首先好多謝 high 兄嘅支持。
其次，想同各位對「漢」有深厚感情嘅仁兄講一下，你哋根本就唔使擔心漢字會有乜嘢西瓜豆角，因為有十幾億人日日夜夜、分分秒秒都用緊，甚至研究緊。即使拼音字，都要用漢字嚟做注解嘅。
最應該擔心嘅反而係越音，你哋又有冇真真正正擔心過呢？有冇認認真真噉研究過呢？正如余OK所講嘅，變咗味（即係變咗質）嘅粵語，你哋重要唔要呢？對唔對得住我哋嘅啲祖先呢？對唔對得住養咗我哋世世代代嘅越地嘅山山水水呢？我哋識聽我哋嘅太公嘅太公嘅太公嘅太公嘅太公講嘅嘢，但係我哋嘅下一脫人呢？兩個字，心寒。
yigaa（而家）一聽到有人將個「關」字當動詞用，就即刻火都嚟埋，呢啲人正式係求其見到個男人有鬍鬚就認老竇。
講返正題，先簡單講一講拼音字構成原則（我嘅諗法）：
1、盡量用 yigaa 已經有嘅拼音造詞，但係個別亦都應該遵循世界已經習慣咗嘅發音規則，譬如：用 "y" 代替 "j"。（呢一點係 desmond 提出嘅，我表示支持）（音標就用 "j"）
基本上識講就識寫，識睇就識講。
2、以詞為單位。
噉樣我哋嘅書面表達就會更加嚴謹。
前便講過嘅某啲縮略詞嘅構造規則，大家應該係熟悉嘅，譬如：mhou（唔好）— m'ou，即係英文嘅 do not — don't
至于單音詞，除咗最常用嘅單音詞之外，都按照單音詞既定嘅構造規則嚟寫（大家有冇發覺，只要係單音詞，即使唔係最常用嘅，都係比較常用嘅，一日都會講幾十次，應該好容易掌握）。
gam（噉，E:so），邊啲單音詞係最常用嘅呢，我哋試下返番我哋嘅祖先嗰度——原始時代，我哋嘅祖先開始講嘢嗰陣，佢哋首先會講啲乜嘢呢？
呢啲最常用嘅單音詞大概用一頁紙就寫得哂。
題外話，個 "gam" 字係「噉」又係「咁」，好奇怪，英文都係 "so"，英文冇分開寫，而且寫咗咁多年都冇事，我哋有冇必要分開寫呢？不過，如果係得嘅話，分開寫都係好啲嘅。
3、用現時已經習慣咗嘅英文字母，盡量唔標注聲調（少數可能要標）。
前便講過，幾乎每一個詞都係 duklap 嘅，因此，即使唔標注聲調，都唔會產生歧義嘅。就算標注聲調，啲單音詞都一樣會有好多同音字。而且會增加難度，試諗一下，冇人寫，又點會有得讀呢？用詞性嚟區分就簡單得多嘞，亦都更加科學。
啲鬼佬學講粵語嗰陣，基本上都係唔分聲調嘅，幾乎全部講成第一聲（唔信嘅話，大家可以試一下扮鬼佬講粵語），如果要佢哋分清楚咁多個聲調，佢哋真係寧愿唔學喇。
可能有人會擔心，唔標注聲調會唔會令到我哋冇咗聲調咖。梗係唔會，漢字都冇標注聲調，我哋唔係一樣分得清楚咁多個聲調咩。
我哋先分兩步嚟行：
第一步，確定單音詞嘅構造規則，假如用詞性區分，有幾多種詞性，用乜嘢字母表示（只要有規律就得）。
第二步，確定最常用嘅單音詞。
發表於 2008-1-10 23:30:30
發表於 2008-1-18 21:32:06
