好多字搞唔清..可唔可以指教下我？？

錯覺

唔該,我想請問下呢...

 

個"仲"字同"重"字...

即係.... "我『仲』未得啊" 定係「我『重』未得啊」..呢？？

 

and..

個『嗰』字又可唔可以用『果』字代替呢？？

 

 

and..

畀or畁, 俾, 比較.

 

點解個『畀』字 又有個穿頭嘅？噉係米唔穿頭嗰個先啱？？

我淨係知...『畀』係give..『俾』係let...

噉 『比』呢？平時唔可以用『比』嚟代替？？

『比』係米淨係可以用嚟解『比較』嘅意思？？

 

and...

個『咯』&『囖』

我成日都懷疑個『咯』字究竟啱唔啱。

 

and...

『噶』『嘎』『O架』

通常我都用『O架』，

有時都會用『噶』. 其實..『噶』有無錯？？

我見有啲人用『嘎』...我覺得係錯嘅..但係又唔sure...

 

and..

【返學，返工，我返嚟喇】呢啲係米一定要『返』唔可以『翻』

 

and...

『啲』 又可唔可以用英文『D』嚟代替呢？？

 

and..

『喇』.

『O勒』（唔識打..請原諒...）呢個『O勒』係米發『了』音？？

 

and...

『啊』 『亞』 『吖』

特別係『吖』....究竟啱唔啱O架？

例如.....『我跌咗啲嘢啊..』可唔可以『亞』or『吖』..?

                     『阿媽』...   又可唔可以『亞』or『吖』..?

 

and...

『依家』or『而家』...？？

『依個』or『呢個』準確嚟講係點寫？？

 

and...

『聽日』、『琴日』、『尋日』？？？啱唔啱O架？？

 

and..

『冇』『無』？？有乜分別？咩嘢時候用邊個？？

 

and..

『呱』or『啩』或者係其他？？

 

and..

『下』『嚇』？？？ 咁『吓』係米純粹簡體？同『嚇』？

 

and...

廣州話寫唔寫呢個『喔』O架？？我寫呢個『喎』又啱唔啱？重有個『嚄』呢？？？

 

 

 

好多語氣詞我依傢真係分唔清啊，好驚俾人撈化咗我啊...

『唉』..？？？!!!

                      

 

我真係好慚愧啊....我係一個土生土長80年代嘅廣州人.

但係竟然有咁多問題....

平時..自問..我因爲講得一口流利而標準嘅廣州話而驕傲..

 

但係嚟到呢度..突然間覺得自己真係有好多不足啊..

 

[ 本帖最後由 錯覺 於 2007-11-18 12:28 編輯 ]

卢总

哇，果然系「问题少女」啊！不过好学同肯问系好事！

由于时间关系，答住你几个问题先，其余请你去主页或者翻睇啲旧帖揾答案。

 

系「我『重』未得啊」。

 

个『嗰』字唔可以用『果』字代替。

 

 

关于「畀」同「俾」嘅分别，请睇：

http://general-lo.blogcn.com/diary,2223752.shtml

 

「畁」就第日再同你研究，唔可以用『比』嚟代替。

 

『咯』、『囖』、『噶』、『嘎』、『O架』等字将来会有专题讨论。

 

 

【返學，返工，我返嚟喇】呢啲一定要『返』，唔可以『翻』。

 

『啲』最好唔好用英文『D』嚟代替。

 

『喇』字，你跟住「喇叭」呢个词读就知点读。

『O勒』字应该系「嘞」，拼音系「ＬＥ」，发音同「勒」近似，绝对唔系『了』音！

 

『啊』 『亞』 『吖』将来都会有专题讨论。

『吖』字发第一声，即系「丫」。

『我跌咗啲嘢啊..』唔可以用『亞』or『吖』。

『阿媽』有人认为可以用『亞』，但唔可以用『吖』。

 

『而家』系最正确嘅：因为系而今＋家下。

一般写『呢個』。

 

一般系『聽日』、『尋日』。

 

『下』『吓』『嚇』？？？呢个要详谈。

 

寫呢個『喎』当然系啱啦！

 

多啲上嚟，就唔使好驚畀人撈化咗你啦！

所谓近朱者赤吖嘛！

                      

 

学然后知不足系好事，毋需要自惭形秽，或者妄自菲薄！

加油！畀心机！

錯覺

哇...好犀利啊...

 

好多謝你咁詳細嘅解析啊～～～

卢总

呵呵！油麻地啦！今日冇乜时间一下子全部帮你解晒，最好你都系睇下我畀嘅意见／建议，慢慢嚟，唔好心急！

huang

 

如果你問呢個問題

 

「個『嗰』字又可唔可以用『果』字代替呢？？」

我諗你嘅「流利而標準嘅廣州話」係乜標準了！

「嗰」到同「果」根本唔同音居然都可以混用我服得你緊要！

嗰 go 2果 gwo2

 

同樣我諗你應該分唔清呢啲字：角、國、過、裹.........

光、剛、缸.............

廣、州...............

