【原创】细说新语（粤语版）

gzshuzha 發表於 2009-1-26 05:23:31

【原创】细说新语（粤语版）   作者：阿展   引言：   《世说新语》是我国魏晋南北朝时期「志人小说」的代表作，由南朝宋刘义庆编撰。依内容可分为「德行」、「言语」、「政事」、「文学」等三十六类，每类收有若干则故事，全书共一千二百多则，每则文字长短不一，有的数行，有的三言两语，由此可见笔记小说「随手而记」的诉求及特性。其内容主要是记载东汉后期到晋宋间一些名士的言行与轶事。书中所载均属历史上实有的人物，但他们的言论或故事则有一部分出于传闻，不尽符合史实。《世说新语》的文字一般都是很质朴的散文，有时用的都是口语，而意味隽永，在晋宋人文章中也颇具特色，因此历来为人们所喜读，其中有不少故事成了诗词中常用的典故。   声明：   以下内容是阿展原创，与以上著作毫无关系，敬请留意。 ------------------------------------------------------------------------------------------------------------- 2009.1.26(牛年初一） 《造人极限》   「死啦！死啦！又过咗一年，我个女就快三岁嘞，仲未生得出，你哋快啲帮下我啦。」    元旦假期后，三姑（吴君如）响电台节目《哗，哗，哗，打到嚟》中对两位靓仔主持（王怡兴+阮子健）咁讲。大家早就知道三姑好想生多个。   （dead air）「呢啲嘢我哋好难帮到你嗰啵，三姑。」两个靓仔好老实。    「帮我搵啲咸带返嚟，好难咩？」三姑问。    「哦！系咁咋？」靓仔松咗啖气。    「唔系你哋以为点帮呀？」三姑又问。两个靓仔畀佢玩死。    一月十七日《生果日报》有段三姑访问，照录如下：    现年43岁的吴君如坦言很珍惜时间努力造人，她笑说：「我一路都有搞，冇停止过，但系我哋唔系新婚夫妇，冇嗰种激情，有时食饱都眼瞓，大家又忙，一个月得嗰两日。我都有睇医生，医生话我呢嗰年纪，要有BB只系得百分之五嘅机会率，45岁已经系极限。」   【注释】王怡兴——香港新进才子，专栏作家；节目主持人，曾主持粤语教学电视节目《最紧要正字》。现与吴君如；阮子健共同主持电台节目《哗，哗，哗，打到嚟》。          阮子健——电台节目主持人，现主持健康教育节目《杏林茶》。现与吴君如；王怡兴共同主持电台节目《哗，哗，哗，打到嚟》。          dead air——广播节目中的冷场。   --------------------------------------------------------------------------------------------------------------------- 2009.1.26(牛年初一） 《快啲去死》   萧生有个助理，有日匿埋一边讲电话，细细声，讲咗好耐，收咗线仲眼红红，想喊咁样。   萧生问佢乜嘢事，佢话女朋友要过澳门玩。  「你话有嘢做，唔陪得佢吖嘛，男人老狗，使唔使喊呀？！」萧生话。  「你唔知嘎嘞，佢话要同个新男朋友去啵。」助理话。  「去几耐呀？」问。  「佢话去玩几日。」答。  「几日？渣都冇啦！摆明分手嗟。」萧生。  「我有问佢唔去得唔得嘎，佢话唔得。」助理。  「咁你有冇叫佢去死吖？」萧生替佢觉得不值。  「我叫佢买啲杏仁饼返嚟畀我。」助理话。  「咁你快啲去死啦！」萧生呢次火都嚟埋。   【注释】匿——躲藏          喊——哭          几耐——多久 ---------------------------------------------------------------------------------------------------------------------

