为“口”字边嘅字一睇就觉得唔正规嘅嘞。[/quote] 汉语本身就有好多字系口字边嘅？如果都认为唔正规而唔用嘅话，我敢保证所有文学作品都会失色。

Anl

我覺得，唔好盲目用口字邊造字好。係公認，習慣用嘅口字邊字“嘅、啲、哋、嚟、咁、噉”，就繼續用。如果唔係常用嘅，可以查得出本字，盡量用返本字，而且最緊要本字符合詞文達意先好。 我個人睇法，“嘅(忌)”就已經唔符合詞文達意。“忌”係心部，已字做音。當表達心理上嘅問題，而所謂嘆詞之用法，亦應該符合“已”音，就算你係嘆詞，都唔應該發“嘅”音，而係“忌”音。 所以呢方面“嘅”字更勝一籌。好似dada話齋，或者“忌”嘅本字眞係“嘅”呢？