[轉帖]黄子华栋笃笑选句

highyun

1.爱情 白雪公主，几咁纯洁无瑕。但系谂真啲，白雪公主，识得嗰个系王子，灰姑娘识嗰个又系王子；有个有特殊嚐好，钟意锡青蛙嘅女人锡咗只青蛙一啖，只青蛙变出嚟嘅又系王子！有冇人谂过根本个王子系同一个人呢？根本呢个王子都不知几花心，周围沟女。仲无良到扮青蛙去沟添！ 2.情窦未开 我第一次恋爱之前，我认为自己就系杨过，而我同书里面个杨过唯一唔同嘅地方，就系佢有只大鵰。而我嗰阵，就钟意撚呢个相思同画眉多啲。同杨过一样，我从来冇谂过要考第一。 我只需要爱情，只要搵到我嘅小龙女，我就可以抛弃学业，退隐山林，搬入新界住。但系我一定要住西班牙别墅，我唔住得村屋，我怕蛇虫鼠蚁。然后每个月至多出一次市区，不过我唔会逗留得耐，问亚妈攞完零用钱我就会入番入去。 冇错，基本上，我由中一至中五都系喺呢种咁超然嘅思想下度过。嗰阵时学校最流行嘅辩论题目系：“中学生应否谈恋爱？”我认为，我哋应该辩论嘅系“中学生应否读书？” 而喺我第一次恋爱之前，我嘅小龙女只需要一个条件，就系靓，我知我咁样谂好肤浅，但系嗰阵时我仲细，唔知道原来身材都好重要嘎。 3.性 圣人话:“食色性也！”食同色，好唔同！一个人无论几钟意食，会唔会比几十蚊入戏院睇套“蒸气腾腾小龙包”？一个人无论几钟意食，又会唔会为咗望一旧冇包住嘅牛肉望到畀车撞？ 4.爱情 恋爱唔系part-time，你唔可以话：“爱！做完咪走啰！”恋爱系一盘生意，你要二十四小时谂住佢。自己生意，冇所谓part-time正识。人哋放假或者过年过节，你更加要开ot添。行花市啦行海边啦睇戏食饭啦…… 你有乜嘢竞争对手呢？我冇竞争对手？！你估你系专利巴士公司啊？港巴都执咗啦！有冇考虑结婚？咁就要向公众交代，咁就即系上市啦！所以，“中学生应否谈恋爱”唔系问题，问题系“人类应否有两份全职工作？” 你再拍拖，需要知会你老闆：“老细，我出面搵咗份恋爱，我真系好需要呢份恋爱，不过公司啲嘢我会照做，我兼顾到嘎。”然后你老闆会话：“咁你不如搵多份恋爱，咪直情唔使番呢份工啰！” 5.新鲜 依家啲人沟女，对绦女最大嘅要求系乜啊？唔系靓，最紧要，系够新鲜！ 乜嘢叫做够新鲜啊？就系话，沟咗一年嗰个，就唔够沟咗半年嗰个咁正。因为半年嗰个新相识，新鲜啲。同样，沟咗半年嗰个，就唔够三个月咁正。沟咗一个月就唔够半个月嗰个咁正。沟咗一日就唔够半日嗰个正，如此类推，终於……沟咗嗰件，就唔够未沟嗰件咁正！ 咁即系点呢？仲沟唔沟好呢？一沟就唔正？！ 6.女人伟大 黄：系爱情之中，女人最伟大！ 男人嘅牺牲，就为咗追求美丽；而女人嘅牺牲，就只系得到一个麻甩佬！而最伟大嘅系佢哋根本唔觉得系牺牲。 如果你话畀一个女人听，喂，你男朋友有口臭！ 张：车，人梗有局部缺点嘅！ 黄：佢仲有臭狐同香港脚喎！ 张：咁佢咪好平均咯！ 黄：佢啲鼻鼾声唔使搅咪啊！ 张：我男朋友一定系梦见我，我开心。 