|
多謝你哋嘅留言！——G肉佬（2007年5月27日）
「如果我喺廣州，肯定過嚟幫襯你啦……」
有日打開自己嘅個人主頁，見到留言板上面有則噉嘅留言，簡直重開心過中咗六合彩！
喺度留言嘅大部分人，包括呢位仁兄我都唔知佢係乜水（亦有啲係由唔識到識嘅），睇嚟佢應該係一個喺外地讀書或者做嘢嘅廣州人。每次有廣州人嚟我度留言，我就覺得特別有親切感，特別溫暖！
我呢個人讀書唔叻，寫篇嘢都寫到鬼五馬六，語無倫次兼且錯字百出，重間唔中爆粗添！不過街市佬都係啲性情中人，幾句粗口，好平常嘅啫！大家唔好見怪噃！
開頭學人寫博客，係一時貪玩，又可以趕吓時髦。反正鐘意寫咩就寫咩，又沒人批評我，幾好啊！估唔到有咁多朋友鐘意睇，網路真係一笪神奇嘅地方吖吓！
喺論壇度發帖係後來嘅事喇，沒諗到嘅係，竟然喺呢度識到好多好朋友，佢哋都係一班好Nice嘅廣州人（廣東人），唔單只肯同我玩，重成日幫我頂帖添！
我知道有好多廣州人為咗揾食要四圍去，雖然掛住屋企但為兩餐冇乜計啦。不過如果你哋睇咗我嘅日誌有返少少歸屬感嘅話，我會繼續寫嘅。嗱，寫得唔好唔准笑嘎！
[ 本帖最後由 gboss 於 2008-11-13 15:37 編輯 ] | 
發表於 2007-7-27 22:37:09