|
呢幾日放假喺屋企煲碟，咁啱畀我搵返1993年嘅幾出電影，又得咁啱呢幾出電影都係喺嗰年齊齊被電審局禁播。
呢三出電影好有來頭嘅，佢哋就係陳凱歌嘅《霸王別姬》，張藝謀嘅《活着》，重有嘅就係田壯壯嘅《藍風箏》。佢哋都喺嗰年嘅國際電影節攞咗大獎。引用葛優講嘅嘢：“我冇可能再有機會遇到同演到咁好嘅劇本（活着）。”。我喺度就唔細詳講《霸王別姬》同《活着》。喺呢度我諗住同你哋講吓田壯壯導演嘅《藍風箏》，點解呢出戲咁吸引我，除咗電影嘅整體效果之外，佢嘅經歷都值得一提。
《藍風箏》係有咖仔份投資嘅，1993年嘅中國應該都唔會咁接受國產片嘅製作有日本仔嘅份。就算喺而家，章子怡喺前排演咗日本藝妓就被人話係中國最可憐嘅演員，呢啲就係啲觀眾未搞清乜嘢係藝術，乜嘢係乜嘢喇，更何況嗰時係1993年嘅中國。
嗰年係點呢？1993年，《藍風箏》喺東京影展攞獎，成班中國代表團退席抗議，出戲即刻喺內地禁播，你睇電審局做嘢幾高效率呀，佢哋都好update啫，喺影展先第一次睇出電影。我覺得最慘嘅係田壯壯，佢之後十年冇得拍電影，一個導演冇得拍電影，你話慘唔慘。出戲裏便啲演員都被人再培訓嘅再培訓，再教育嘅再教育，受罰嘅受罰。而家田壯壯學乖咗喇，幫學院培訓新人，做導師，噉先有返機會出山。幾年前拍咗《小城之春》，而家就嚟有得睇佢年幾前拍成嘅《吳清源》。之不過我欣賞佢嘅係佢份執着。同年嘅導演好少有佢呢份堅持。你睇陳凱歌同張藝謀都接受上便嘅招手拍大製作。唔知佢哋重記唔記喺1993年大家齊齊被人禁播嘅嘢呢？
講返出電影，從劇本本身嚟講，田壯壯被人哋禁十幾年唔畀拍電影係正常嘅。點解噉講呢？
1993年呢三出戲都同時講到文革，之不過陳凱歌同張藝謀喺佢哋嘅電影裏便都係部分描寫。田壯壯就認真犀利喇，成出戲都係講呢樣嘢。呢啲就係堅持。而佢唔係為咗出位，佢用嘅祇用從佢細細個嗰時喺四合院住嘅回憶嚟描寫出電影啫。
講劇情嘅嘢喇。出電影嘅主線好簡單，用兩母子嘅經歷嚟做主線，做阿媽嘅經歷過三次婚姻，噉做仔嘅就有過三個老豆。佢嘅老公佢嘅老豆經歷過嗰一場文化變遷，該左嗰時變咗右，該右嗰時變咗左，畀人玩殘。成出電影可取之處係母子嘅感情，做老母嘅為人父母。
副線同樣出色，屋企親戚個個都經歷文化變遷，四合院嘅街坊，好有人情味。電影就係講人情味。做仔嘅慢慢大個咗，大個仔咗就夠膽同啲打過佢老豆啲兵仔隻抽，打爆佢哋個頭。呢啲噉嘅兵如果唔打，寫劇本嗰個就要畀人打喇。
呢出電影嘅政治隱喻手法好簡單，每個細節都好易明，導演嘅苦心，祇係諗住帶畀大家喺一個文化變遷嘅時代裏便嘅一出親情電影。最具爭議性嘅係藍風箏係代表乜嘢呢？風箏係自由自在嘅，同個天空好襯。1993年嘅天空好藍，而家呢？天空海闊任鳥飛，自由噉飛。飛走嘅風箏，斷尾嘅風箏，中國人嘅命運。諗起黃子華講過乜嘢係中國人—就係命運好難預測嘅人。風箏嘅隱喻，好有意思。導演喺電影裏便講宿命，同杜Sir嘅好似。
呢出電影最好嘅地方就係故事好平淡。中國需要嘅係平淡自然，街坊嘅和諧生活，點解要接受咁多規條呢？
講到呢度，我發覺1993年真係中國電影最百花齊放嘅一年，當年香港出《誘僧》，造就咗葉錦添，李碧華。電影嘅色彩好經典。亦都搵到盧燕。
1993年嘅電影好精彩，而家嘅中國電影呢？係唔係驚咗禁播，抑或冇咗份堅持。
Wai
25/02/2007
[此帖子已經被作者於2007-2-26 22:32:06編
[ 本帖最後由 Wai 於 2007-9-10 22:25 編輯 ] | 
發表於 2007-2-25 20:54:03
發表於 2007-2-25 22:21:19
發表於 2007-2-25 22:44:57
