|
５月两次嘅群聚相当成功，大家除咗互相认识、联谊两番之外，重增进咗彼此嘅了解，消除咗一啲误会，喺希望网站搞得越来越好嘅基础上，达成咗共识——就系论坛须要改革！以下就系蒐集咗各方意见，综合出嚟嘅结果。
首先就系拆版。「南粤文化」应该要尽快分拆上市！分拆之后，应该要有专门讲粤剧嘅，讲岭南建筑嘅，讲饮食文化嘅，讲民俗民情嘅……个人建议可以考虑开辟广西、粤西、四邑、客家、潮州……地区专版。
「休闲娱乐」应该要重组。将「翻唱区」独立出嚟，并改名为「自弹自唱」，一来可以提高大家积极性，二来亦可以建立一个品牌形象。「影视频道」应该独立开嚟，唔应该同「娱乐频道」摆埋一齐，娱乐版应该讲多啲八卦嘢，吸引人流！有人建议应该增加贴图版——因为呢个系最吸引人嘅，冇边个成功嘅论坛冇呢家嘢。所以应该尽快设立，以网聚人气。
「吹水版」可以扩展为一个分区，里面除咗继续保留「吹水坊」之外，重要开埋情感版（连名都谂好埋，叫「男左女右」——系「包嘅四次方」起咖，我纯粹转述）、医卜星相版、饮食版、供求信息版、灵异鬼故版等。
而家又有人提出应该增加语音版，记录一啲有可能消失嘅声音，因为有啲讲法用文字系无法表达嘅，一定要用声音或者影像嚟记录、表达先得。不过点样解决文件保留空间问题就比较头痛，所以要群策群力先得！
虽然供求信息版而家系已经开咗，但系应该将佢嘅功能再进一步扩展，增加埋一啲潮流产品、文化、蒲点嘅介绍，以丰富内容，吸引人潮。另外，如果有人需要帮手搭棚、搭台、搭嘴、帮拖、投票、做调查问卷……都可以喺里面卖广告。岭南人互相帮助，互相扶持，何乐而不为？
另外，目前论坛系有新人嚟注册，不过多数都系走嚟攞料嘅，一唔系就走嚟捣乱——冇贡献不突止，重要搞搞震添！而好多人嘅主观能动性就调动唔起，主要就系版块太少、内容太窄、话题唔多……所以如果开多啲版，噉就会有多啲选择畀新人，唔使来来去去净得嗰几个人发帖、复帖。
重有，发挥人嘅主观能动性一个好好嘅做法就系畀嘢佢哋做。除咗开新版之外，就系要安排多啲人一齐嚟参与管理、发展！做咗版主嘅人就会多咗责任，多咗责任就会想多啲人去撑自己个版，就会周围叫啲人注册、发帖、复帖，就会想方设法揾好帖、转发好帖，甚至自己写好帖。喺工作嘅过程中，亦好容易揾到自己嘅不足之处，从而想办法进修提高，对佢本人同网站都有好处。
根据我多年嘅研究同埋实战成功经验嚟睇，最有成效嘅做法就系揾多啲人一齐嚟「复制努力」——将成功嘅经验同做法不断复制再复制，当数量达到一定嘅时候，质变自然就会发生，蝴蝶效应就会出现，单靠三两丁人系做唔到啲乜嘢出嚟嘅！
所以大家睇完之后，认真谂下，睇下有咩好嘅建议就补充落去。 | 
發表於 2008-5-19 18:40:52
發表於 2008-5-20 20:32:39
發表於 2008-5-20 21:29:21
我之前個~~~4只包ID~~唔記得密碼~~兼且~~~摞唔返~~~~~
唔通你想坐晒两个位咩？
其实，一听系四只包，我就已经举埋脚趾屘赞成啦！
不过而家重未决定开新版，又未轮到表态嘅时候，噉咪谂住迟啲先讲啰！点知你咁心急啫？局住人表态！我唔制，你逼人嘅！嗱，咁恨做，得偿所愿嘅话，要开**，请食饭咖！
