阿妈买餸经

余OK

　　轉自http://club.dayoo.com/read.dy?b=cantonese&t=751251&i=751251&p=1　

　　来源：南方都市报

　　粤讲粤明　□　小超
　　
　　呢个礼拜日，阿妈要我陪佢去买餸。

　　呢一次，先知原来买菜一啲都唔简单。好似猪肉咁，边个部位点煮先好食，原来都好有讲究噶。有个阿叔卖啲生鱼特别贵，话响山沟捞噶，我妈即刻就买咗两条。我觉得奇怪：“佢卖啲鱼有咩唔同啊？”我妈话：“你睩大个眼睇下啦，呢几条鱼个肚係咪特别细？野生啲鱼唔似人工饲养嗰啲有咁多嘢食，个肚冇油水特别细，但係食起来会比人工饲养嗰啲好味好多噶。”唔单止咁，我妈连买青菜都好讲究噶，太绿油油嗰啲，阿妈话化肥落得多唔好食嘅。

　　我哋又来到生果摊前，有个档主即刻行过来：“刘姨，买柑啦，啲柑好靓噶！”我妈睄佐几眼：“依家啲柑呢，睇上去就黄黚黚，讲唔定酸到盲佬都识开眼，唔买唔买。”然后就去帮衬隔离嗰档。我好奇怪，因为嗰档生果睇上去都几靓啊！阿妈话：“黄皮食熟唔食生，我日日都帮衬佢，点知佢会唔会当我戆居呃啊？要佢知道你会帮衬人哋，有竞争对手，佢先唔敢呃你啊！”

　　返到屋企，阿妈将啱先买嘅嘢一样样过秤。我话：“就算俾人呃咗，唔通你仲返去问佢攞番咩？”阿妈话：“我称下就知道边个做生意唔老实，呢次呃咗我，以后就唔使指意我会帮衬佢，比人呃咗都要心中有数啊！”?