广州旧影
□梁小丹 口述、相片提供:周桂芬
拍摄时间:1963年
拍摄地点:珠江边
1950年,我就出嚟揾食打工,喺一间叫做巧机嘅影相铺,同个私人老板做杂工。第一个月嘅工资就系得三个银钱。嗰阵一个银钱就系一万,啫系而家嘅一蚊鸡。后尾个老板娘见我识字,可以开单影相,就加多一个银钱畀我,一个月就四个银钱喇。做杂工,乜都要做,担水、煮饭、洗衫、搞卫生。嗰阵,河南呢边到处都系烂地,相铺系冇水龙头嘅,担水要去到好远,一日担成十几廿担水,而且重要担上四楼,楼梯又企。不过,好彩嗰阵后生,重有气有力。
而喺1952年,我就参加咗工会组织——店员工会,属于商业系统——做女工委员。到咗1953年,我就直情脱产去学习,唔做嘢,全心全意噉搞工会。嗰阵,我初中毕业,有啲文化,口才亦唔错,各方面做嘢都好积极,又有管理能力,重经常帮啲有困难嘅群众解决问题,甚至夫妻纠纷都要出面做思想工作,十足十而家嘅妇联噉,所以冇几耐,组织就提拔我为海珠区嘅女工主任。由嗰时开始,我就经常喺几千人面前上台讲话喇,而家谂起,都觉得嗰阵嘅自己好威水啊
后来,又去咗饮食服务管理部做干部。不过冇几耐又调咗去商业局,搞整社。人民公社成立之后,就去咗搞托儿所,做群众教师。由于我对群众工作比较熟悉,组织见我唔怕牺牲个人利益,喺机构调整嗰阵,又将我喺商业局调咗出嚟,调去海燕摄影店做经理。嗰阵嘅海燕系海珠区最大嘅影相铺。
我影呢张相嗰阵,就已经系经理喇。呢张相系喺珠江边影嘅,我身后嗰座就系海珠桥喇。以前,海珠桥嘅中间系可以向上打开,等啲大船顺利通过口架。不过喺1938年,就畀日本仔炸烂咗,整返好之后嘅海珠桥,中间已经唔可以打开,连埋咗一齐喇。
嗰阵其实都几乱下口架,我做咗经理冇几耐,就开始「文化大革命」喇。嗰阵阶级斗争系好犀利嘅,分咗地总派同旗派。呢两个派啲人成日互相揾对方嘅缺点,一有机会就捉住唔放。嗰阵,两公婆系唔同派嘅都有好多,成日打交嗌交,离婚都唔少。而就喺海燕影相店入面就已经有两个派喇,地总派啲人总好啲,旗派啲人就乱噉嚟,成日抄人哋啲档案,话要交咩「黑资料」喔。有一次有个女人带咗成班人,去我间海燕度,咩嘢都抄,抄到乱晒先肯走。
嗰阵,有个学徒仔同会计,系都要我加入旗派。噉我佗住个女,就冇返去开会。后来,56日产假之后,我返翻工,依然乜都唔参加,佢哋有事冇事就叫我去斗其他人。我最讨厌呢啲嘢,最后干脆做咗中间派,乜都唔理。好彩我乜都冇参加啫,嗰阵有个理发嘅,牙擦擦噉去参加旗派,最后,又咪畀人扚咗去劳改。
嗰阵你都唔好话唔惊啊,因为我成分唔好,系地主后代。实情我屋企就系资本家,我老窦系做生意嘅,我两个大佬都系搞革命,所以我屋企应该系革命家庭。但系嗰阵,边有人当你咁多吖,你成分唔好,就要畀人攞去批斗。我哋单位重有两个男经理,屋企又系地主出身,其中一个啊,畀人扚咗去中山纪念堂斗啊,斗得几辛苦啊,最后重畀人压咗返乡下。
好彩我平时行得正企得正,只有做多唔做少,又抵得谂,不贪不婪,连我老公去影居民证相,都系开正单叫个师傅影口架,一分钱都冇畀少。所以,旗排嗰帮人嚟抄嘢,乜都抄唔到,如果唔系,早就畀人斗死咗喇,重有今日咩!
發表於 2008-5-8 01:01:22
