|
9·25 匹夫不可夺志
□子野专栏
【原文】子曰:「三军可夺帅也,匹夫不可夺志也。」
【译文】孔子话:「一支部队,有可能畀人夺去主帅；一个人立咗志,边个都夺唔走。」
【栋笃】话说有一日,两公婆嗌交。老公惊畀老婆打,匿埋喺床下底。老婆踎低身笃住佢闹:「你够胆同我躝出嚟(滚出来)!」老公就话:「三军可夺帅也,匹夫不可夺志也!我话我唔出去就唔出去!」
讲下笑啫。不过「匹夫」呢个词,原先确实系同「老公」有关口架。夫妇互相匹配吖嘛,分开嚟讲就系「匹夫」同埋「匹妇」。而家「匹夫」嘅意思,理解为「一个人」就得喇,男女都得口架,比如「国家兴亡,匹夫有责」,就唔单止系男人嘅事嚟口架。
孔Sir呢句话,犀利,又系千古名言喇。以前都唔知有几多人抄埋佢,贴喺书柜度当座右铭啊。
三军,一支部队,有千军万马。但系,就系因为人多,所以人心好难齐——军心一涣散,主帅就好容易畀人捉走喇。匹夫立志,呢个「志」唔会唔畀夺走,完全由自己一个人决定口架。所以,只要自己志够坚,就边个都夺唔走喇。
梁漱溟,中国现代著名嘅思想家、哲学家、教育家……亦都有「中国最后一位儒家」之称。佢一生致力于「中国新农村」嘅建设,军阀统治时期,就做出咗唔少成绩。佢同毛泽东同龄,两人交情亦都算唔错。但系,1953年,喺政协会议上边,梁漱溟为农民嘅疾苦,就同毛吵咗起嚟,一啲都唔畀面。毛话佢「反对总路线」,从此之后就开始大力批判梁漱溟。梁漱溟就噉样做咗廿年嘅「反动分子」。到咗1973年,「批林批孔」运动又搞起嚟。因为梁漱溟系「新儒家」嘅代表,上边又要佢表态批孔子。喺一次大会上边,梁漱溟有咗讲嘢嘅机会,佢就话,孔子有功有过,唔可以全盘否定；重有,林彪同孔子冇咩关系,唔可以捞埋一齐讲。梁漱溟嘅发言,引嚟更多对佢嘅批判。直到隔年底,喺一次批斗佢嘅大会上边,主持人逼佢表态,佢就话:三军可夺帅也,匹夫不可夺志也!
咩叫知识分子嘅操守,睇下梁漱溟嘅表现就知喇。可惜,喺过去嘅呢半个世纪,能够似梁漱溟噉「匹夫不可夺志」嘅知识分子,系少之又少。大部分知识分子,喺政治高压之下,擦鞋都嚟唔切,点可能有「志」?
http://www.nanfangdaily.com.cn/epaper/nfds/content/20080506/ArticelB12002FM.htm |
發表於 2008-5-7 21:34:19