黄：佢屙尿乱咁啡！ 张：好壮啊！ 黄：佢啡完唔洗手！ 张：边有男人洗手嘎！ 黄：我有！ 张：乸型！ 黄：佢仲讲粗口啊！ 张：但系佢心地好！ 黄：佢系电梯度食烟喎！ 张：公众场合都唔畀食咯，佢咪呢埋一边食啰，你哋仲想点啊！你系咪想逼死佢？！系咪想逼死佢？！呜～～～ 7.责任何在 如果你话我听，因为我唔靓仔，所以唔可以做戏，你唔应该话我听！因为唔关我事，我唔应该负呢个责任，你应该同我父母讲，系佢哋搞成我咁嘅。如果你要罚，应该罚佢哋。以后，边个丑样，就罚佢爸爸妈妈唔准做戏！或者剩系做茄呢啡！ 我唔系一个唔负责任嘅人，为我爸爸妈妈嗰短短一刹嘅快感，我已经负责负咗廿几年。你估做我好易做啊？ 我细个读书唔好，或者唔合格，我冇要父母负责。我自己签晒啲成绩表嘅。 每当我爸爸妈妈有争执闹交嘅时候，我有冇叫佢哋为咗我嘅童年着想，忍下对方？冇！我叫佢哋出街闹！ 我大个咗，唔知应该信边个宗教，唔知做人为乜，唔知人生事业嘅方向都冇要求父母照顾我。 反而系我调番转头，提醒佢哋：你哋要搵钱啊，积穀防飢啊，唔系第日老来无依无靠啊！ 乜嘢都系我！ 8.男仔唔驶靓仔 靓仔系唔系真系咁重要啊？有啲人话男人唔驶靓仔嘅，有才华咪得啰。 系，你有冇试过带你嘅才华去落disco识女仔啊？人哋啲靓仔一行入去，唔使二十分钟，就已经同啲女仔互相问问题：“你度定我度？” 我带住我嘅才华入到去，几艰难先搵到个女仔肯畀个机会我。唔系畀机会我交换问题，而系畀机会我天才表演。 唱歌跳舞做话剧讲大话功夫表演，成套欢乐今宵一个人做一次…… 9.演戏天份 我从小就知道，我系一个伟大嘅演员。 人哋细个成班细路群埋，钟意玩扮结婚，扮爸爸妈妈。我细个，就钟意扮奸夫淫妇。 但系唔知系咪我个样比较老实，我系从来都冇机会扮奸夫。每次我都系扮淫妇……嘅老公。 虽然系咁，虽然，我亦都系成班人之中最细嗰个。但系我已经可以将一个妒忌嘅男人心态表现得淋漓尽至。 当然，我啲朋友个个都讚我，话我天生出嚟，就系戴绿帽嘅。 10.死亡 细个嗰阵，我系唔怕死嘅。 我觉得，系以前啲人先会死嘅。系历史书里面嘅人至会死。好多人唔明历史有乜用，历史咪话你听边啲人死咗啰。 我从来未睇过一本历史书有提到黄子华呢个名，我点会死啊。最紧要系，就算死都唔系乜嘢一回事。 细个嗰阵隔离陈师奶成日叫佢老公：“咁多人去死你仲唔去死？” 然后去完番嚟,阿陈师奶又会话：“死番嚟啦，唔死多阵添？” 所以我一路都认为，去死，即系去街，同埋一定唔会去好远。因为阿陈生每次都好快就返嚟嘅。 11.赌马 喂，赌马系需要付出好多嘎。 朝早要睇晨操夜晚要睇董骠，又要同朋友交换读书报告。 你估我哋睇得书少？市面几多马经啊？ 仲唔系话你睇得多就得嘎喎！ 香港啲马经，一埸十只马，十只马都有人贴，你自己思想唔够独立，咁你就死梗啦： 唔该，呢场每只帮我落100蚊啊！希望中啦！ 夏天嚟啦，抖暑啦，你估系畀啲马休息咩？系畀我哋休息啊！ 