噉点先可以「学好」、「保护好」呢？噉我哋最好就从一啲传统开始做起。学习传统，有助于我哋更好噉认识世界、接触世界、分享世界！
开讲都有话：万恶淫为首，百行孝为先－－嗱，呢个「行」字要读「幸」嘅音，呢个音亦都系我哋嘅祖宗传落嚟畀我哋嘅，呢个「行」字系指「德行」噉解。讲到「孝」，我哋成日都会听到人哋讲：「你真系‘廿四孝’嘅唧！」噉咩系「廿四孝」呢？
「廿四孝」源自一本书——元代郭居敬嘅《二十四孝》。呢本书系民间流传甚广嘅儿童启蒙读物，内容为自上古至唐宋二十四个孝亲嘅故事。佢将虞舜、汉文帝、曾参、闵损、仲由、董永、郯子、江革、陆绩、吴猛、王祥、郭巨、杨香、朱寿昌、庾黔娄、老莱子、蔡顺、黄香、姜诗、王褒、丁兰、孟宗、唐夫人、黄庭坚等廿四个人极尽孝道嘅典型人物嘅古仔集结成书，序而诗之，用训童蒙。随后，有人为之序诗、作图，刊行多种版本——例如系《二十四孝图诗》、《女二十四孝图》等，流传甚广。喺传统嘅木雕、砖雕同刺绣上，经常会见到呢类题材嘅作品——各位可以喺参观我哋岭南传统古旧建筑嘅时候发现好多有关「廿四孝」嘅艺术作品。
發表於 2008-8-23 12:29:43
