親歷粵式家族白事之瑣憶
<p> 上兩日，家族一位叔父因急病匆匆離世。喪事當晚馬上張羅，現將記憶所及之過程寫於此，聊以作為我新新一輩對粵式白事風俗些少經驗之談：</p><p> 得知此噩耗其時已為當日下午挨晚時分，逝者已由醫院轉返去家中（眾所周知，若然逝者過身時唔喺自己屋企係唔吉利嘅事情，我諗呢個係歸於中國傳統「葉落歸根」之信念）。因本人身為嫡系親侄，必須到達親屬家中「守夜」，故急忙爬咗幾啖飯連隨沖埋涼，着咗深色嘅衣服（凡遇白事一般衣着為白色或深色衫褲，千祈唔可以出現紅色，大人教落嘅），袋埋撫恤金即出門趕赴現場。</p><p> 此前本人未眞正經歷過喪事嘅整個過程，故冇乜印象。請允許我如實較詳細噉敘述呢次嘅情形，諸位看倌請唔好見怪，莫以恐怖事視之。當晚去到親屬屋企，祇見停屍嘅地下一樓已燈火通明，有人正清除緊門口嘅揮春。入到屋內廳堂，見到逝者已被安放到由兩張長板櫈、兩塊床板、一張草席組成嘅靈床上，屍身覆蓋住舊嘅薄棉被，白毛巾蒙頭；床前一個香案，上放香枝及其他祭祀用品，香案側跟兩個花盆用作臨時香爐，上點數支香火，花盆旁邊各為一支蠟燭，收屘又喺床頭前加點兩盞火水燈（就係細時屋企重未有電燈點嚟照明嘅嗰種，而家好難再見得到）。廳堂內已坐住幾個聞訊趕來嘅各方親戚，逝者之子女即我嘅堂兄姐赤腳坐於地上一草席。我先上前裝了三支香，鞠咗三躬（此為每位來客必做之事），跟住埋位坐住。其間幾個大人忙於東奔西走，準備各式雜項，因此中規例太過繁複，我亦冇參與其中，故按下不表。及後過來嘅親朋戚友逐漸增多，乃父負責記錄每位來客畀撫恤金嘅細目（執筆記錄之人祇能係同一個人，唔可以出現他人代筆記錄，但聞講其他地方係可以嘅，總之各處鄉村各處例）。</p><p> 夜深時，部分人出外買返嚟一啲林林糝糝嘅用品。其中有幾張布（但稱為「被」），有一張係以我嘅名義買嘅（因為我係逝者之侄）；另外有一張白色上面寫滿晒好似佛偈一樣嘅字，一張金色嘅上有唔曉形容嘅圖案。大人用毛筆喺嗰兩張布上寫上逝者嘅姓名，並喺白色嗰張寫埋出生時辰八字等（由做此行嘅人算出並寫返嚟），値得一提嘅係，喺生辰處係寫「民國卅十七年」（眞係英年早逝呀），大家討論終亡時間係咪寫返民國九十五年時，因為考慮到民國嘅稱呼喺1949年後嘅大陸早已蕩然無存故重係寫返公元紀年。然後全部「被鋪」一概鋪於屍身上。其家人重準備定一袋逝者生前嘅衣服攞去陪葬。</p><p> 輾轉已達深夜時分，家人商討何時去「買水」。此過程其實就係喺當日水大（即潮脹）之時，鳧一桶水，浸上黃皮葉然後到路邊祭祀嘅過程。至於當日何時水大，做過農民嘅大人先有體會，當然亦有人到過河邊睇過親自驗證該時辰係咪準確。「買咗水」後，放於門外不遠嘅街道中央，跟住一行人等披上白衣走出門外跪拜，次序分別為逝者之子、女婿、細叔、本人（侄仔）、其他次親。作為侄仔嘅我需負責點三支香並放於路中。呢個過程比較短暫，個中細節冇太深刻體會，因為有好多事情係大人負責搞掂嘅。</p><p> 接落嚟一直到天光都冇乜特別嘅嘢要搞。當然我哋就要坐喺停屍嘅廳堂成晚冇瞌過噉守靈嘞。第二朝食咗啲早餐，啲女眷就出發到附近佛堂打齋嘞（可能係因為該親屬係信佛嘅，所以有此一程序）。其他人就聯絡好殯儀舘嘅工作人員前來做善后工作（而家好少地區重有「入土為安」，除非偷偷摸摸啦），並辦理埋死亡者殯葬證等kik1 lik1 kwaak1 laak1嘅程序。 此後已通知到嘅來客基本上都陸續到齊嘞，食過「死人飯」後，殯儀館嘅靈車亦已到，按照此前已協商好嘅程序對逝者進行各種處理工作。中午1點準時出柩，近親嘅披上白衣，其他就每人手執一白手巾，出門前亦有一番送別儀式，如繞靈車一週、派發「飛髮錢」等，個中細節唔作過多敘述。上文已敘述本人嘅角色為逝者之侄，故需要手執一籮祭祀用品，並喺到殯儀舘嘅一路上撒溪紙。</p><p> 到達殯儀館，經過遺體告別儀式等短暫過程即進行火化，為尊重逝者對此處唔細述。