廣州音重有冇保留「畀……過」嘅句式？

余OK

　　如題，感覺現代廣州音表示授受關係嘅句式係「畀……（物品）……（人物）」，或「畀……（人物）」，甚至有後生連用兩個「畀」，「畀……（物品）畀……（人物）」。而傳統嘅「畀……（物品）過……（人物）」似乎保留喺順德音等次粵音地區。

dada

原帖由 余OK 於 2008-6-6 11:22 發表 　　如題，感覺現代廣州音表示授受關係嘅句式係「畀……（物品）……（人物）」，或「畀……（人物）」，甚至有後生連用兩個「畀」，「畀……（物品）畀……（人物）」。而傳統嘅「畀……（物品）過……（人物）」似乎保留喺順德音等次粵音地區。 ...

《廣州話方言詞典》﹕「畀枝筆我。」我的確講﹕「畀枝筆過我。」

余OK

　　不過照我睇，就算廣州音保留咗呢個句式，十有八九「過」懶音成「個」，事關呢個句式確實撟（詏）口啲，唔適合城市快速生活節奏。

dada

唉﹗生活緊張點會造成懶音呢﹖嗰啲人嘅藉口啫。

我覺得﹐句式撟（詏）口都唔係理由﹐因為「畀枝筆過我」同「不過」一樣。會/願意講「不過」﹐就會/願意講「畀枝筆過我」。

余OK

　　現代廣州音已逐漸喪失唔少音素，上述嘅w介音退化得好明顯，即使曉分辨嘅後生都發得好模糊，講嘢快咗都會吞音。

highyun

重有「咪過」呢個詞，好早就已經變成「咪個」。

許冠傑嘅《有酒今朝醉》就有句「咪個謙虛」，《錢就會繼續嚟》有句「老友咪個論地位」。

中二仔

 冚辦爛未聽過

thisisivor

我喺深圳，多數人講「畀支筆俾我」。

Lucciora

我而家會多咗用「畀……過」嘅組合