系人都讲母语

外外星人

系人都知，汉语系由七大方言构成嘅，佢哋系粤方言、吴方言、闽方言、北方方言、湘方言、赣方言同埋客家话。
有年时，唔知边个定咗条规矩：以北京话为基准音嘅北方方言做咗国语（而家叫「普通话」），又唔知几时开始，普通话（以下简称「普语」）成咗催命鬼，夹硬要两广同胞唔讲粤语净系讲普语，连啲僆仔僆女喺学校都唔准讲母语（粤语），话系要做「文明人」喎。
做人真系要读多啲书先得，唔系都睇唔明世间发生咗啲乜鬼嘢事！好似呢单嘢噉吖，我读书少就唔系好明嘞，唔通讲粤语就唔文明，讲普通话先至系文明，噉人哋嗰啲讲英语、法语、日语、俄语、德语、西班牙语、葡萄牙语、阿拉伯语……嘅人又点啊？重要畀人屈，话我哋讲嗰啲系「鸟语」兼好鬼死难听。
其实，我觉得啲「鸟语」几好啫，正所谓鸟语花香，重好和谐好环保添！之不过，啲北方同胞就唔系噉睇嘞，话我哋系「鸟人」讲「鸟语」喎。「鸟语」我都接受得倒，但系「鸟人」好似唔多似人噃，系唔系闹人嘅说话嚟咖？
老实同你哋啲北方同胞讲啦，我哋自细就听呢啲「鸟语」，大个咗都系讲呢种话，如果我哋又学你哋北方同胞啲口吻噉话番你哋：我哋都听唔明你哋噏乜，你哋够系讲「鸟语」嘅「鸟人」咯！你哋听落系唔系觉得好唔舒服呢？唔舒服。噉就啱嘞！我哋听你哋噉讲都会一样唔舒服啫，重会好嬲添！噉你哋就唔好噉话我哋喇，更唔应该逼我哋讲普语嘞！唔系佛都有火！
问心嗰句，普语其实都唔系咁难听、难讲、难学啫，我哋对住你哋嗰阵，一样会同你哋讲普语咖。但千祈唔好逼我哋噃，唔系我哋会嬲、会唔出声，甚至有人重会睩大眼嬲爆爆噉倔住你哋咖！噉到时又畀你哋话我哋冇文化、冇礼貌嘞！你哋话嘞，系唔系冤过窦娥呢？
讲到文化，听讲你哋话我哋冇文化，噉唔知你哋又可唔可以话畀人听，咩叫做「文化」呢？好似你哋成日噉闹人哋冇文化，噉算唔算好有文化呢？认真系抬棺材甩裤——失礼死人！我哋要揞住半边嘴笑先得！
不过噉，其实我哋惯咗谦虚咖，只要你哋讲得出我哋边度冇文化，我哋都会谂真啲你哋讲得啱唔啱。如果唔系，噉就系你哋生安白造，咁唔和谐嘅事你哋都做？所以呢，话人之前要先谂下自己系唔系真系有文化、人哋系唔系真系冇文化。如果冇证冇据，对唔住，告你哋诽谤又点睇啊？大系大剂咗啲，噉就唔好乱咁吠嘞！除非你哋真系圣人、我哋真系衰人。
不过睇嚟都唔使谂嘞，呢啲噉嘅事系唔会有嘅。点解？皆因我哋有书读、有饭开、更唔使穿州过省去揸篼咁折堕，重可以用白话以书面语嘅形式写返出嚟，等其他人明白，我哋冇文化？冇乜可能啰！你哋都系捽干净啲老泥再嚟同我哋讲啦！！！