|
有一次，我離開中華廣場，搭車去北京路，啱上車（大東門站），就聽到到兩名女小學雞進行緊如下對話：（紅色代表用普通話講）
A：你叫什麽名字啊？你在哪個班啊？我明天來找你哦！
B：好啊，我叫XXX，我是一班的，你記得來找我啊。
A：那................（此時A被其母親打斷）
A母：你着返件衫先啦！車尐空調大啊
A:陣間先啦..........（繼續對B）那你認識XXX嗎？我是他（或她）的好朋友，我們明天中午一起去他（她）家玩好嗎？
B：好啊，什麽時候？
A：我留下我的家裏電話，我們今天晚上慢慢聊.........（「論論重重」噉從書包裏面攞出筆同紙，然後寫電話）
A母：喺車道咖，扶穩尐啦，重寫咩嘢啊，因住跌死你啦........
A（此句與A母嘅上一句同時講，而且完全冇留意A母）：這是我的電話，你留著.............（A母打斷）
A母：我幫你着返件衫先..........（開始幫A穿衣服）
A：那你記得......唉，媽，你好煩耶..........記得給我電話
B：好啊，我今天晚上8點鈡打來，好嗎？
...........................................................................（佢哋繼續講，講到我要落車，而佢哋擋住我，所以我要打斷佢哋）。
我：唔該，借乜尐啊！
A母：行開尐畀人落車（一手「蚊」住佢個女，但係佢個女依然全然不顧噉同B傾偈）
我：唔該，借乜尐尐啊！（聲音略大，帶怒氣）
（仍然無效）
（我準備親自出手推開佢哋，此時，我個女性朋友較溫柔噉講咗句）
「請讓開點！」
（B有反應，行開咗，而A見B行開，亦都跟住B行開。）
落車后，我略帶不滿噉話：「嗰個女都唔知係唔係聾咖！」我個F話：「你明知講廣州話嘅嗰個淨係識得聽個撈妹講，噉你咪用普通話同個撈妹講等佢行開，另外嗰個自然會跟住行開咖啦！」我話：「噉我咪「撈」埋？」F話：「做到嘢就係啦。」
注意，呢件事發生喺越秀區，亦即老城區，唔係郊區唔係城中村。我唔知個B識唔識得聼，但係我肯定A係識嘅。但係當我見到佢阿媽用廣州話叫佢嗰時，佢都敷衍佢阿媽時，而繼續顧住用普通話同B講嘢時，我好心痛，一方面心痛佢阿媽畀人冷落，另一方面心痛嘅係喺呢道廣州話畀人冷落。
之後我每逢諗起呢件事，我都好心痛。假設嗰個講廣州話嘅阿媽就係代表廣州話，而佢個女就代表住部分廣州人，另外一個細路女就代表尐「有心計」嘅「外地人」。由此就得出一個畫像：部分廣州人為咗形形色色嘅利益一味向外地人討好，甚至將自己「撈化」而棄自己嘅母語不顧，甚至嫌棄自己嘅母語。
[ 本帖最後由 xiss 於 2008-6-23 17:49 編輯 ] | 
發表於 2008-5-9 18:23:34
，但系，我阿妈个女个女就好难讲喇！