2.泳池 黄：去公众泳池嗰啲唔系叫做游水，嗰啲叫做浸水。因为喺公众泳池游，只可以用一种泳式，就系弹式，同一个位，弹下弹下。 张：如果系高手可以用式，但系要潜落水底嗰度用。 黄：点解香港啲泳池咁鬼逼嘅呢？ 张：唔好问啊，趁人多你好快啲浸下。等阵所有人上晒水嗰阵，你就会发觉，个池啲水原来到膝头哥嘎咋！你去浸脚指啦，下次。 黄：其实我哋香港人都习惯咗人多，去浸下水都好。但系可惜嘅系，呢啲水，唔系一般水，呢啲系暖水！你成日喺泳池度，你会发觉有啲人，全身唔喐，眼碌碌。 张：哦！你喺泳池屙尿，咁冇公德心！由细到大我老豆都教我嘎啦，急尿，去隔离池啊嘛！ 黄：所以我喺度，趁呢个机会，同你啲儬仔讲啊！游游下小童池就走过嚟大人池，擒喺个池边，唔好话我听系学游水啊！ 张：特别系擒正喺喷水口嗰啲啊！想毁尸灭迹啊！ 13.改名 改名，只系啲父母将自己嘅主观意愿套喺啲仔女身上。所以大部份女仔唔系叫美乜就系丽乜。男仔唔系叫阿坚，就系阿强，一唔系就叫阿祥。咁我哋系咪好美丽，好坚好强好长呢？ 14.黑白不明 我非常欣赏邓小平嘅“黑猫白猫，捉到老鼠就是好猫。”我老友阿雄个老婆生仔，生咗个黑人出嚟，我都系咁对佢讲：“黑仔，白仔，快高长大就系好仔！” 15.闹人 以前我哋笑人，会话：“你有得发达？太阳由西边出嚟啊！”依家我哋就会话：“你有得发达？建筑面积等於实用面积啊！” 又或者话人丑，现在我哋都会技巧好多：“你唔丑，你点算丑啊，你系块面唔多实用咁解嘛。你嘅鼻台太大，啲眼耳口鼻咪唔见使啰。” 16.失恋 失恋系会令人成长嘅。我失恋之前，一向都觉得世界上所有问题都有答案。 点解我哋每日都要8点钟起身返工啊？因为够钟啰！ 点解我哋有够钟呢样嘢啊？因为我哋唔用浮动上班时间啰。 点解呢个世界有战争？因为我哋有武器罗。 咁点解我哋要有武器啊？因为佢哋有武器啰。 一切都有答案，直到我失恋。 阿珍，点解你唔爱我？阿珍畀咗一个经典嘅答覆我，佢话：“爱情系冇点解嘎，系唔可以解释嘎，唔好问啦。”（记紧呢句啦） 如果番学阿sir问我嘢都可以咁答就好啦！“黄子华，物体燃烧点解需要氧气啊？” “阿sir，系冇点解嘎，系唔可以解释嘎，唔好问我啦！” 17.隆胸 叶子微简直为演艺界创下新标准。 以后啲女仔想做明星，又唔使睇样，又唔使睇演技，去磅啦！！！（加强语气）得，入去磅一磅就得啦。“开黎，六斤半，片酬系六千五蚊一日，小姐做唔做？”“开黎，八斤有疤痕，八千减一千疤痕费，即系7千蚊一日。” 你话几客观呢！　 20.放假 黄：一般人都会好珍惜每年一度嘅年假！ 张：今年我要去夏威夷游下水。 黄：如果你决定去夏威夷，你就要预咗付出沉重代价！前四后六！ 张：我讲紧系年假，唔系产假啊，子华！（真系啊……） 黄：前四后六嘅意思系，喺你放假之前嗰四个礼拜，同你放假之后六个礼拜，都要做到仆街！（死未）因为无论你放几耐假，你嘅嘢始终系你做番。 张：系你嘅始终系你嘅！ 