|
由于周身唔得闲都要打救人，所以星期日粤语协会嘅聚会我迟晒大到。加上蚊瞓葛将个小柠檬校（喺呢度读“教”）咗去冇声，搞到我打咗好多次电话先揾到佢。于是，喺一个长蒲越秀山嘅高人指点下，我用咗唔够十分钟嘅时间就由象岗山走落嚟，过马路买门票入越秀公园，并且揾到粤语协会一众人马聚集紧嘅山间平台，期间我重小咗个便——苏察哈尔灿喺长城赶住去救如霜姑娘嗰阵都小咗个便啦，有乜咁好笑噃！ 去到嘅时候，大家正进行自我介绍——唔记得当时系边个介绍紧自己嘞，反正跟住就轮到马万千……我重见到地上有好多本有关粤语文化嘅古书——其中令我印象最深刻嘅，系一本又黄又烂、用透明封箱胶纸包住晒每一页嘅古书，书面写住“有书不读子孙愚”，内容系好多字嘅读法，有好多地方都已经磨损晒，估计呢本书有过百年嘅历史——物主原来系余ＯＫ嘅先祖。  自我介绍完，就开始玩游戏嘞。玩游戏之前系先抽签分组，我抽到嘅系“闻煮档”——本来我喺粤语协会系无门无派嘅，不过而家就入咗“闻煮档”——唔错，我中意，因为够进步吖嘛！同我一样咁进步嘅有南汉、Ｇａｒｙ、Ｎｅｏ同Ｊｕｍｐｓｅｙ。 由于佢哋都唔系广州嘅，所以“档魁”之位我就当仁不让，坐住先，带领４位档员对抗另外两个大档——有十几个人、包括全体到场女会员嘅“纳税档”，同有八条彪形大汉嘅“郭闻档”。 面对两大档嘅夹击，我哋丝毫都冇退缩到，反而越战越勇。虽然我同４位档员系首次见面，而且本身又冇乜默契，但系我哋嘅合作无间，几次抢答都非常成功。可惜有时啲答案虽然系啱，但系唔够人哋快，所以最后都系未能取得全场嘅最后胜利。 不过唔紧要，我哋一样有奖品，就系由【許冠傑音樂聯盟】、【粵語協會】、【許冠傑珍藏網】、【愛Ｋ翻唱博客】四个网嘅网友联合出品，历时两年，自行策划、录音、制作，收录咗１４首靓歌嘅首张网友改编嘅许冠杰歌曲歌词作品经典ＣＤ专辑——《難忘您的音韻》。  领完奖品之后，大家就喺聚会嘅平台影相留念，并且商讨咗一啲推广网站同广州话嘅方向及策略，我当然将我之前谂好嘅一大套方案摆晒出嚟，希望可以游说到大家加大、加快广州话嘅推广运动啦。 跟住又上去五羊石像大晒冷——重遇到一大班日本游客，顺便向佢哋展示埋个网站，实行推广国际化。  今次有份出席嘅包括LILYWAY、guoaen、malsony、Samkong、Allen、Highyun、LHK、余OK、月影、Jumpsey、Gary、Neo、粵語衛士、西關原居民、Yucky、晴天雪娃、Cetty、盧斯奧華、Ultra、蚊瞓葛、馬萬千、羊城惜花人、Ph11、NGF、南漢。  影完相，我哋就行出公园，准备去盘福路开饭。呢个时候，有人见到路边嘅电灯柱上面有张“寻人启事”有错字，于是我哋马上予以纠正。我重喺上面写低粤语协会嘅名称同网址，希望大家以后遇见类似情况都可以出手“正字”！ 返到嚟之后，我就被委任为“时事光明顶”嘅“顶爷”——大家记得多啲上去发帖、复帖，有咩冤屈气想发泄，又或者有咩时事新闻内幕想爆，都可以上去话我哋知——卢总一定会帮你主持公道、伸张正义！ 今日精选嘅推介有两篇，都系关于摩托搭客佬嘅，大家不妨细心品读一下，睇过做摩托车搭客嘅人系唔系政府成日所宣称咁样嘅人： [轉貼]一个搭客佬嘅真情自白 [轉貼]广州摩托佬——睇完唔觉得感动嗰个都冇血性！  寻日，我好认真噉听完嗰只《難忘您的音韻》嘅ＣＤ，感触良多，仿佛见到一大班志同道合嘅人同我一样喺保护、发扬自己母语嘅道路上奔往。我嘅旅程并唔孤单，我嘅征途并唔可怕，因为将会有一大班人同我携手合作、互相扶持！ 我好希望今年我哋可以出多只ＣＤ，向另外两位为推广广州话作出不懈努力嘅大师致敬——黄霑同顾家辉呢对梦幻组合。霑叔虽然已经离开咗我哋两年有多，但系佢留畀我哋嘅嘢，以及佢同顾家辉先生为粤语流行歌所作出嘅努力同贡献，我哋又点可以忘怀呢？真系好想发动大家一齐向住呢个目标进发，希望大家都能够同心协力，用更短嘅时间制作出更好嘅ＣＤ！  越谂，啲ｉｄｅａ就越正，真系有好多嘢可以搞——适逢今年又适合做文艺创作、广告传播等工作，所以一定要把握好呢啲机会！ 最后，必须解释一下我呢个“闻煮档档魁”嘅角色，所谓“闻煮”就系，你哋做“闻”，我做“煮”——卢总会继续炮制各式各样丰富美味畀各位欣赏，大家记得叫多啲人嚟捧场就得嘞！所以，呢个“闻煮档档魁”嘅角色其实一啲都唔易做，都系要大家多啲去投票支持下先得：
http://lovefeast.blogcn.com/pages/personal.aspx?ID=100043 | 
發表於 2007-2-7 15:01:13
發表於 2007-2-8 02:08:55
發表於 2007-2-8 04:31:46
發表於 2007-2-9 06:03:54