UngooChan 發表於 2009-1-26 13:39:08

簫生嗰個係乜節目？邊日嘅？想搵嚟聽下。

gzshuzha 發表於 2009-1-26 16:29:40

原帖由 UngooChan 於 2009-1-26 13:39 發表 <a href="http://bbs.cantonese.asia/redirect.php?goto=findpost&pid=131144&ptid=14907" target="_blank"><img src="http://bbs.cantonese.asia/images/common/back.gif" onclick="zoom(this)" onload="attachimg(this, 'load')" alt="" border="0"></a>
簫生嗰個係乜節目？邊日嘅？想搵嚟聽下。 记忆所及，萧生起码有两次在节目中提及此事。其中一次应在旧年尾嘅「边缘回望」环节，具体边日就唔系好记得。我都系凭记忆写低，如有错漏，多多包涵。

gzshuzha 發表於 2009-1-27 05:46:03

2009.1.27(牛年正月初二）   《靓又通静》   「靓」字响粤语中使用频率极高，一系因为意义正面，二系好使好用。「靓仔」「靓姐」；「靓汤」「靓车」；唔止心情可以讲「靓」，居然「冲返个靓凉」都有人讲。    一直以为「靓」字系粤语独有，因为普通话并冇相应嘅词。直到最近阿扁「新抱」个名频频被媒体报道，先知「靓」字仲有另一个意思，另一个读音。黄睿靓，冇错系智慧与美貌并重嘅意思，不过「靓」字响呢度唔读LIANG ,要读JING（静）。    查在线《康熙字典》得：《註》師古曰：靚，卽靜字。《集韻》一曰女容徐靚。　又與靜同。可见「靓」为多音字。    原来「靓」与「静」竟然相通，古人真系好嘢。谂下真系冇几个「八婆」系靓嘅。当然超级大美人就唔同讲法。人人以为当年「大美人」与「大富豪」爆粗电话录音畀人挂咗上网，美人形象会大打折扣，声誉「一铺清袋」，结果旧年仍然修得正果，上岸嫁人。不过一般靓女最好「静」啲，笑下就好，太放就唔靓，古人教落：「靓又通静」。   【注释】新抱——儿媳

UngooChan 發表於 2009-1-28 00:35:47

嗰個超女，好似聽過有人叫佢張jing穎，有人叫佢張liang穎。

gzshuzha 發表於 2009-1-29 03:25:00

2009.1.29(牛年正月初四）    《练精学懒》    又到牛年，牛嘅特性除咗「硬颈」（牛咁颈）就系勤力。粤人一向都认为勤力系一种好品德，勇敢就几时都唔系。粤语话一个人「贪威识食练精学懒」，潜台词就系话佢好学唔学，成个「二世祖」咁。    不过「今时唔同往日——一个沙梨两个核」，人人都话要成功，最紧要「食脑」，唔系「勤力」。引用嘅例子极有说服力：「如果勤力都会发达，新界啲牛一早发晒达啦！」谂落又几有道理，于是人人绞尽脑汁，「食脑谂计」，务求睇下点样可以跷埋双手唔使做，又好快发达。反而循规蹈矩，勤力做嘢，会畀人话「蠢过只猪」。    有个香港人，决定以「贪威识食，练精学懒」，作为未来做人态度和行事目标。    佢咁样解析「贪威识食练精学懒」：「用尽一切机会一切形式表现自己独特的创作理念，此为‘贪威’；懂得如何被影响不被影响，如何吸收如何消化如何发挥，此为‘识食’；如何绕过重重障碍，不走人家的老路，爽快利落，另辟蹊径，此为‘练精’；至于‘学懒’，就是在大部分人汲汲营营忙得一头烟之际，你却有自成一家一派的闲。」    佢叫欧阳应霁，写咗本书叫《香港味道》，介绍香港地道美食。即系「搵食」。   【注释】谂——想          搵——找 

[ 本帖最後由 gzshuzha 於 2009-1-29 03:40 編輯 ]

