《撥亂反正》之卅二：同鄉VS老鄉

tonybean

        「同鄉」係廣東人用嚟形容嚟自同一個地方（通常唔一定係同城市，祗要係文化同根同源就算係）嘅人，而普通話嘅同義詞係「老鄉」。

        雖然我哋都知道兩個詞表示一樣嘅意思，但係我就覺得講「老鄉」點都唔順口。喺學校開同鄉會貼街招，我都考慮過應該用邊個詞，不過係唔使點諗都係用「同鄉會」，而其他地方嘅同鄉會都係用「老鄉會」嚟招攬新仔，包括廣西同潮汕。

        大我兩屆畢咗業嘅一個師兄嚟自珠三角某發達地區，佢竟然經常講「老鄉會」；有個嚟自粵北嘅另一位師兄都係噉講。記得有次睇央視，阿丘訪問丘成桐，用粵語講咗句：我姓丘，你又姓丘，我哋係老鄉嚟嘅。

        普語有云：老鄉見老鄉，兩眼淚汪汪。粵語讀就唔押韻，所以我哋唔會噉講，要講就講：同鄉遇同鄉，背後fe4一槍。

        唔知大家點睇呢？

余OK

　　粵人更加地道嘅講法係「鄉里」、「鄉里鬼鬼」。

朱利安

原帖由 tonybean 於 2008-7-11 15:59 發表          普語有云：老鄉見老鄉，兩眼淚汪汪。粵語讀就唔押韻，所以我哋唔會噉講，要講就講：同鄉遇同鄉，背後fe4一槍。

        唔知大家點睇呢？

 

要講就講：同鄉遇同鄉，大家一同香。

 

呵呵．

[ 本帖最後由 朱利安 於 2008-7-11 16:21 編輯 ]

余OK

　　普語鍾意用「老」、「小」呢啲字眼表示親暱稱呼，殊不知喺粵語係禁忌，一曰「老」者，畀人年邁色衰感覺，唔多老利；二曰「小」者，同某粗口字諧音，少用為妙。

朱利安

原帖由 余OK 於 2008-7-11 16:27 發表 　　殊不知喺粵語係禁忌，一曰「老」者，畀人年邁色衰感覺，唔多老利

 

咁何解粤语又将好朋友唤作老朋，老死和老友啊？呵呵．

[ 本帖最後由 朱利安 於 2008-7-11 16:40 編輯 ]

tonybean

原帖由 余OK 於 2008-7-11 16:17 發表 　　粵人更加地道嘅講法係「鄉里」、「鄉里鬼鬼」。

其實我舉嘅例子主要係用喺「同鄉會」呢個語境，漏咗講。

外外星人

原帖由 余OK 於 2008-7-11 16:17 發表 　　粵人更加地道嘅講法係「鄉里」、「鄉里鬼鬼」。

 

系嘅，不过，乡里最忌畀人话大。

顺德水蛇粥

一般讲「乡里」，好少讲「同乡」，「老乡」直呈唔讲。

外外星人

原帖由 顺德水蛇粥 於 2008-7-16 13:28 發表 一般讲「乡里」，好少讲「同乡」，「老乡」直呈唔讲。

 

老乡背后会fe你一枪

cingsan

大鄉里入省城。。。

顺德水蛇粥

原帖由 外外星人 於 2008-7-16 13:32 發表   老乡背后会fe你一枪

fe?用「砰」唔得咩？

外外星人

原帖由 顺德水蛇粥 於 2008-7-17 01:44 發表 fe?用「砰」唔得咩？

 

点解要有字先畀人发音？

tonybean

同鄉同鄉里，會唔會係同范圍有關？鄉里指較細范圍內嘅同一地方人，最大去到市，例如四邑鄉里；而同鄉可以大到講同一種語言嘅同一地方，例如廣東同鄉。

外外星人

讲到呢个乡里，听返《祝伯返唐山》——白驹荣、林小群——就知有呢句：

 

大家都同乡里呀，正一系乡亲...

顺德水蛇粥

原帖由 外外星人 於 2008-7-17 01:47 發表   点解要有字先畀人发音？

唔知佢讲嗰个fe系咪「砰」呢？抑或另有其字？

xiss

同鄉
「老同鄉」=「老鄉」