|
呢度要解釋下個圖先：
思覺失調提醒我，漏咗原點。即係話，三條軸嘅交匯處應該有個原點O。
X軸箭頭所指代表身體嘅右方，反之係左方；Y軸箭頭所指係埋身（或者後方），反之係離身（或者前方）；Z軸箭頭所指係上方，反之係下方。
好嘞！圖就解釋咗嘞！跟住講正題。
睇咗《粵講粵過癮之掂》，硬係覺得唔係好掂。事關提到一個古仔，話古時有個人，摣住枝大碌竹，打橫打掂都過唔到城門。
查實，打掂係過得到嘅。點解？粵語有分橫、掂、戙。打橫，方向如X軸；打掂，方向如Y軸；打戙，如Y軸。
打橫，大家都唔會有異議，關鍵就係喺打掂同打戙嗰度。
掂，即係順住噉解，譬如，你摣住碌竹，好順手就掅起，與身體保持九十度角，呢個時候，就係打掂，當然，冇人話要你摣住枝大碌竹。再諗下，我哋嘅農民，佢哋行緊田基嗰陣，會唔會將個鋤頭打橫或者戙起？唔會囉，阻住做嘢吖嘛？點行呢？
戙，大家都聽過戙徛水魚啩？即係成隻好似水魚噉嘅物體，戙咗喺度，話人肥啫！戙即係「豎立」嘅意思。
若果你唔認同呢個解釋，噉掂又點解呢？打掂都過唔到城門，噉，掂又點會有順嘅意思呢？唔好唔記得，粵語詞彙喺任何場合都解釋得通嘅，唔會自相矛盾嘅，故此，粵語先會有咁高嘅價值。 | 
發表於 2008-7-22 19:56:03
發表於 2008-7-22 21:55:47
边有两点呀？
發表於 2008-9-21 20:38:59