肥腯腯 發表於 2009-1-29 11:28:41

果然够「细说新语」，楼主，咪畀佢停，加油！！我会时不时上来睇一睇。

gzshuzha 發表於 2009-1-31 00:20:21

2009.1.31(牛年正月初六）   《语言隔阂》   央视春晚收视调查显示广东有5.3%嘅人收睇，网友纷纷质疑呢个数字，实际上会唔会有咁多人睇啲咁「废」嘅节目。我觉得如果呢个5%系留粤过年外省人所占，0.3为真正讲粤语嘅观众，咁就比较可信。   粤人对春晚嘅抗拒源于央视对南方观众嘅忽视。语言类节目必以东北方言为主已渐渐成为传统，令粤人感觉呢场晚会系北方人嘅「包场」，南方人搵唔到一个节目系为佢哋准备嘅。政治教育几时都系晚会嘅主调，使咁多钱，目的系「愚民」，唔系「娱民」，话畀人听睇过春晚，会畀人话「憨居」。   地理上，广东远离权力中心，「山高皇帝远」，思想开放程度同北方人比较，就算唱《同一首歌》，有时觉得都唔系生活响同一个时代。   有人认为语言隔阂都系一个重要原因。香港人李照兴响《潮爆中国》一书中写道：「因着语言，广东省似乎变成中国中的另一国。当然，语言只是一部分，整体而言，广州话作为岭南文化的重心，才是确立广州作为中国另类文化衍生地的原因。」   同出一源，广州人讲嘅粤语同香港人讲嘅粤语有乜嘢唔同呢？此书作者可谓观察入微：「广州话同香港普遍说的广东话，小部分用语有不同，明显的分别则体现在粗口上，广州人讲粗口助语词多是女性器官，香港则偏好男性器官。」   听讲今年香港亚视直播央视春晚引起香港民众不满，如果要闹春晚，广州人会话「有乜Hi好睇呀？！」香港人就话：「有乜撚好睇呀？！」省港两地会有少少唔同。 【注释】憨居——低能；傻乎乎 

[ 本帖最後由 gzshuzha 於 2009-1-31 01:53 編輯 ]

gzshuzha 發表於 2009-2-6 02:13:36

2009.2.6(己丑年正月十二日）   《叻定系荦》   粤语「禀神无句真」系话人唔得真诚，对神灵尚且满嘴假话，对人可想而知。古时祭祀为表诚心，对祭祀品十分讲究，《曲礼》提到天子以「牺牛」祭祀，「牺牛」即纯色牛，天子祭祀必用纯色。后世「牺」、「牲」二字合成一词，「牺牲」本来是指供祭祀用嘅纯色全体牲畜，既纯洁又神圣，后来引申为崇高目标作出奉献。   「荦」（犖），指色杂不纯，不能用作祭祀嘅牛。专家认为，呢个其实系粤语「叻」字嘅正字。《唐韻》呂角切《集韻》《韻會》力角切，读音同「叻」字相近。唔系因为唔使畀人摆上台就算「叻」，系因为「荦」有另一层意思：特出，明显，「卓荦」即特出。《韻會》卓犖，超絕也。   边个先系正字唔紧要，不如讨论下点样先算「叻」，或者「叻仔」「叻女」系点样练成仲好过。   旧年被人劲插嘅「贱男」，唔计「玉女」嗰笔，廿零岁办本杂志，即成为香港最高销量双周刊，据闻年赚数千万元，然后高价卖出股份，套取过亿现金，被称最年轻退休人士。呢个可以叫做「叻仔」。   黄霑女儿黄宇诗旧年出咗本书，用老窦只歌名《问我》做书名，一本访谈录，里面就有倪震。：「我是一个香港叻仔多过一个才子。」佢对自己咁样评价。   点解可以成功呢？佢同其他人作个比较：「比我聪明的人不超过一成，但和我同样聪明甚至更聪明的人，九成都没我勤力。」于是佢就成功咗。   「我是愿意花多十倍时间追求1%进步的人，是不值得，但我有这个癖好。有才华更下死功夫，因为太多有才华的人不肯下死功夫了。」有才华，未算「叻」，识得咁谂，又肯去做，咁就「叻」嘞。   佢讲一件事说明自己点下死功夫：「中学的时候，喜欢一位姓蔡的女生，住在彩虹村，我就把电话本上所有住在彩虹村姓蔡的都打一次。我就是肯下死功夫的人，我就是相信勤力的人。虽然，我最后也找不到呢个女生。」   呢本访谈录出版后几个月，佢就玩铺劲嘅，有人话佢「贱」，有人话佢「叻」。   【注释】叻——聪明，棒。

