nation state country

highyun

對於政治嘅詞彙，中文往往概念模糊，nation   state   country三個英文，都一律翻譯成“國家”。
因爲Q群有人講到，英國裏面嘅英格蘭、蘇格蘭、北愛爾蘭、威爾士 算係nation，但又唔算係國家，所以想開帖專門討論下呢三個英文單詞具體指代乜嘢。

馬萬千

估計:

state 相當於中國嘅「行省」啩, 同province差唔多

country就實係「主權獨立嘅國家」啦

nation 可能就大概相當於「特別行政區」咁上下高度自治

 

如果廣東可以做度Nation就好啦~

auyeung

花旗國嘅state雖然等同於別國嘅province。但係每個state又有自己嘅law，享有高度自主權，做事有自己嘅一套，冇乜大件事並唔需要向聯邦政府交帶。所以個人覺得又有所區別。

米字國嘅nation，只係名義上受聯合政府統治，其實質權力並唔比花旗國嘅state差，政府亦係名義上向英女王效忠。無論政治，經濟，體育，文化，都係另立爐灶，你話唔係各懷鬼胎？花旗國雖散亦合，側重好唔同！

country就大家都明喇！

 

 

Franklin

Country，Nation同State都可以譯成國家。用法純係習慣。

United Kingdom係聯合王國，裏面有四個王國，四個王國英文有時用4 countries，有時用4 states。但都唔係主權獨立國。

State係美國有時係州，有時係國。好似國務卿係The Secretary of State，國務院係Department of State。但係州又會有州嘅Secretary of State，分別係加多個州名。

英文一字多解，好似Home Affairs係內政，即國內事務，咪攪錯係家務。

廣州人喺圖盧茲

其實,佢哋好相似.淨係有如下分別:

 

country具體表示為有地理區域界定嘅「國家」;state就係由某一政治實體/政治形式所管治嘅「國家」;nation就係有共同嘅語言,種族,歷史以及背景嘅「國家」,未必係一個囉,可以有好多個,界定比較模糊囉.

 

舉個例,魁北克同法國,比利時,盧森堡同瑞士可以用nation,因為佢哋背景好似而且都係講法文為官語或者母語.點解唔用得country呢?因為魁北克唔係一個國家.如果冇咗魁北克嘅話,淨低嗰啲國家就可以用country表示.而state呢,好似法國同法屬圭亞那就用state喇,雖然圭亞那係由本土人管治,但佢哋仍然係法國人有權選法國總統.