1986年底新藝寶唱片公司為許冠傑推出嘅EP細碟《宇宙無限》，一直以來都係小弟甚喜愛嘅阿Sam黑膠唱片之一。 EP細碟《宇宙無限》，於1986年聖誕節前夕出版發行，碟內共收錄四首作品，分別係： 1、《宇宙無限》（電影《衛斯理傳奇》之主題曲），作曲：Donald Ashley，作詞：林振強。 2、《寂寞聖誕》（原曲: 英國民歌《Green Leaves》），作曲：traditional song，作詞：許冠傑。 3、《Radio好知己》（原曲: 英文歌曲《I Only Wanna Be With You》），作曲：MIKE HAWKER/IVOR RAYMONDE，作詞：林振強。 4、《宇宙無限Instrumental純音樂演奏版》，作曲、編曲：Donald Ashley。 《寂寞聖誕》嘅曲旋律改編自英國民歌《Green Leaves》，經過重新編曲，配上許冠傑嘅詞，并於歌曲引子末段加插咗《Silent Night》嘅旋律，顯而易見，呢首歌係一首應節嘅作品。歌詞內容話比我哋知，故事主角於萬眾狂歡之聖誕夜，卻感受住隻影形單嘅滋味，喺觸景傷情之下，憶記起往日嘅情人。歌曲末段以對比法描寫，頗為精妙：「愉快舞會燭光已漸殘/人客各散/面帶歡顏/剩我舉杯悲歌帶淚彈/誰伴我這個寂寞聖誕」，於歡樂嘅節日情景嘅影襯下，更顯主角之孤單與寂寞。阿Sam以其一貫演繹傷感抒情歌曲嘅手法處理，唱起嚟真係好有Feel。 《Radio好知己》，此曲嘅特色係先以鋼琴打頭陣，再加上鼓樂作陪襯前奏---極為輕鬆、舒適嘅引子。原曲係外國民歌《I Only Wanna Be With You》，陳秋霞於1976年都有演繹過呢首英文歌，并收錄於其個人專輯大碟《Dark side of your mind》內。1977年馮偉棠唱嘅《天賜良緣》，以及1978 年張德蘭唱嘅《點解不可以》，都係用呢一首英文歌嚟改編歌詞嘅粵語歌，其中：慣填粵曲詞嘅《天賜良緣》詞作者葉紹德，畀人感覺就係其作品流於鴛鴦蝴蝶派；而盧國沾為張德蘭填詞嘅《點解不可以》，就有多少「跳皮情歌」嘅味道。阿Sam演唱嘅《Radio好知己》，與上述兩首粵語歌相比，雖則各具特色，卻予人古代對比現代之感，且經過重新編曲，再配合上林振強呢位時代氣息極濃嘅填詞專家嘅神來之筆，效果令人耳目一新。《Radio好知己》選取嘅主題內容，同1989年阿Sam演唱嘅《我信韻律全能》一樣，均以「廣播」作為題材。 《宇宙無限》及《宇宙無限Instrumental純音樂演奏版》，分別係電影《衛斯理傳奇》之主題曲及插曲，與許冠傑早期嘅專輯一樣，都係乘搭賣座電影嘅春風而推出嘅電影歌曲。《宇宙無限》係呢張EP唱片嘅點題歌及靈魂所在，亦係值得特別推薦畀大家聽嘅歌。其旋律及編曲皆由Chyna樂隊嘅主音歌手Donald Ashley所創作，Intro太空味甚重，又極配合林振強寫嘅歌詞：「星空可有一對手，承擔起這沒邊緣宇宙和運轉地球...」。欣賞此歌曲之深度嘅同時，又喜歡其內涵與當中哲理：「...空中可有雙眼睛，由開始已在星河背後遙望這地球，誰掌管世間目前、以後。當仰觀星星掛於天的腳踭，頓然自覺像塵末那樣的有限，我敬畏實在是誰創造無限，那遠處像是內藏制度和變幻；天空可有變殘舊，無聲的結聚星河背後--人類與地球，能否相見於萬年以後？」同時更欣賞林振強對人世間之各種爭鬥作出直截了當嘅控訴與竊笑：「人在世有太多私心與紛爭，似不知一切輕重與無盡的爭，瑣碎像塵。」細細品來，可謂字字珠璣，一針見血！《宇宙無限》呢首歌有一特點，可能唔係太多人注意到，就係過門音樂有好重嘅日本古曲味道。而阿Sam喺演繹時係落足一番心血與苦功，整首歌嘅曲、詞、唱皆配合到極至。個人認為，《宇宙無限》係許冠傑於新藝寶時期嘅一曲精品！ 最後一提嘅係，呢張唱片嘅封套設計過於商業化，完全以電影《衛斯理傳奇》嘅漫畫版為主題，美感或藝術感稍稍欠缺，喺製作方面略嫌倉促、粗糙，呢個就係此唱片中嘅唯一缺點。
發表於 2008-5-13 01:54:36
發表於 2008-5-13 08:39:06
喺百度、SOGOU DL真係好鬼麻煩。。。。一啲都唔齊整
重有啲DL咗先知係無效LINK！
印用------「最後一提嘅係，呢張唱片嘅封套設計過於商業化，完全以電影《衛斯理傳奇》嘅漫畫版為主題，美感或藝術感稍稍欠缺，喺製作方面略嫌倉促、粗糙，呢個就係此唱片中嘅唯一缺點。」
發表於 2008-5-14 12:47:07