gzshuzha 發表於 2009-2-19 01:30:34

2009.2.19(己丑年正月二十五日） 《屎艇快过龙船》    同台湾人打广东牌，好过瘾。秉承「密食当三番」的精神，「鸡」又食，「平」又食，时常将台湾佬的「大牌」「岔涴」，激到台湾佬「扎扎跳」。台湾牌规则比较有利于「做牌」，广东牌简单啲，就讲求个快，（甚至有人打「推倒糊」）不过有时「食食埋埋，唔够水鬼一啖」，输一盘大啲就「入肉」。    俗语有讲「屎艇快过龙船」，「细牌」食出总易过「大牌」，有次台湾佬「清一色」畀我「鸡糊」「岔涴」，就对我话：「你很缺钱吗？」我话：「唔系，你忧下自己条裤先啦...」佢唔明我讲乜嘢，我就用普通话讲：「我们现在《不差钱》。」   【注释】岔涴——破坏 

[ 本帖最後由 gzshuzha 於 2009-2-19 04:14 編輯 ]

gzshuzha 發表於 2009-2-20 00:30:11

2009.2.20   《打错更》     差唔多天光，眼瞓又肚饿，乜都写唔出，好在后街间云吞面铺好早就开，睇下钟，六点咁滞，于是着番衫落楼，谂住食碗面。     头耷耷行到落街，忽然一旧黑影响脚边冲过，消失响坑渠边，心谂实系野猫，穿过浓雾，见到有个小学生响药材铺门口，踎低绑鞋带，药材铺对面系间卖喜帖祭帐嘅铺头，门口企住个晨运嘅阿婆，见到我，手脚停晒望住，我急急脚行过。     去到云吞面铺，咦，仲未开门，往日开咗啦。唯有等下。唔知几时，前面街角有红灯闪闪下，慢慢转出一部警车，车停，过咗一阵先有个保安仔开门出嚟，我知个阿蛇响车入面，保安仔离远问：「你响度做乜嘢呀？」条街好静，有啲回音。     「等开门食面囖。」我答。     「依家几点呀？」又问。     「点知呀，六点几卦。」我答。     「五点都未够啵！」佢话。    我当堂打个特，唔通打错更？九成九系啦。「唔好意思，阿蛇，打错更，打搅晒。」    警车慢慢开走，条街好静，我慢慢度返上楼...「噗」一声，一个黑影脚边冲过，又系只衰猫，我谂谂下唔多对路：头先明明见到阿婆晨运，仲有个学生添，依家乜都唔见，系啵，咁早点解会有小学生嘅？越谂越寒，快啲上楼，口噏噏：「打错更，打错更...」     【注释】打错更——看错钟点

highyun 發表於 2009-2-20 20:22:32

呢個系列會整理上網站，好嘢一定有人識欣賞，唔好俾佢停。

gzshuzha 發表於 2009-2-26 11:56:50

2009.2.26(己丑年二月二日） 《崩口人忌崩口碗》    粤语俗语「崩口人忌崩口碗」，与之相对应嘅北方话俗语应该系「那壶不开提那壶」。但唔系完全对应咁简单。    粤语呢句，一个「忌」字好紧要，不论主动被动，提醒人要顾及人哋嘅感受，讲嘅系行为规范，粤人认为人人应该心存厚道。而北方话呢句，讲嘅只系行为本身，是否恰当，未有评说。两句有少少唔同。    其实生活中，最常见嘅系另一种情况——「说者无心，听者有意」，出言不慎，有人会对号入座，因此产生误会。「祸从口出」，得罪咗人都唔知。    某日饮茶，酒楼厨房走出相熟的厨师，于是随意打个招呼：「咩咁得闲呀？」谁知对方脸色一沉，回一句：「如果你做老细就人都死嘞！」场面一时十分尴尬。事后一想，我可能响一个唔适当嘅时间讲咗唔适当嘅说话。厨师佢辛苦半日，正想出嚟「偷鸡」一阵，十分留意会否被人发现，我一句「咁得闲」就会被佢理解为有意「踢爆」，正是「说者无心，听者有意」，引起误会。    另一件事，今年牛年，又叫「己丑年」，有人利用粤语谐音，自编创意十足新春祝词：「几丑唔紧要，新春要快乐！」，用短信广发亲朋好友，人人收到都受落，偏偏有人不解个中意趣，对号入座，认为影射自己，回复：「你话我丑！？」真系大煞风景。莫非此人正是传说中嘅「丑人」？如此敏感，已界病态边缘。    【注释】偷鸡——偷懒

monfan 發表於 2009-3-15 22:46:38

我哋高中qq群公告有如此一句：
 
廿四校训：练精学懒贪威识食——其军题  <IMG alt="" src="http://bbs.cantonese.asia/images/smilies/default/titter.gif" border=0 smilieid="9"> 
 