黄：唔单止，放完假，唔系你嘅都会变成系你嘅！ 21.金捞 点解要带金捞？唔带捞，有乜资格同人讲，时间系宝贵？我嘅时间点值钱呀？（你话系唔系先） 嗱，支时针围住行一个圈，12个钟，十几皮嘢，即系为皮几嘢一个钟。你一个钟值几钱啊？ 几旧水？我点同你一齐食饭啊，大家时间观念咁唔同！ 唔单止咁，你带捞，表示你个人有幽默感。劳力士，有边个靠劳力搵食嘅人带得起劳力士啊？越带劳力士嘅人就越表示佢唔使用劳力！呢啲，就叫做幽默感啦。 22.女爱情观 女仔对爱同钟意有好大嘅分别，如果个女仔知道个男仔钟意佢呢，佢都会同佢去下街，睇下戏，食下饭，但想做进一步嘅嘢就唔得啦。 而女仔知道个男仔爱佢嘅时候系绝对可以付出更多。喺女仔心目中，钟意等於“帮衬”。 但爱喺女仔心目中等於“收购”，收购包括“注资”，然后“合并”……（系呀，系呀！） 所以女仔要男仔将佢嘅爱注资落嚟，嚟护口注资落嚟，最重要嘅系嚟钱注资落嚟。 然后去买joyce啦，panda啦，gueeo啦，买到一身都系，等佢认为可以巩固佢自己嘅价值，但佢哋系绝对冇得到男方嘅同意嘎！ 嗱！我宜家同你哋讲啊，你哋嘅黑箱作业，好容易破坏男方嘅经济嘎！（你哋都好有共鸣啦） 23.男爱情观 男仔对爱就好随便，爱同钟意都冇分别，只要佢知道你钟意佢，即刻可以带你番屋企，或者去你屋企。 系唔系男仔心中冇爱呢？我觉得又唔系喎。系佢哋比其他人更清楚爱嘅定义。爱系乜呢？根据耶苏嘅讲法系：“爱系恆久忍耐又有恩赐，爱系不张狂，不大唤，不作害羞的事，忘记别人的错。” 你话啦作为小小男人嘅我哋又点可以随随便便同你讲声爱啊！ 所以以后有人同你讲爱，一就系佢讲大话（加强语气），二就系有个耶苏喺你面前啊。 但耶稣主张爱人如己任，博爱嘎！ 24.自重 当乜嘢人都唔搵我做嘢，我就知道，我系一个伟大嘅艺术家，在生嘅时候系唔会获得应得嘅尊重。唔止咁，我仲伟大过伟大嘅艺术家，因为我知道，我死后都唔会受到尊重。 25.红馆 依家做歌星，好犀利，因为有红磡体育馆。因为呢样嘢，做歌星，可以喺一晚，就赚晒你哋朝九晚五一世人都搵唔到嘅钱啦！ 啲人话，我真系唔明张国荣点解要退休，（点解？）佢一晚已经搵咗你一世搵嘅嘢，佢一晚已经做咗你一世人要做嘅嘢，仲有乜嘢可以做啊？唔退休做乜？做五场，已经轮回五次！做三十场，轮回三十次，如来佛祖都话：使唔使？ 啲人话，唔系嘅，佢唔舍得退休嘅！佢最后嗰场演唱会，佢自己都喊嘎。佢系喊，不过唔系为自己喊，系为咗你哋喊啊：“我就退休啦，我听日就唔使do啦，你哋听日仲要番九点，唔好迟到啊！！” 26.迷惘 喺公司，老闆会同我讲：“你番嚟唔系瞓就系去厕所，你当呢度系屋企啊，呢度系公司啊。” 我番到屋企，阿妈又会话：“你仲当呢度系你屋企咩，你番嚟唔系霸住个厕所就剩系识瞓！” 咁……咁我番屋企又唔瞓觉又唔去厕所，番公司又唔去厕所唔瞓，咁我呢啲嘢去边度做啊？ 不过后嚟我谂过自己又系过份啲嘅，于是我就痛改前非。