今日系《餐馆指南》上面见到有间粥铺,评价唔错,不过未得闲去试下。突然间谂起,粥,食粥,种类丰富,老少皆宜,四季都啱,认真唔错嘅选择。
原来食粥嘅习惯系古越人留传落嚟嘅。由于岭南地区气候炎热,流汗多水份消耗大,而日间劳作辛苦,需要及时补充水份同养份,而食粥就啱啱好满足到呢个要求,因此就形成咗呢个风俗,一直流传至今。
有论者曰:「壮人据地甚广,其大部百谷皆宜,然其人尤秉祖宗以前穷首山谷之遗训,以饭食为暴殄,朝夕餐膳,无不食粥。虽积谷成仓,而日亦如此。」按壮人为古越人后裔,其习俗深刻影响广府人。
虽然客家系、福佬系人亦食粥,而且潮汕地区更加普遍,但就粥品文化内涵之深广而言,无疑系广府系为冠(查实我都觉得广州粥正过潮州粥好多)。1956年全国名菜美食展览会上,广州历史传落嚟嘅参展粥品有84种之多,古越人食粥遗风在此功不可没。
至于其他省份亦都有食粥嘅习惯,不过同我哋就大不相同,至少北方人唔会因为天气太热要补充水份走去煮粥食,可能就食吓冷面呱。唔知佢哋呢种习惯系咪由南方传过去嘅呢?
[ 本帖最後由 飛鳥 於 2008-6-19 01:01 編輯 ] |