【原创】国庆节，逼地铁。

gzshuzha

【原创】国庆节，逼地铁。
   从晓港站落地铁，未试过逼到上唔到车嘅，国庆节先会咁。好在车密，再嚟一架就逼到上去。车厢入面人声嘈杂，本地人好少，净系听到角落头有人用广州话细细声埋怨：「都话唔好出嚟同人逼嘎啦，最衰你！」
   大多数人好似唔系好介意咁逼，佢哋用各自乡音大声讲嘢，兴奋写晒响块脸度。我差啲笑咗出来，有人以为我识听佢哋啲乡下话，停晒落来望住我。其实系我突然谂起有人咁样形容人多：「车厢里一眼望去尽是鲜花与牛粪。」
   旁边有人用手机听歌，「让我欢喜让我忧... ... 」我识听，周华健唱嘅。唱咗两句，车厢广播响起，海珠广场到嘞，又有好多人逼上嚟，好似有一句广州话专门形容呢种形势，啊，系嘞：「透气都痛！」
   心谂：如果日日要返工，又日日都咁逼就惨嘞。其实，人人心目中嘅悲惨生活都唔同，有人就话：「所谓悲惨生活就是白天看中国股票，晚上看中国足球。」佢哋可能唔知道，有人仲夸张，法国大文豪维克多.雨果名著《Les Misérables》，中译本将书名译成《悲惨世界》，原文并冇世界两个字，系译者加上去，大家睇完故事，喊得一句句，于是拍烂手掌，呢个书名真系译得好呀。
   车厢广播又响，公园前卒之到嘞，松晒，普通话，粤语，最后仲有英文，「Please watch the gap between the train and the  platform.」点解唔系好似香港同新加坡咁，用「Mind the gap」呢？返嚟查下「喂鸡」百科，原来美国纽约地铁长岛线都系用「Watch the gap」，仲特别强调真系有乘客跌落条罅，出咗事后，佢哋就四维挂晒呢句话嘅警告牌。
[ 本帖最後由 gzshuzha 於 2008-10-3 13:57 編輯 ]

普君南拆遷居民

如果嚟逼地鐵嗰班人嚟廣州純粹為咗旅遊，過完國㷫就走返外省，噉就逼啲都冇所謂。可惜。。。。

蛋糕仔

有得逼下都好啊，我住佛山架，重未有地鐵出街鬼咁麻煩！

gboss

原帖由 蛋糕仔 於 2008-10-3 14:46 發表 有得逼下都好啊，我住佛山架，重未有地鐵出街鬼咁麻煩！

 

 

而家整緊啦，遲啲你就可以體驗到咩叫「時間是擠出來的」，尤其你趕時間嗰陣。

 

By the way：「所谓悲惨生活就是白天看中国股票，晚上看中国足球。」呢句我鍾意。