|
當你想換新手機、買MP3、升級電腦嘅時候，你有冇諗過，有啲人嘅生活重係好簡單呢？——G肉佬 （2007年2月3日）
「沙…沙……前文再續就書接上一回，話說……」
「喂，豬肉佬！開大聲啲啦，我聽唔到吖！」
「得嘞，唔好嘈住我聽古仔啦！」
每個中午12點呢個時候，我都會扭開收音機聽古仔。市場裏面重係好多人，因為係落班時候，啲人陸續買餸返屋企煮飯。呢個時候隔離檔蝦佬會叫我開大聲啲部收音機，等佢都可以聽到。
雖然我好想係呢個時候靜吓聽古仔，但係好明顯啲師奶唔贊成，仲一個個噉來騷擾我，有啲一路買一路吟吟沉沉，有啲埋來撚過曬啲豬肉又唔買，仲話唔係好新鮮?！哎，唔買就唔好撚啦，你只手好乾淨咩！搞到我聽個古仔都聽到唔三唔四。
部收音機係我細個嗰陣阿爺買畀我嘅，有我咁大囉！年紀大，機器壞，部嘢成日沙沙聲，可能經常開到好大聲，個喇叭有啲拆，睇嚟都係時候入博物館嘞。
於是我今日收左檔，衫都沒換就去電器商場睇下，諗住買部新嘅。點知商場裏面都賣曬手機、MP3、數碼相機、電腦啲噉嘅嘢。啲店員見我烏糟邋遢都唔想理我，聽到我問有沒收音機賣，個個都當我怪獸噉睇，有啲就叫我買部MP3、或者買部有收音功能嘅手機……
睇來都係去陶街逛下好過，商場都係唔多啱我。
（編者注：部分故事可能比較平凡，但有時生活就係噉嘎喇！如果中意睇我嘅故事，都可以登陸我嘅Q-zone：http://197999091.qzone.qq.com/）
[ 本帖最後由 gboss 於 2008-11-13 16:32 編輯 ] | 
發表於 2007-5-11 21:28:50