喺過去嘅半年時間裏邊,在下每日起早貪黑,堅持更新港臺名作家嘅專欄文章,每個專欄冇一篇漏網,從未間斷過圖片剪切、加水印、發帖。雖則辛苦,但每有沾沾自喜時,試問放眼大千網絡,何人有此種堅持(當然就粵協論壇嚟講,Dada堅持每日更新與粵語有關之古詩詞實屬難得),亦總算達到考驗自己耐力嘅目的。
天下無不散之筵席,由於在下為兩餐計,閒暇時間查實極少,頻於應付種種事務未免勞心竭力,當於適當時候歇息癱唞吓,值新版論壇運行之時,名家專欄暫且忍痛話別。雖則難捨難離,然所有過往需用粵幣購買嘅帖子現時免費公開瀏覽,亦未嘗唔係一份厚禮。對於過去有支持過名家專欄嘅版友,在下尤表感激。當諸君睇帖嘅時候,若蒙閣下想像到曾有條傻友喺處有過半年嘅堅持,即可謂「金風玉露喜相逢,便勝卻人間無數」。
PS:在下會繼續關注新論壇嘅運行,粵協係我網上嘅家,一個對家有承擔嘅人就算喺外邊點漂泊流浪,總有一顆戀家嘅心,但願對粵文化懷有深厚感情嘅會友亦如是,以粵協為網上精神家園且時常呵護珍愛之。 |