|
天下無不散之筵席，應走時候決定放手。——G肉佬（2007-8-22）
今日喺我檔口前，企咗一個又高又靚嘅黑衫女人，好明顯，佢同周圍環境好唔夾。佢除咗付黑超，露出一雙明眸，同一個不可思議嘅表情。不過，呢個女人絕對唔係嚟揾我找過夜數嘅。
「I didn't care what kind of job it was, though.（不過我並唔在乎揾到嘅係份乜嘢工）。」
冇幾耐，黑衫女人卒之出聲。我聽到呢句話，嘴邊嘅牙籤跌咗落地，我竟然放低把刀，然後好自覺噉接住講：「Just so people didn't know me and I didn't know anybody.（反正只要人哋唔知我係乜水，我又唔知人哋係乜水就得——《麥田裏的守望者》第25章）。」
「果然係你，Ocean，真係估唔到，你居然會匿埋喺呢啲地方！組織宜家需要你，重有你嘅能力，跟我返去啦！」
「你認錯人喇。My name is Tom, Tom G……」
「知唔知我為咗揾返你，受咗幾多苦，你點解係都唔肯見我？唔通你重為嗰次嘅任務……但根本就唔係你嘅錯！」
「噓……」我冇畀佢講落去，佢好似好清楚我性格，停住咗。
「你走啦，我唔會再返去嗰度，我要做生意！」
「你都知道，組織嘅勢力有幾大，要停你個營業執照話都冇咁易，不過，我重未向佢哋講你喺呢度。你都係跟我走喇。」
「你點揾到我嘅？」
「無意中喺網上見到一篇文章，覺得講嘢語氣好似你，就追蹤你嘅IP囉！不過有兩次都畀你呃到，搞到我去咗第個城市。不過後嚟睇返裏面啲內容然後再推算，就嚟咗呢度囉。一個會喺豬肉檔用咁先進設備上網嘅豬肉佬，真係令我眼前一亮！」
「我果然退步咗，居然畀你揾到……你再畀一日時間我得嗎？」
「好！但若然你又偷走，下次我就唔會同你客氣嘎喇！」
事實上，我並唔打算走返以前嘅路，亦都唔想提以往發生過嘅事，所以都唔會跟佢走。今晚收擋，洗乾淨咗張豬肉台，望吓市場周圍，心情好沉重。老實講我唔捨得呢度，但我冇辦法唔離開。當聽日嘅晨光再次射入呢個市場嘅時候，G-007檔呢度已經冇「G肉佬」呢個人，豬肉臺上只會留低一個用刀刻住嘅「G」字樣。
或者第日，你會喺第個市場見到一個朋克頭、Hip-hop裝、滑板鞋嘅街市佬；或者佢已經唔再賣豬肉，改賣其他嘢；或者佢重會寫一啲關於佢嗰個市場嘅爆笑生活；又或者，佢就喺你身邊……
[ 本帖最後由 gboss 於 2008-11-13 17:15 編輯 ] | 
發表於 2007-8-28 08:35:48