上兩日,家族一位叔父因急病匆匆離世。喪事當晚馬上張羅,現將記憶所及之過程寫於此,聊以作為我新新一輩對粵式白事風俗些少經驗之談: 得知此噩耗其時已為當日下午挨晚時分,逝者已由醫院轉返去家中(眾所周知,若然逝者過身時唔喺自己屋企係唔吉利嘅事情,我諗呢個係歸於中國傳統「葉落歸根」之信念)。因本人身為嫡系親侄,必須到達親屬家中「守夜」,故急忙爬咗幾啖飯連隨沖埋涼,着咗深色嘅衣服(凡遇白事一般衣着為白色或深色衫褲,千祈唔可以出現紅色,大人教落嘅),袋埋撫恤金即出門趕赴現場。 此前本人未眞正經歷過喪事嘅整個過程,故冇乜印象。請允許我如實較詳細噉敘述呢次嘅情形,諸位看倌請唔好見怪,莫以恐怖事視之。當晚去到親屬屋企,祇見停屍嘅地下一樓已燈火通明,有人正清除緊門口嘅揮春。入到屋內廳堂,見到逝者已被安放到由兩張長板櫈、兩塊床板、一張草席組成嘅靈床上,屍身覆蓋住舊嘅薄棉被,白毛巾蒙頭;床前一個香案,上放香枝及其他祭祀用品,香案側跟兩個花盆用作臨時香爐,上點數支香火,花盆旁邊各為一支蠟燭,收屘又喺床頭前加點兩盞火水燈(就係細時屋企重未有電燈點嚟照明嘅嗰種,而家好難再見得到)。廳堂內已坐住幾個聞訊趕來嘅各方親戚,逝者之子女即我嘅堂兄姐赤腳坐於地上一草席。我先上前裝了三支香,鞠咗三躬(此為每位來客必做之事),跟住埋位坐住。其間幾個大人忙於東奔西走,準備各式雜項,因此中規例太過繁複,我亦冇參與其中,故按下不表。及後過來嘅親朋戚友逐漸增多,乃父負責記錄每位來客畀撫恤金嘅細目(執筆記錄之人祇能係同一個人,唔可以出現他人代筆記錄,但聞講其他地方係可以嘅,總之各處鄉村各處例)。 夜深時,部分人出外買返嚟一啲林林糝糝嘅用品。其中有幾張布(但稱為「被」),有一張係以我嘅名義買嘅(因為我係逝者之侄);另外有一張白色上面寫滿晒好似佛偈一樣嘅字,一張金色嘅上有唔曉形容嘅圖案。大人用毛筆喺嗰兩張布上寫上逝者嘅姓名,並喺白色嗰張寫埋出生時辰八字等(由做此行嘅人算出並寫返嚟),値得一提嘅係,喺生辰處係寫「民國卅十七年」(眞係英年早逝呀),大家討論終亡時間係咪寫返民國九十五年時,因為考慮到民國嘅稱呼喺1949年後嘅大陸早已蕩然無存故重係寫返公元紀年。然後全部「被鋪」一概鋪於屍身上。其家人重準備定一袋逝者生前嘅衣服攞去陪葬。 輾轉已達深夜時分,家人商討何時去「買水」。此過程其實就係喺當日水大(即潮脹)之時,鳧一桶水,浸上黃皮葉然後到路邊祭祀嘅過程。至於當日何時水大,做過農民嘅大人先有體會,當然亦有人到過河邊睇過親自驗證該時辰係咪準確。「買咗水」後,放於門外不遠嘅街道中央,跟住一行人等披上白衣走出門外跪拜,次序分別為逝者之子、女婿、細叔、本人(侄仔)、其他次親。作為侄仔嘅我需負責點三支香並放於路中。呢個過程比較短暫,個中細節冇太深刻體會,因為有好多事情係大人負責搞掂嘅。 接落嚟一直到天光都冇乜特別嘅嘢要搞。當然我哋就要坐喺停屍嘅廳堂成晚冇瞌過噉守靈嘞。第二朝食咗啲早餐,啲女眷就出發到附近佛堂打齋嘞(可能係因為該親屬係信佛嘅,所以有此一程序)。其他人就聯絡好殯儀舘嘅工作人員前來做善后工作(而家好少地區重有「入土為安」,除非偷偷摸摸啦),並辦理埋死亡者殯葬證等kik1 lik1 kwaak1 laak1嘅程序。 此後已通知到嘅來客基本上都陸續到齊嘞,食過「死人飯」後,殯儀館嘅靈車亦已到,按照此前已協商好嘅程序對逝者進行各種處理工作。中午1點準時出柩,近親嘅披上白衣,其他就每人手執一白手巾,出門前亦有一番送別儀式,如繞靈車一週、派發「飛髮錢」等,個中細節唔作過多敘述。上文已敘述本人嘅角色為逝者之侄,故需要手執一籮祭祀用品,並喺到殯儀舘嘅一路上撒溪紙。 到達殯儀館,經過遺體告別儀式等短暫過程即進行火化,為尊重逝者對此處唔細述。完畢留返其中三支點着嘅香「引魂返歸」,而本人就負責歸途上逢過橋即掟一銀仔作為「過橋費」。返歸後眾送靈者按規例每人都去飛咗髮並食埋晚黑第二餐「死人飯」當日即告作罷。 及後嘅各項事務如墓地選擇、「頭七」、「百日」等等待過後再處理。 --------------------------------------------------------------------------------------------------------------- 後記:中國嘅各種習俗繁文縟節甚多,我哋呢一輩恐怕冇乜幾個熟稔,譬如上述之內容祇係成個白事過程中嘅一小部分細節,有好多環節未能一一細述,亦非本人能夠完全通曉。憶往昔,此類習俗肯定重要繁複得多。上文純屬意識流程,冇過多考慮行文遣詞,可能會睇到一嚿嚿。另對於傳統文化,本人始終堅持去其糟粕取其精華嘅態度,還望以後能夠保留更多傳統之神髓,摒棄不良之俗套。
[此帖子已經被作者於2006-11-17 20:17:54編輯過]
|