[ 本帖最後由 huang 於 2007-11-19 23:19 編輯 ]

卢总

妖！你引用我嘅说话做乜啊？又唔系我嘅错！下次唔该睇清楚先至好「引用」回复！

大雄

问得好！呢啲问题都系平时最常见，错得最多嘅

中二仔

1.重係指"更";仲係指"次".係邊個自己決定.

 

2.嗰字用唔用果代替,係在乎你自己意願,無人可以控制.

而可唔可以,你可以自己从字形 意義 讀音各方面自己判斷.而且唔同地方亦有唔同.例如呢道係唔可以嘅.

 

3.畀可以寫做畁,而俾係"使"嘅意思,唔係我等平日講嘅畀

你問平時唔可以用比來代替...呢個係你個人意願,不過我勸你唔好.

 

4.咯同囖無人會話邊個啱,邊個唔啱,大家都係借音.祇要人哋明就無問題嘞.

 

5.噶,嘎,O架同上

 

6.返字我個人覺得好多時候可以通反 番 翻字,唔一定剩係可以用返

 

7.啲定D都係你個人意願

 

8.啊就實無人會話錯,亞同吖無人會話啱

 

9.首先你自己覺得咩叫"標準"先......"而家","呢個"都可以叫"標準"咖喇.

 

10.聽日、琴日、尋日無人會話錯.

 

11.冇同無分別在於一個係雅字,一個係俗字

 

12.呱同啩無人會話邊個啱,邊個唔啱,大家都係借音.祇要人哋明就無問題.

 

13.

and..

『下』『嚇』？？？ 咁『吓』係米純粹簡體？同『嚇』？

唔知你想怎................

 

14.係你個人意願........喎字應該無問題.喔同嚄比較少見.

 

 咁無主見嘅人眞係少見....

Lucciora

『下』『吓』『嚇』

 

普通話（正體字）：我要嚇一下他

普通话（简化字）：我要吓一下他

 

 

廣州話（正體字）：我要嚇吓佢

广州话（简化字）：我要吓下佢

 

其實「广州话（简化字）」原來版本係：「我要吓吓佢」，但係因爲「嚇」嘅簡化字係「吓」，所以寫成「我要吓吓佢」，就會出現混淆，所以就借咗普通話嘅文法，將第二個「吓」改成「下」

 

 

 

「阿媽」，香港有人用「亞媽」，唔可以講係錯，但係推薦用「阿媽」

 

[ 本帖最後由 Lucciora 於 2007-11-18 21:22 編輯 ]

錯覺

呢度果然高手如雲啊..................

錯覺

原帖由 huang 於 2007-11-18 14:29 發表   如果你問呢個問題   「個『嗰』字又可唔可以用『果』字代替呢？？」我諗你嘅「流利而標準嘅廣州話」係乜標準了！「嗰」到同「果」根本唔同音居然都可以混用我服得你緊要！嗰 go 2果 gwo2   同樣我諗你 ...

 

 

因爲而家上網大部分人都係用「果個」..........包括我啲同學＝＝＝.....and so on..

錯覺

原帖由 中二仔 於 2007-11-18 18:51 發表 .

 

 咁無主見嘅人眞係少見....

..

 

因爲呢個論壇啲人太professional....

令我好懷疑自己平時有無講錯囖.....

 

Lucciora

「果」係 gwo，因爲懶音關係，讀go，就變咗同「嗰」一樣，凡係用「果」嘅人都有懶音

 

PS：我唔算係乜高手，祇不過係咁啱識啫

 

 

[ 本帖最後由 Lucciora 於 2007-11-18 22:46 編輯 ]

月影

原帖由 Lucciora 於 2007-11-18 20:39 發表 『下』『吓』『嚇』   普通話（正體字）：我要嚇一下他普通话（简化字）：我要吓一下他     廣州話（正體字）：我要嚇吓佢广州话（简化字）：我要吓下佢   其實「广州话（简化字）」原來版本係：「我要吓吓佢」，但係因爲「嚇 ...

「睇下」、「搵下」之類本來就大概不應用「吓」

單一個「吓」字應局限於作語氣詞用比較恰當

Lucciora

原帖由 月影 於 2007-11-19 00:20 發表 「睇下」、「搵下」之類本來就大概不應用「吓」單一個「吓」字應局限於作語氣詞用比較恰當

 

即係按書面文文法，用「下」代替「吓」？

huang

原帖由 卢总 於 2007-11-18 14:36 發表 妖！你引用我嘅说话做乜啊？又唔系我嘅错！下次唔该睇清楚先至好「引用」回复！

 

 

小喇叭噉都搞錯！！

 

 

中二仔

其實我覺得"吓"本字就係"下",平日用"下"字都無問題.

中二仔

原帖由 Lucciora 於 2007-11-18 22:33 發表 「果」係 gwo，因爲懶音關係，讀go，就變咗同「嗰」一樣，凡係用「果」嘅人都有懶音   PS：我唔算係乜高手，祇不過係咁啱識啫    

其實人哋唔係有懶音,而係有"懶腦".

唔想打個"嗰"字,所以先會用"果"同"個"代替.

外外星人

呢张帖要顶返上嚟，费事有人成日问。

中二仔

原帖由 外外星人 於 2008-6-28 00:11 發表 呢张帖要顶返上嚟，费事有人成日问。

真係畀你吹脹........