完畢留返其中三支點着嘅香「引魂返歸」，而本人就負責歸途上逢過橋即掟一銀仔作為「過橋費」。返歸後眾送靈者按規例每人都去飛咗髮並食埋晚黑第二餐「死人飯」當日即告作罷。</p><p> 及後嘅各項事務如墓地選擇、「頭七」、「百日」等等待過後再處理。</p><p> <br/>---------------------------------------------------------------------------------------------------------------<br/> 後記：中國嘅各種習俗繁文縟節甚多，我哋呢一輩恐怕冇乜幾個熟稔，譬如上述之內容祇係成個白事過程中嘅一小部分細節，有好多環節未能一一細述，亦非本人能夠完全通曉。憶往昔，此類習俗肯定重要繁複得多。上文純屬意識流程，冇過多考慮行文遣詞，可能會睇到一嚿嚿。另對於傳統文化，本人始終堅持去其糟粕取其精華嘅態度，還望以後能夠保留更多傳統之神髓，摒棄不良之俗套。</p>[此帖子已經被作者於2006-11-17 20:17:54編輯過]
<p>前年我都经历左一次，现在已简化很多了。但还是很烦琐</p> 今日去咗做「頭七」，可能程序簡化咗好多，祇係裝咗拄香跟住攞咗封紅紙就完成任務。 大家知唔知道「回魂」同「百日」之時有啲乜搞作？ <p> “回魂”好似係“頭七”嗰晚等逝者嘅魂魄歸來。係咪要糝啲糯米喺屋度？“百日”唔知又有咩儀式，我浄係知道屋企親人過身，習俗係一百日之內都唔好去人哋屋企。</p><p> 呢啲嘢可能人哋有所顧忌唔敢講太多，所以回帖咁少。</p> <span class="Apple-style-span" style="font-size: large;"><div><br></div>这些繁文缛节，现代人已经不搞。</span><div><span class="Apple-style-span" style="font-size: large;"><br></span></div><div><span class="Apple-style-span" style="font-size: large;">以前大学有个同学，老家在肇庆山区，就试过一个人陪着阿爷条尸过夜。好在他本人颇为「沙胆」，命格又够硬。</span></div> <P>原帖由 <I>余OK</I> 於 2006-11-22 19:58 發表 <A href="http://bbs.cantonese.asia/redirect.php?goto=findpost&pid=26129&ptid=3986" target=_blank><IMG onclick=zoom(this) alt="" src="http://bbs.cantonese.asia/images/common/back.gif" onload="attachimg(this, 'load')" border=0></A> 大家知唔知道「回魂」同「百日」之時有啲乜搞作？ </P>
<P>我嫲嫲走嗰时，头七系摆好多嘢下，我都唔记得有乜，但系就有一啲可以证明逝者曾经返过屋企嘅嘢，不过，我嫲嫲头七嘅第二日朝头早，我冇发现过有任何所谓嘅痕迹，就系当晚发梦见到佢上楼阁仔睇下我。而且我好记得佢着住嘅衫系我哋烧畀佢嘅，系佢平时好钟意着嘅衫。</P>
<P>我唔记得百日有冇搞乜，但我记得，好似系尾7先上神台嘅，应该系第七个七。不过，后来嘅人都唔再做咁长嘅『七』，好似三七就上神台嘞。</P> 就繁瑣講兩隻字：同感～
[ 本帖最後由 gboss 於 2010-1-12 09:28 編輯 ] 隨便再講一句，我太婆1999年喺順德龍江過身嘅，幾長命，呵~99歲，不過，以我記得嘅一段，特別系逝者枕住嘅嘢，着住嘅衫都好似有啲出入，所以，真系各处乡村各处例啩~~
頁:
[1]