|
游歷多年，自己總結嘅。
語速：講嘢好慢，畢竟粵語同官話差別好大，廣府人平時一般用粵語嚟諗、講、聽，又冇乜點睇CCTV，講普通話時多數重係用粵語嚟諗，一時間對唔上，就有一個翻譯嘅時間，因此就講得好慢。
語氣語調：粵語有6個聲調（唔計入聲，而且陰平分高平高降），普通話得4個，講起嘢嚟等人哋聽上去有啲怪怪地。普通話2、3聲亦都容易混淆。
語法：主要係個「先」字。1.「×先」係粵語狀語後置嘅主要特征，普通話就係「先×」。2.「等我嚟××先」相當于普通話「讓我來××吧」，好多時都會用返粵語講法。
詞匯：首先就係各種名詞、動詞、形容詞嘅唔同講法，好多廣府人都會使用返自己一直用開嘅詞匯，古色古香。其次係語氣詞「啊」「啦」嘅大量使用，例如「是這樣的啦」「很喜歡啊」，而普通話就多用「吧」「了」「呢」；不過而家好多人睇得多港產片，就連主持人都學埋我哋噉講，就畀某啲人批為帶有貶義色彩嘅「港臺腔」。
聲母韻母：冇卷舌音，現代粵語唔存在卷舌音，講嘢全部平舌。唔單止唔講卷舌，重會將個嘴依得更大，比如「支持」會讀成 jiqi 。韻母方面，依開個嘴讀嘅音好多，而且同一個音嘅讀法，粵語會比普通話個嘴依得更大，大家可以體會下普通話yi同粵語ji。
我哋講嘢依到個嘴咁長，唔怪得廣東人嘅特征之一就係嘴大嘞。重有，北方人笑鍾意「哈哈」，廣東人笑鍾意「嘿嘿」；北方人驚訝會「喲～」，廣東人驚訝會「咦～」。睇下面張相，就知廣州人同北京人笑嘅嘴形分別，大家可以度下笑得最燦爛時嘴嘅長度同埋嘴長占面闊嘅比例。
重有兩個特征係出現懶音最嚴重兩種現象後造成嘅。1.n-大多數讀成l-。2.聲母g、k、h、z、c、s、zh、ch、sh、r接介母u再接韻母o時好多都會省略咗介母。 | 
發表於 2008-8-22 10:10:05
發表於 2008-8-23 10:28:29
