|
今日睇咗《頤和園》，畀電影裏邊嘅畫面吸引住，咁正嘅電影喺中國冇得睇，真係可惜。如果婁燁導演係李安，電審局會唔會畀佢『停賽五年』嘅獎勵呢？
而家嘅國產電影，重有邊個唔遷就呢個市場？
陳凱哥冇咗以前嘅火，望就望佢嘅《梅蘭芳》有返內涵。
張藝謀導演嘅電影可以話轉向『扭曲』嘅意境，缺乏咗一份『正常』。當年嘅『罰停賽』，搞到佢要大玩隱喻嚟諷刺返呢個市場，喺呢個淨係識得『大製作』嘅氛圍裏邊，試問又有幾多個人睇得明佢嘅隱喻呢？—從《活著》到《黃金甲》嘅「金玉其外，敗絮其中」會引起幾多人思考？ 可惜嘅係佢冇再正面攻擊呢個市場，而係轉向諷刺。
田壯壯，可以講得正面攻擊最勇嘅一個，可惜嘅係，防守方重勇過佢。近作《吳清源》亦轉向民國賢士嘅情懷，真係無力反抗？
顧長衛，賈樟柯，婁燁，中國新生代嘅導演，佢哋鍾意衝擊呢個市場。之不過被人foul咗出局，去咗歐洲攞咗獎，咁有品味嘅歐洲話好睇嘅電影，居然國民冇份睇。
而家就真係得返李安可以正面衝擊呢個市場，帶畀觀眾正常嘅電影品味，當然而家嚟講，要喺偏主流嘅文藝入手。所以揀張愛玲呢編短片小說就最有效果。李安導演攞過美國嘅奧斯卡，中國呢個市場向來重視來頭，電審局肯定受落。
當時李安話要轉向華語市場，時機真係成熟，《斷背山》嘅奧斯卡導演獎啱晒華語呢個市場。就係因為有咗呢份榮譽，先可以做到今日呢個效果，起碼有得上映，就算畀人cut到唔三唔四。正面衝擊呢個市場，算係第一步。
電影唔使再轉彎抹角，正正式式噉表達一份情懷，喺電影院嘅共鳴先會真實，品味就係噉樣產生。
Wai
28/08/07
| 
發表於 2007-9-12 18:55:45