以后番屋企我就剩系瞓觉，番公司就剩系去厕所。 28.老豆 我一向以为老豆，系option嚟嘅，附加嘎咋。 无错，大部份人系有老豆嘅，就正等於大部份嘅车系有收音机一样。但系嗰样系option嚟咋嘛，唔系架架车都有。所以我细个嗰阵好憎啲儬仔成日喺我面前话：“我老豆点点点……” 我觉得嗰啲人好晒命，就好似你有部车，不停咁同人讲：“我部车开蓬嘎，大包围嘎！”你不如话：“你老豆开蓬嘎，用无铅汽油嘎……” 29.十八岁 点解十八岁先至系合法年龄呢？因为到咗十八岁，喺法律上我哋就要对自己负责任 多余，唔通十八岁之前，我哋就唔使对自己负责咩？唔通十八岁之前，我就可以随时扑出马路：“我唔信啊，我17岁半咋，你敢撞死我？” 唔通十八岁之前，我喺油麻地踩完个纹身佬一脚，个纹身佬会话：“死儬仔，你未够十八岁，我忍你！” 唉，十八岁嘅最大好处，就系你到咗一个合法嘅做爱年龄。我想请问，有边个做爱系因为合法先做嘎。我以为大部份人做爱系为咗快感同高潮。抑或你想话我听，十八岁之前做爱系冇高潮嘅，十八岁之前做爱系白做嘅！咁样十八岁就具有特别意义啦！ 31.拜年 呢几年，拜年嘅贺词之中，最流行系边句？祝你——不劳而获。（唔系挂？） 恭喜人哋发财当然好，但系发财，都要有方法。有边一个方法，好得过不劳而获？（系咪） 不劳而获嘅方法就系唔使方法，唔使方法就系最好嘅方法。我哋想发财，已经想到到咗一个禅嘅景界！ 不劳而获既然可以成为新年贺词，我期待喺未来几年，我哋话人蛇鼠一窝，即系讚佢合群，话人非奸即盗，即系话佢勇敢！ 哗，真羨慕你呢个家庭，真系蛇鼠一窝非奸即盗。梗系，唔系我哋点会陷家富贵！ 32.儿童教育 我一向都认为，我哋成日呃啲细路仔，懒系nice咁对佢哋，讲到呢个世界乜嘢都好好咁，咁系唔啱嘅。（何解？） 细个我同妈妈搭飞机，睇见厕所嘅水系蓝色，我未见过，咪走去问妈妈嗰啲系乜？妈妈话：“系天空。”所以我就成为世界上第一个食过天空嘅人。 细个啲大人成日讲童话讲白雪公主。（你都听过啦）佢哋讲嘅就系白雪公主又靓又好人，好值得去追求。 但系冇讲到我哋唔系白马王子！边个人至系白马王子啊？起码有只白马啦。咁就即系马主啦，你话系唔系啊？ 讲啲唔讲啲好危险嘎。即系等如你同个细路仔讲：“小明啊，飞出窗口好过瘾嘅，成个香港望晒嘎，浮下浮下……”但系唔同佢讲：“不过你落到地下个阵，会快过搭电梯好多！” 33.用家炒家 好多人结婚，最初就以为自己系婚姻嘅用家。后来先发觉自己系感情嘅炒家，於是想离婚。但系离婚又要搅几年，睇住周街都系新盘靓盘，自己个盘又放唔出，几难受！ 34．扒 如果你系一件猪扒，咁你基本上系唔使减肥啰～一件猪扒，减咗肥，就系一件瘦扒，一件瘦扒就系比猪扒更唔开胃嘅扒，系咪？你买叉都唔要嗰啲啦。

loist

好正!

木頭公仔

好正啊! em5:

Kathy

好搞笑呀... em2: em2: em2: