G肉佬之日常：The Fab Four

gboss

　　兄弟們，介紹吓自己啦！——G肉佬（2007年5月29日）

　　排骨今日賣到十九個八一斤，重邊有人買，個個師奶行過都話自己減緊肥，好似驚我監佢買噉。成日咁長都係做咗幾單生意，都唔明，樓價夠貴啦，一樣咁多人買，豬肉貴啲啫就沒人食，咩世道啊！

　　「又賣肉吖？做鴨吖笨！」見我做成單生意，雞洪走過嚟僚交嗌。

　　「你條仆街，開‘雞竇’開到街知巷聞，阿Sir唔Check你都冇使咁串嘎！」

　　「豬佬，乜咁燥吖？」呢個時候蝦佬走埋過嚟。

　　「係咁燥嘎喇，Hi～佬！」

　　「你哋唔好惹佢喇，佢呢排生意差，發窮惡喇！」賣魚彪唔知咩時候飆出嚟。

　　我哋「四絕」齊集，必有大事發生，只見蝦佬開聲：「不如今晚……」跟住做咗個「食胡」嘅手勢，今晚四方城內，一場世紀大戰無可避免要爆發喇！

　　呢三條友雖然都衰口臭，但喺呢個市場裏面，我哋幾個最後生，又最啱Key，成日摟埋一齊玩，可以講得係死黨，「四絕」喺呢一區個朵好響，而且個個都有個殺死人嘅綽號……

　　蝦佬：綽號「風騷二撇雞」，佢執須好鬼有型，不過個人衰姿整。無論佢剃幾耐須，嗰執二撇雞都唔會少條毛，是為一絕。

　　雞洪：綽號「股壇追擊手」，徒有虛名，不過屢敗屢戰，勇氣可嘉。條友打哈嗤超大聲，打完個身會跌幾條雞毛出來，是為一絕。

　　賣魚彪：綽號「西關尹光」，粗口歌冇邊只佢係唔熟嘅，加上唱歌嗰陣走音走到離晒譜，是為一絕。

　　至於我，綽號、花名一大堆，不過憑住我親切嘅笑容同友善嘅服務態度，畀啲師奶封咗做「街坊情人」。不過呢個係個好諷刺嘅名，所謂「情人」，咪啫係畀人玩個囉！你睇吓，今日我只手又畀佢哋搣到瘀晒喇，是為好絕！

 

By the way：我哋「四絕（The Fab Four）」其實都可以簡稱做「F4」，不過此「F」不同彼「F」，唔好搞錯啊！開講有話：古有江南四大才子，今有西關街市四絕，係咪唔嘢少呢？

[ 本帖最後由 gboss 於 2008-11-13 15:44 編輯 ]