Re:廣府口語
虽然如此如果要规范一个用字，约定俗成系咪最主要嘅因素呢？需唔需要参考其他因素？
有无一种情况，一个句子里面，对于某啲粤字，如果用翻本字大家（甚至连唔识粤语嘅人）都睇得明，噉用粤字好定系用本字好呢？
如果噉样嘅话，无可否认，嗰个句子可能丧失咗粤味
Re:廣府口語
粵語字經常有通假字喇。例如：[叼] 粵語讀作[擔]
噉你話寫成 [叼咗去] 或者係 [擔咗去] 邊個會好啲呢？
Re:廣府口語
有一個字“眲”，你哋查吓係咩意思。表示欺騙，目耳不相信也。而家又用咗個“口”字邊嘅“呃”嚟字代替。
你認爲噉樣係好定係唔好？
而我觀點認爲參半。
“呃”係個一個象聲詞，同欺騙無關，點解我哋平時用呢個字表示“欺騙”？純粹係借個音，而本應“眲”字就冇人識用嘞。
Re:廣府口語
「擔」字雖然唔係點好﹐但幾部字典都話「叼」讀「丟」﹐我查唔到有「擔」音。「呃」字冇欺騙嘅意思。「眲」比較好﹐又真係有ngak1音。不過「眲」有兩個意思﹕①「目耳不相信也」﹔②「輕視也」。《國語辭典》淨收入第二個意思。
Re:廣府口語
我赞成用“担”“呃”，因为呢啲系已经广为人接受架喇，如果你用返古字，反而冇人睇得明。Re:廣府口語
highyun在2005-12-17 22:12:47說道：我赞成用“担”“呃”，因为呢啲系已经广为人接受架喇，如果你用返古字，反而冇人睇得明。我反而唔係噉睇，噉样係因为呢家粤语规范化呢条路重有好多障碍，所以先会出现咁多借读字，如果连我睇粤语论坛啲人都係噉用嘅话，粤语迟早全部畀普通话同化晒。
我赞成用“眲”。
Re:廣府口語
雖好多人用[呃]~但自己都唔知啱唔啱~祇係人用我用~如果我哋都證實到用[眲]而且廣為流傳~噉粵協嘅工作先有意义啊~
Re:廣府口語
究竟应该用本字定系而家广为人接受嘅字，呢个系一个好好嘅论题，已经争论咗好耐。我觉得唔应该一概而论，对于某啲字，例如“重”，应该引导人用本字，但系对于某啲字，例如“担”“眲”呢啲，如果用咗反而搞到人哋睇唔明。Re:廣府口語
另一方面，我哋做粵語工作，都唔應該廢棄漢字嘅本義象形。用返本字，可以更加體現到漢字嘅精髓所在。Re:廣府口語
好難一概而論。原則上我認為﹐有本字﹐就要考慮用返本字。所以我諗過﹐「嚟」係咪要寫返「來」。但「嚟」字已經公認……我開始對個「眲」字有啲懷疑。根據《康熙字典》﹕「【廣韻】【集韻】𠀤尼戹切，儜入聲。【類篇】輕視也。【列子．黃帝篇】列子見商丘開，衣冠不檢，莫不眲之。 又【揚子．方言】揚越之郊，凡人相侮以爲無知，謂之眲。眲，耳目不相信也。【郭璞註】因字名也。 又【唐韻】【集韻】𠀤仍吏切，音餌。又【集韻】竹力切，音陟。又昵格切，音搦。義𠀤同。」
一直都係講緊輕視﹐霎時間加句「眲，耳目不相信也」﹐真係好難解釋。
或者要睇《集韻》﹐有三度解釋﹕①輕視也﹔②耳目不相信﹔③耳目不相順也。呢個「耳目不相順」有啲「睇唔順眼」嘅意思﹐即係輕視﹐唔係欺騙。
噉就可以解釋點解《國語辭典》淨收入﹕「眲﹐鄙視。」
Re:廣府口語
既然同意粵語規範化條路好長，就應該分步發展。比如個“嚟”，本字即使係“來”，但如果而家想一步到位用返“來”嘅話，我相信99.9%嘅人都認為係讀“loi”，並且否認佢係粵語字，噉樣推廣粵語何來有用？不如先使佢哋接受並正確使用“嚟”，等粵語規範化工作到咗一定程度，再考慮係咪有必要使大家接受個“來”。噉樣更實在。
其它字亦同理，想一步到位要求人哋使用本字，只會失收場。
Re:廣府口語
如果既然規範咗“嚟”做粵語字，等穩定咗之後，再規範“來”讀“嚟”音，就更加難，倒不如將“來”與“嚟”分音重加好。之前講過，粵語字以約定俗成爲主，呢個唔係唔好，但約定俗成嘅前提下都要對該字審愼考慮，如果該約定俗成嘅字係錯字，我哋應該考證返佢嘅本字或者較爲之正規嘅異體又或者另類嘅俗字。我認爲噉先係學術研究之路。
