【原创】飮茶吹水纪要之五（粤语版）

gzshuzha

【原创】飮茶吹水纪要之五（粤语版）
人物：茶客甲 ＋  茶客乙
地点：广州某茶楼茶皇厅
时间：本月15日（父亲节）

    甲：乜今日咁虚冚嘅？
    乙：父亲节丫嘛。
    甲：番鬼佬日子，唔啱我哋嘅。
    乙：或者依家兴番孝顺呢家嘢呢。
    甲：我哋几百年嚟都系‘老窦养仔，仔养仔’嘎啦，咁易变咩！
    乙：唔系噃，报纸话前几日有个干部辞咗份工，押埋间屋，借钱陪个90岁老窦全国旅游添噃。
    甲：咁你又知唔知有个范老师吖？
    乙：边个范老师呀？
    甲：地震一嚟，唔理啲学生，冇鞋拉只屐，走死罢就嗰个呢。
    乙：哦，我知，佢话‘除咗自己个女，就算老母都唔救’丫嘛。
    甲：呢个仲系老师添噃。所以话以前大同酒家有副对联讲得真系好啱嘎。
    乙：读嚟听下。
    甲：上联系：大包易卖大钱难赚，针鼻削铁只向微中取利，下联系：同父来少同子来多,檐前滴水何曾见过倒流。
    乙：乜嘢意思？
    甲：你睇下嚟饮茶啲人就知啦，今日话就话父亲节，鬼咁虚冚，不过拿埋都系老窦带仔女嚟饮茶嘅，有几多个系后生拖住老窦嚟嘎？你几时见过瓦檐滴水流番转头架？
    乙：睇落又真系唔多噃。不过你讲嚟讲去，都系想话父亲节冇乜意思嗟，唔通老窦就唔畀有个节日咩？
    甲：我冇咁讲，不过就真系好多人系咁谂嘎，你仲唔忿气，等我唱埋只歌仔过你听，你就冇声出嘞。
    乙：乜嘢歌仔咁巴闭呀？
    甲：《世上只有妈妈好》，你实听过格！
    乙：咁都得？！