|
一個唔成熟男子嘅標誌係佢願意為自己嘅事業英勇噉跳槽，而一個成熟男子嘅標誌係佢願意為自己嘅事業卑賤噉活著。——G肉佬
右眼重係一直眼眉跳，除咗因為身心疲勞之外，我嘅預感話我知應該重有啲嘢將會發生……不過為咗生活，即使每日做得咁辛苦，都冇辦法唔頂硬上，哎，鬼叫我窮咩！
今日健仔又過嚟我檔口揾我傾偈，每次過嚟佢都係同我傾佢工作嘅嘢，完全唔理我係咪鍾意聽。就喺佢大專畢業短短三年間，佢就打過好多份工，今次係佢畢業後嘅第7次炒老細喇。
「博士多過狗，本科滿地走。搞到我哋啲大專仔人工低待遇差！半月就清晒袋，年尾又冇雙糧。點頂啊？」
呢句嘢幾乎係佢嘅口頭禪，成日話自己係高辛一族，月入過慢。所以頻頻跳槽。不過條友又係太醒目過頭，遇著啲老細又忌才，所以都係冇咩運行。
出嚟打份牛工，其實邊有咁容易揾到錢嘎。不過打工打到佢噉都算瀟灑囉，唔使負咩責任，唔鍾意就炒老細，我都唔知幾羡慕佢，但佢反而話寧願好似我噉，幫自己打工好過幫人哋打工。哎，不過呢啲嘢，都係你睇人好，人睇你好嘅啫！
講真吖，家陣廣州人口爆棚，外來工多，大學生重多，自然難揾嘢做啦！就算揾到，要人工高、福利好，又要返工方便，基本上冇乜可能。加上人哋外來工幾百文個月都肯做，做爛晒個市，搞到人工普遍低晒，大學生又點啫？任你名校出來都當你傻仔噉使，啲人梗係心理唔平衡啦！不過好多人依家都未使養家，自然冇咩擔子，辛苦啲就寧願唔做，幾Free啊。
我就冇咁好命喇！日日要踎喺檔口等運到，生意好都話吖，生意唔好就白頭發都多幾條。講到尾都係自己生意，要對客人負責之余，都要對自己負責嘎！
[ 本帖最後由 gboss 於 2008-11-13 14:50 編輯 ] | 
發表於 2007-8-28 08:33:56
