|
當所有上班族重喺溫暖嘅被竇同周公傾偈嘅時候，有啲人已經開始咗佢辛勤嘅一日喇。——G肉佬（2007年3月14日）
豬仔鬧鐘如常喺五點半響起，無論系幾靚幾高級嘅鬧鐘，如果喺呢個時候響，都會覺得啲聲好乞人憎。我用埋食奶嘅力喺被竇爬出嚟撳停個鬧鐘，背心底橫好明顯係例牌裝束，我求其披咗件衫，洗面刷牙幾分鐘就搞掂。
定咗定神，覺得有啲肚餓，就喺冰箱攞咗只生蛋，剝殼生吞，未夠喉，又整多隻。之後我就攞起床邊嘅臂力器，出行力拗咗廿幾下，個身當堂暖咗好多，再睇下鍾，五點九個字，係時候出門，換咗衫，披埋件穿曬窿嘅圍群，將豬肉刀插喺腰間就行去檔口喇。
屠場開過嚟嘅車差唔多喺呢個時候到市場門口，通常賣幾多我就稱幾多，基本上日日都差唔多，如果有咩節日，可能就攞多啲，過磅後一手交錢一手交肉。搞掂曬啲瑣碎嘢，我一日嘅工作先至啱啱開始。
六點幾，市場開始陸續有人返嚟開檔，而我已經將嗰只未斬件嘅豬擺上豬肉台，伸嚇手腳，一提丹田氣，攞起豬肉刀就噉揮舞幾嚇，豬肉已經斬好曬件。所謂爐火純青，相信就係用嚟形容我嘅刀法咖喇！
豬頭肉、豬手腳、豬展、梅柳、蟹醃、肉頭、肉排……分好曬後有啲掛上鉤，有啲排好擺喺豬肉台就可以做生意喇。呢個時候市場開始多人，啲街坊路過都會同我打招呼。哎，我又要開始做生意喇，但好多朝九晚五嘅上班族依家重瞓緊又或者先啱啱起身咋！
[ 本帖最後由 gboss 於 2008-11-13 16:11 編輯 ] | 
發表於 2007-5-25 03:15:08