Re:廣府口語
学术研究当然要，好似我哋呢啲推广粤语嘅人，当然应该知道粤字嘅本字系乜嘢。但要搞清楚，唔可以要求所有人都有学术研究嘅水平，如果要推广呢啲已经荒废多年，且冇人知道嘅字，系100%冇可能。倒不如利用现有已经为人接受咗嘅字。嚟、噉、嘅、佢呢啲虽然都有本字，但系呢四个字已经为大众广泛接受，完全冇必要强迫人哋改。至于 吾、d、甘 呢啲，就系错写，一定要加以纠正。
Re:廣府口語
至于 吾、d、甘 呢啲，就系错写，一定要加以纠正。------
冇咩錯定對嘅，唔通平時同人傾計（噶）時，夾硬要人哋用呢啲字咩。
總之自己唔用，噉其它人見到願意改就改，唔願改或者係純粹貪打字方便，噉都冇計架（嘎）。
Re:廣府口語
唔係個個人都需要有學術研究嘅水平。如果解釋得有說服力﹐好多人都會接受嘅。不過﹐如果要將「佢」改返「渠」﹐我第一個就唔習慣。highyun可能話「嘅」嘅本字係「忌」。
王亭之引用詹憲慈作嘅《廣州語本字》﹕「作者引《詩經》:『大叔於田，叔善射忌』，鄭康成注，『忌』為語助詞，讀如『姬』音。『職』與『姬』祇是一音之轉。這兩句詩等如說：『大叔在打獵，佢射箭好好嘅』，何等生動。」
我認為啱啱相反﹐「叔善射忌」個語氣詞「忌」係通假﹐本字係「嘅」。
咬文嚼字 ==>「嘅」嘅本字﹖
http://bbs.cantonese.asia/topic.asp?l_id=16&t_id=1376
Re:廣府口語
講到呢個香港字----[嘅]，查實有唔少香港人都唔識得用。皆因[嘅]唔喺 big5 字集裡面，唔屬於基本字，取而代之用[嘰]。
究其原因，可能係同唔少输入法裡面只收基本字有關。
Re:廣府口語
dada在2006-2-19 4:50:21說道：我認為啱啱相反﹐「叔善射忌」個語氣詞「忌」係通假﹐本字係「嘅」。
咬文嚼字 ==>「嘅」嘅本字﹖
http://bbs.cantonese.asia/topic.asp?l_id=16&t_id=1376
“嘅”字系“同仇敵愾”的“愾”字的異體字，
當然不會是本字。
Re:廣府口語
夢星羽在2006-2-21 21:22:46說道： “嘅”字系“同仇敵愾”的“愾”字的異體字，當然不會是本字。
反而我覺得呢個“愾”係“慨”嘅異體字，而專用於“同仇敵愾”呢個詞當中。
而“嘅”係“慨”嘅另一個異體寫法。粵語當中借用“嘅”做形聲字（左形右聲），意指口語當中“的”之意。
Re:廣府口語
“嘅”字在《辭海》中被認為是“慨”字的異體字（見《辭海》“嘅”字條），但《康熙字典》中則認為“嘅”是“愾”字的異體字（見《康熙字典》“嘅”字條），
不過，《康熙字典》認為“慨”與“愾”兩字互通（見《康熙字典》“慨”字條），
所以“嘅”為“慨”字之異體字也無不可。
Re:廣府口語
我講嘅係語助詞「嘅」。《異體字字典》﹐「愾」字下﹐同時列「愾」同「嘅」﹐甚至「概」（http://140.111.1.40/yitia/fra/fra01412.htm）。但嗰本字典認為「愾」淨有「忾」一個異體字﹐同「嘅、概」冇正異關係。
至於「嘅」同「愾」﹕
①《詩經．國風．王風．中谷有蓷》﹕「嘅其嘆矣，遇人之艱難矣。」
《說文》﹕「嘅﹐嘆也。從口旣聲。《詩》曰：『嘅其嘆矣。』苦蓋切。」
②《詩經．國風．曹風．下泉》：「愾我寤歎，念彼周京。」
《說文》﹕「愾﹐大（太）息也。從心從氣，氣亦聲。《詩》曰：『愾我寤歎。』許旣切。」
③《段注．第八卷．欠部》﹕「嘅其嘆矣﹐愾我寤嘆﹐皆是嘆字。」
根據上便所講﹐我認為可以話「嘅」同「愾」相通﹐唔可以話邊個先、邊個正。不過﹐今日嘆息嗰個「愾」讀hei3（根據《粵語審音配詞字庫》）﹐所以我覺得好難話粵語嘅語助詞係「愾」。