原来校长有如此远见，今日方为醒悟<IMG alt="" src="http://bbs.cantonese.asia/images/smilies/default/tongue.gif" border=0 smilieid="7"> ！高！

gzshuzha 發表於 2009-3-16 04:51:44

2009.3.16(己丑年二月廿） 《避无可避》    歇后语大致分为两大类，推理类与谐音类。例如「床下底破柴——撞板」就系推理类，而谐音类好多与方言有关，比如呢句「鼻哥窿担遮-----鼻毛(避无)可避」，系用谐音，用其他语言就讲唔通。呢句歇后语点用？可用「躲猫猫」事件举个例。    「躲猫猫」即系「伏匿匿」或者「捉伊人」，儿童游戏，人人玩过，点解大人玩就会冇命呢？听落一头雾水。监仓地方浅窄，除咗张床，就「单眼仔睇老婆——一眼睇晒」，点玩呀？匿埋去边呢？根本就系攞嚟讲，擘大眼讲大话。借西人一句话：「你挑战我的常识！」   冇人信就改下口，后来又话「致命游戏」唔系「躲猫猫」，系「盲人摸鱼」至真，即系话玩死人嘅系另一种游戏——「摸盲盲」，因为发现咗死者对眼畀人蒙住。点知网民打死都唔信，因为呢个解释仲离谱，地方咁细，回旋余地有限，捉人者两手一横，其他人就「鼻哥窿担遮-----鼻毛(避无)可避」，根本冇得玩。卒之，你唔信，我开估：真相就系死者李荞明因被「牢头狱霸」殴打时，头部撞墙致受伤、死亡。   专家考证，「伏匿匿」同「捉伊人」呢种游戏，响珠江三角洲，要比「摸盲盲」更加流行，游戏玩法可以睇出原因：一系游戏体现水鬼搵替身嘅心理，捉人者好似水鬼搵替身，畀人捉到就要替他成为捉人者。二系游戏允许「埋舟」，被捉者只要「掂」到墙，就可大叫「埋舟」，就算安全。好似落水者手触到「船」就安全获救一样，符合水乡现实生活。   我估「躲猫猫」事件如果发生响珠三角地区，根本冇人会出嚟解画，点解？仲记唔记得「伏匿匿」点玩嘎？猜呈沉猜输咗，就要双手伏埋墙，口中开始倒数，其他人四散躲藏，呢个时候佢最恶，唔理你匿好未，佢都会大叫一声：「你话唔得我话得！」    【注释】掂——触碰          猜呈沉——剪刀石头布

gzshuzha 發表於 2009-3-25 17:49:18

2009.3.25(己丑年二月廿九日）  羊城旧事——婆乸数    算术之中，除了珠算，笔算，粤人中还流行一种简易心算——婆乸数。旧日婆乸，今日师奶，所不同者，婆乸旧时鲜有机会受教育，家头细务，又不免与数目打交道，于是坊间便流行一种简单明了，易学易用的算术——婆乸数。    婆乸数算法大概如下，例如：三个人，各有六文钱，问三人共有几文钱。识九九表者，六三一十八，就一句口诀而已，唯婆乸数则先将两个六文相加得十二，再将第三个六文加入始得十八之数。又如买物，三文钱一两，十六两（旧称一斤）共需钱几文？会算术者，三乘以十六，便得四十八之数。唯婆乸数则必先计三文钱一两，十两为三十文，然后六个三文逐一加入,始得四十八文之数.这种算法,若是数少,简单明了,不易错数,若是数多,则十分繁复.    时至今日,无机会受教育者已十分罕见,但心算不灵者则大有人在,遇上有数要计,手边又缺一部计算器时,旁人定会提醒你:"用婆乸数计咪得囖!".

頁: [1]

粵語協會's Archiver

【原创】细说新语（粤语版）